ନୂଆଦିଲ୍ଲୀ,୧୯।୧୧: ପାକିସ୍ତାନର ପୂର୍ବତନ ଷ୍ଟାର୍ ଦ୍ରୁତ ବୋଲର ଶୋଏବ ଅଖତରଙ୍କ ଏକ ବୟାନକୁ ନେଇ କ୍ରିକେଟ୍ ଜଗତରେ ଚର୍ଚ୍ଚା ଆରମ୍ଭ ହୋଇଛି । କ୍ରିକେଟ୍ ଧୀରେ ଧୀରେ ନିଜର ଆକର୍ଷଣ ହରାଉଛି ଏବଂ ଯୁବପିଢ଼ି ଏହି ଖେଳ ପ୍ରତି ପୂର୍ବଭଳି ଆଗ୍ରହ ଦେଖାଉନାହାନ୍ତି ବୋଲି ସେ ମତ ଦେଇଛନ୍ତି । ଏପରିକି ତାଙ୍କ ନିଜ ପିଲାମାନେ ମଧ୍ୟ କ୍ରିକେଟ୍ ପ୍ରତି ଆଗ୍ରହୀ ନଥିବା ସେ କହିଛନ୍ତି । ଆଲୋଚନା ବେଳେ ଅଖତର କହିଥିଲେ, ଗତ ୨୦ ବର୍ଷ ଧରି କ୍ରିକେଟ୍ କ୍ରମାଗତ ଭାବେ ଅବନତି ଆଡ଼କୁ ଗତି କରୁଛି । ନିୟମରେ ପରିବର୍ତ୍ତନ ଏବଂ କରିସ୍ମା ଥିବା ଖେଳାଳିଙ୍କ ଅଭାବ ଏହାର ପ୍ରମୁଖ କାରଣ ବୋଲି ସେ ମତ ଦେଇଛନ୍ତି। ଅଖତର କହିଛନ୍ତି, “କ୍ରିକେଟ୍ ମରୁଛି। ଗତ ୨୦ ବର୍ଷ ଧରି ଏହି ଖେଳ କ୍ରମାଗତ ଭାବେ ଅବନତି ଆଡ଼କୁ ଯାଉଛି।”
ଆଧୁନିକ କ୍ରିକେଟ୍ ବ୍ୟାଟରଙ୍କୁ ଅଧିକ ଫାଇଦା ଦେଉଛି ବୋଲି ଅଖତର ମତ ଦେଇଛନ୍ତି। ଦିନିକିଆ କ୍ରିକେଟ୍ରେ ଦୁଇଟି ନୂଆ ବଲ୍ର ବ୍ୟବହାର ଯୋଗୁଁ ଦ୍ରୁତ ବୋଲରଙ୍କ ପ୍ରଭାବ କମିଯାଉଛି। ଏହା ରିଭର୍ସ ସ୍ୱିଙ୍ଗ୍ ଭଳି ବୋଲିଂ କଳାକୁ ମଧ୍ୟ ପ୍ରଭାବିତ କରୁଛି ବୋଲି ସେ କହିଛନ୍ତି। ତାଙ୍କ ଚିନ୍ତା କେବଳ ନିୟମ ପରିବର୍ତ୍ତନରେ ସୀମିତ ନୁହେଁ। ପାକିସ୍ତାନ ଏବେ ଏଭଳି ଖେଳାଳି ସୃଷ୍ଟି କରିପାରୁନାହିଁ, ଯେଉଁମାନେ ନୂଆ ପିଢ଼ିକୁ ପ୍ରଭାବିତ କରିପାରିବେ ବୋଲି ସେ କହିଛନ୍ତି। ଅଖତରଙ୍କ କହିବା ଅନୁସାରେ, ତାଙ୍କ ପୁଅ ମଧ୍ୟ କହୁଛି, “ବାପା, ଆମ ଦଳରେ ମୋତେ କୌଣସି ଆକ୍ରମଣାତ୍ମକ ମନୋଭାବ ଦେଖାଯାଉନାହିଁ।”
ନିଜ ଖେଳ ଜୀବନରେ ବଲ୍ ଟାମ୍ପରିଂକୁ ନେଇ ମଧ୍ୟ ଅଖତର ଖୋଲାଖୋଲି ମତ ରଖିଛନ୍ତି । ବଲ୍ର ପୃଷ୍ଠଭାଗରେ ପରିବର୍ତ୍ତନ କରି ରିଭର୍ସ ସ୍ୱିଙ୍ଗ୍ ହାସଲ କରିବା ପାଇଁ ଖେଳାଳିମାନେ ବୋତଲର ଢାଙ୍କୁଣି ବ୍ୟବହାର କରୁଥିଲେ ବୋଲି ସେ କହିଛନ୍ତି। ଅଖତରଙ୍କ ଭାଷାରେ, “ଆମେ ଇଂଲଣ୍ଡରେ ସ୍ୟାଣ୍ଡପେପର ନୁହେଁ, ବରଂ ବୋତଲର ଢାଙ୍କୁଣି ବ୍ୟବହାର କରୁଥିଲୁ।”
୨୦୧୮ରେ ଅଷ୍ଟ୍ରେଲିଆ କ୍ରିକେଟ୍ରେ ସାମ୍ନାକୁ ଆସିଥିବା ବଲ୍ ଟାମ୍ପରିଂ ଘଟଣା ଉପରେ ମଧ୍ୟ ସେ ମତ ଦେଇଛନ୍ତି । ଏଭଳି ଘଟଣା ବିଷୟରେ ସାଧାରଣତଃ ସମଗ୍ର ଦଳ ଜାଣିଥାଏ ଏବଂ ଏହା କେବଳ ଜଣେ କିମ୍ବା ଦୁଇଜଣ ଖେଳାଳିଙ୍କ ମଧ୍ୟରେ ସୀମିତ ରହିପାରେ ନାହିଁ ବୋଲି ସେ କହିଛନ୍ତି। ଟେଷ୍ଟ କ୍ରିକେଟ୍ରେ ପୁଣି ରୋମାଞ୍ଚ ଫେରାଇ ଆଣିବାକୁ ଅଖତର ଇଚ୍ଛା ପ୍ରକାଶ କରିଛନ୍ତି। ଦ୍ରୁତ ବୋଲରଙ୍କୁ ଅନୁକୂଳ ପରିସ୍ଥିତିରେ ଟେଷ୍ଟ ମ୍ୟାଚ୍ ଆୟୋଜନ କରାଗଲେ ସେ ଏଥିପାଇଁ ୧ ଲକ୍ଷ ଡଲାର ପର୍ଯ୍ୟନ୍ତ ଦେବାକୁ ପ୍ରସ୍ତୁତ ବୋଲି କହିଛନ୍ତି।
ପାକିସ୍ତାନ କ୍ରିକେଟ୍ ବୋର୍ଡ (PCB) ଏବଂ ରାଜନୀତିରେ ସାମିଲ ହେବାକୁ ଅଖତର ଆଗ୍ରହୀ ନୁହନ୍ତି । ଏସବୁଠାରୁ ଦୂରେଇ ରହିବାକୁ ସେ ନିଜ ମା’ଙ୍କୁ ପ୍ରତିଶ୍ରୁତି ଦେଇଛନ୍ତି ଏବଂ ସେହି ପ୍ରତିଶ୍ରୁତି ପାଳନ କରିବେ ବୋଲି କହିଛନ୍ତି ।

