ବରଗଡ଼ ଅଫିସ,୨୫ା୨: ରାଜ୍ୟ ସରକାର ସ୍କୁଲ ପରିସରକୁ ଦଣ୍ଡମୁକ୍ତ ଅଞ୍ଚଳ ଘୋଷଣା କରିଛନ୍ତି। ମାତ୍ର ସରକାରଙ୍କ ଏହି ଘୋଷଣା ବାଟବଣା ହୋଇପଡ଼ିଛି। ବରଗଡ଼ ସହରର ଖଜୁରଟିକ୍ରାସ୍ଥିତ ରାଧାମାଧବ ପ୍ରାଥମିକ ବିଦ୍ୟାଳୟରେ ପ୍ରଧାନଶିକ୍ଷୟିତ୍ରୀଙ୍କ ପୁଅଙ୍କ ମାଡ଼ରେ ଜଣେ ପଞ୍ଚମ ଶ୍ରେଣୀ ଛାତ୍ରୀ ଆହତ ହୋଇଛନ୍ତି। ଘଟଣାଟି ଶୁକ୍ରବାର ଘଟିଥିବାବେଳେ ଆହତ ଛାତ୍ରୀଙ୍କ ବାପା ଶନିବାର ଘଟଣା ସମ୍ପର୍କରେ ବରଗଡ଼ ଟାଉନ ଥାନାରେ ଅଭିଯୋଗ କରିଛନ୍ତି। ଏହାପରେ ଘଟଣାଟି ସାମ୍ନାକୁ ଆସିଛି।
ଅଭିଯୋଗ ଅନୁଯାୟୀ, ବରଗଡ଼ ପୌର ପରିଷଦ ଅଧୀନ ଓ୍ବାର୍ଡ ନଂ-୭ ନଲିଆଖଣ୍ଡି ନିବାସୀ ଜୀବର୍ଦ୍ଧନ ଚନ୍ଦ୍ରାଙ୍କ ଝିଅ କବିତା ରାଧାମାଧବ ପ୍ରାଥମିକ ବିଦ୍ୟାଳୟର ପଞ୍ଚମ ଶ୍ରେଣୀରେ ପଢୁଛନ୍ତି। ତେବେ ଶୁକ୍ରବାର ପ୍ରଧାନଶିକ୍ଷୟିତ୍ରୀ ନଳିନୀ ରଥଙ୍କ ଅନୁପସ୍ଥିତିରେ ତାଙ୍କ ପୁଅ ବିଦ୍ୟାଳୟକୁ ଆସିଥିଲେ ଏବଂ ଛାତ୍ରୀ କବିତାଙ୍କୁ ପାଖକୁ ଡାକି ତାଙ୍କୁ ଲୁହାରଡ୍ରେ ନିସ୍ତୁକ ପିଟିଥିବା ଅଭିଯୋଗ ହୋଇଥିଲା। ଦୋଷୀଙ୍କୁ କଡ଼ା ଦଣ୍ଡ ଦେବାକୁ ଆହତ ଛାତ୍ରୀଙ୍କ ବାପା ନିବେଦନ କରିଛନ୍ତି। ଅନ୍ୟପକ୍ଷରେ ବିଦ୍ୟାଳୟକୁ ତାଙ୍କ ପୁଅ ଆସିଥିବା ନେଇ ପ୍ରଧାନଶିକ୍ଷୟିତ୍ରୀ ସ୍ବୀକାର କରିଥିବା ବେଳେ ମାଡ଼ ଘଟଣାକୁ ନେଇ ସେ କିଛି ଜାଣି ନ ଥିବା ସେ କହିଛନ୍ତି। ଏହି ଘଟଣାର ବିଧିବଦ୍ଧ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ନିଜେ ବିଦ୍ୟାଳୟରେ ଉପସ୍ଥିତ ରହିବା ବଦଳରେ ତାଙ୍କ ପୁଅଙ୍କୁ ବିଦ୍ୟାଳୟକୁ ପଠାଇଥିବା ଯୋଗୁ ପ୍ରଧାନଶିକ୍ଷୟିତ୍ରୀଙ୍କୁ ତୁରନ୍ତ ନିଲମ୍ବନ ପାଇଁ ଅଭିଭାବକ ସଂଘ ଦାବି କରିଛି।
