ନୂଆଦିଲ୍ଲୀ,୨୫।୨ : ୧୪ ଫେବୃଆରୀ ୨୦୧୯ ରେ ଜମ୍ମୁ-କଶ୍ମୀରର ପୁଲୱାମାରେ ହୋଇଥିବା ଆତଙ୍କବାଦୀ ଆକ୍ରମଣରେ ଚାଳିଶ ଜଣ ସିଆରପିଏଫ୍ ଯବାନ ଶହୀଦ ହୋଇଥିଲେ। ଏହା ଦେଶର ଇତିହାସରେ ସବୁଠାରୁ ବଡ ଆତଙ୍କବାଦୀ ଆକ୍ରମଣ ଥିଲା। ବର୍ତ୍ତମାନ ଏକ ପୁସ୍ତକରେ ପୂର୍ବତନ ସେନା ଅଧିକାରୀ ଉଲ୍ଲେଖ କରିଛନ୍ତି ଯେ ପୁଲୱାମା ଆକ୍ରମଣର ଠିକ ୧୦ ଦିନ ପରେ ଆତଙ୍କବାଦୀମାନେ ପୁଲୱାମା ଭଳି ଆକ୍ରମଣର ଷଡଯନ୍ତ୍ର ରଚିଥିଲେ। ତେବେ ସେନା, ଜମ୍ମୁ-କଶ୍ମୀର ପୋଲିସ ଏବଂ ସିଆରପିଏଫର ତୁରନ୍ତ କାର୍ଯ୍ୟ ଦ୍ୱାରା ଆତଙ୍କବାଦୀଙ୍କୁ ଆକ୍ରମଣ ପୂର୍ବରୁ ଏନକାଉଣ୍ଟରରେ ହତ୍ୟା କରାଯାଇ ପୁଲୱାମା ଭଳି ଆକ୍ରମଣକୁ ପଣ୍ଡ କରାଯାଇଥିଲା।
ଚିନାର କର୍ପସ କମାଣ୍ଡର ଥିବା ଅବସରପ୍ରାପ୍ତ ଲ୍ୟୁଟନାଟ ଜେନେରାଲ କେଜେ ଧିଲନ ତାଙ୍କ ପୁସ୍ତକ ’କିତନେ ଗାଜି ଆଏ, କିତନେ ଗାଜି ଗୟେ’ରେ ଏହା ଉଲ୍ଲେଖ କରିଛନ୍ତି ଯେ ପୁଲୱାମା ଆକ୍ରମଣର କିଛି ଦିନ ପରେ ପାକିସ୍ତାନ ଭିତ୍ତିକ ଆତଙ୍କବାଦୀ ସଂଗଠନ ଜୈଶ-ଇ-ମହମ୍ମଦ ଏକ ଆତ୍ମଘାତୀ ଆକ୍ରମଣର ଷଡ଼ଯନ୍ତ୍ର ରଚିଥିଲା।
ପୁସ୍ତକରେ କୁହାଯାଇଛି ଯେ ୨୪ ଫେବୃଆରୀ ୨୦୧୯ ରେ ଆତଙ୍କବାଦୀମାନେ ଆତ୍ମଘାତୀ ଆକ୍ରମଣ କରିବାକୁ ଯୋଜନା କରୁଥିବା ସୂଚନା ମିଳିଥିଲା। ଜମ୍ମୁ-କଶ୍ମୀରର କୁଲଗାମ ଅଞ୍ଚଳର ଡିଏସପି ଅମାନ କୁମାର ଠାକୁର ଏହି ଆକ୍ରମଣ ସମ୍ପର୍କରେ ରାଷ୍ଟ୍ରୀୟ ରାଇଫଲ୍ସକୁ ସୂଚନା ଦେଇଥିଲେ। ସୂଚନା ଆଧାରରେ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରି ୨୪ ଫେବୃଆରୀ ୨୦୧୯ ରାତିରେ କୁଲଗାମର ତୁରିଗାମ ଗ୍ରାମରେ ସେନା ଏବଂ ଅନ୍ୟ ସୁରକ୍ଷା ବାହିନୀ ତିନି ଜଣ ଆତଙ୍କବାଦୀଙ୍କୁ ଘେରି ରହିଥିଲେ। ଲୁଚି ରହିଥିବା ସ୍ଥାନରେ ଆତଙ୍କବାଦୀଙ୍କ ଉପସ୍ଥିତି ନିଶ୍ଚିତ ହେବା ମାତ୍ରେ ଉଭୟ ପାର୍ଶ୍ୱରୁ ପ୍ରବଳ ଗୁଳି ବିନିମୟ ଆରମ୍ଭ ହୋଇଥିଲା।
ଏହି ଅପରେଶନ ସମୟରେ ଭାରତୀୟ ସେନା ଯବାନ ବଲଦେବ ରାମ ଶହୀଦ ହୋଇଥିଲେ। ଏଭଳି ପରିସ୍ଥିତିରେ ଜମ୍ମୁ-କଶ୍ମୀର ପୋଲିସର ଡିଏସପି ଅମାନ ଠାକୁର ଆହତ ଯବାନଙ୍କୁ ଏକ ସୁରକ୍ଷିତ ସ୍ଥାନକୁ ନେଇ ଯାଇଥିଲେ, କିନ୍ତୁ ଏହି ସମୟରେ ଡିଏସପି ଅମାନ ଠାକୁର ନିଜେ ମଧ୍ୟ ଶହୀଦ ହୋଇଥିଲେ। ଆହତ ହୋଇଥିଲେ ମଧ୍ୟ ଗୁଳି ବିନିମୟରେ ଡିଏସପି ଅମାନ ଠାକୁର ଜଣେ ଆତଙ୍କବାଦୀଙ୍କୁ ଗୁଳି କରିଥିଲେ। ନିହତ ଆତଙ୍କବାଦୀ ଜଣକ ଜୈଶ-ଏ-ମହମ୍ମଦ ଆତଙ୍କବାଦୀ ନୋମାନ ବୋଲି ଜଣାପଡିଥିଲା।
୩୪ ରାଷ୍ଟ୍ରୀୟ ରାଇଫଲ୍ସର ଯବାନ ନାଏବ ସୁବେଦାର ସୋମବୀର ମଧ୍ୟ ସାହସିକତା ପ୍ରଦର୍ଶନ କରି ଗୁଳି ବିନିମୟରେ ଓସାମା ନାମକ ଜଣେ ପାକିସ୍ତାନୀ ଆତଙ୍କବାଦୀଙ୍କୁ ହତ୍ୟା କରିଥିଲେ। ତେବେ ଆତଙ୍କବାଦୀଙ୍କ ଗୁଳିରେ ନାଏବ ସୁବେଦାର ସୋମବୀର ମଧ୍ୟ ଆହତ ହୋଇ ପରେ ଶହୀଦ ହୋଇଥିଲେ। ଉଭୟଙ୍କୁ ମରୋଣପରାନ୍ତ ଶୌର୍ଯ୍ୟ ଚକ୍ର ପ୍ରଦାନ କରାଯାଇଥିଲା।
ଅବସରପ୍ରାପ୍ତ ଲେଫ୍ଟନାଣ୍ଟ ଜେନେରାଲ କେଜେ ଧିଲନ କହିଛନ୍ତି ଯେ ଯଦି ତୁରିଗାମ ଅପରେଶନ ସଫଳ ହୋଇ ନ ଥାନ୍ତା ଏବଂ ଆତଙ୍କବାଦୀମାନେ ଆକ୍ରମଣ କରିବାରେ ସଫଳ ହୋଇଥାନ୍ତେ ତେବେ ଏହା ଯୋଗୁ ଏକ ବଡ କ୍ଷତି ଘଟିଥାନ୍ତା।
