ଭୁବନେଶ୍ୱର,୧୦ା୧(ବ୍ୟୁରୋ): ଚଳିତ ଆର୍ଥିକ ବର୍ଷ ୨୦୨୧-୨୨ର ଅକ୍ଟୋବର ଶେଷ ବେଳକୁ ରାଜ୍ୟର ଋଣ ଭାର ୧,୦୩,୮୨୦.୭୧ କୋଟି ଟଙ୍କାରେ ପହଞ୍ଚତ୍ଥିବା ବେଳେ ତାହା ମାର୍ଚ୍ଚ ଶେଷ ସୁଦ୍ଧା ୧,୨୫,୦୦୫.୩୧ କୋଟି ଟଙ୍କାରେ ପହଞ୍ଚତ୍ବ ବୋଲି ରାଜ୍ୟ ସରକାର ଆକଳନ କରଛନ୍ତି। କେବଳ ସେତିକି ନୁହେଁ, ଚଳିତ ଆର୍ଥିକ ବର୍ଷରେ ରାଜ୍ୟର ଘରୋଇ ଉତ୍ପାଦନ (ଜିଏସ୍ଡିପି) ମଧ୍ୟ ବିପରୀତମୁହଁା ହେବ। ଗତ ଆର୍ଥିକ ବର୍ଷ ତୁଳନାରେ ରାଜ୍ୟର ଅଭିବୃଦ୍ଧି ହାର ୪.୯୨ ପ୍ରତିଶତ କମ୍ ରହିବା ନେଇ ଆକଳନ କରାଯାଇଛି।
କୋଭିଡ୍ ପ୍ରଭାବରେ ରାଜ୍ୟର ଟିକସ ମଧ୍ୟ ହ୍ରାସ ପାଇଛି। ରାଜ୍ୟ ସରକାର ୨୦୨୧ ନଭେମ୍ବର ୬ରୁ ପେଟ୍ରୋଲ ଓ ଡିଜେଲ ଉପରୁ ଭାଟ୍ ହ୍ରାସ କରିଛନ୍ତି। ଏଥିଯୋଗୁ ସରକାରଙ୍କୁ ପ୍ରାୟ ୨୦୦୯ କୋଟି ଟଙ୍କା ରାଜସ୍ବ ହରାଇବାକୁ ପଡ଼ିଚି। ଏଥିସହିତ ରାଜ୍ୟ ସରକାର ଯୋଜନା ଏବଂ ଅଣଯୋଜନା ଖର୍ଚ୍ଚ ମଧ୍ୟ ବଢ଼ାଇଛନ୍ତି। ଶିକ୍ଷକମାନଙ୍କୁ ସପ୍ତମ ବେତନ କମିଶନ ହାରରେ ଦରମା ଦେବାଠାରୁ ଆରମ୍ଭ କରି କନିଷ୍ଠ ଶିକ୍ଷକମାନଙ୍କର ଦରମା ବୃଦ୍ଧି, ମିଶନ ଶକ୍ତି, ଅଙ୍ଗନଓ୍ବାଡି କର୍ମୀଙ୍କ ଭତ୍ତା ବୃଦ୍ଧି, ଗ୍ରାମାଞ୍ଚଳ ଓ ସହରାଞ୍ଚଳ ଭିତ୍ତିଭୂମି, ପାନୀୟ ଜଳ, କୃଷି , ସ୍ବାସ୍ଥ୍ୟ, ଦାରିଦ୍ର୍ୟ ଦୂରୀକରଣ ଯୋଜନା କ୍ଷେତ୍ରରେ ଚଳିତ ଆର୍ଥିକ ବର୍ଷରେ ସରକାରଙ୍କୁ ଅଧିକ ଖର୍ଚ୍ଚ ବହନ କରିବାକୁ ପଡ଼ିବ।
ଆଗକୁ ପଞ୍ଚାୟତ ଓ ପୌର ନିର୍ବାଚନ ଥିବାରୁ ଅତିରିକ୍ତ ବଜେଟ ଆକାର ବଢ଼ିଛି। ରାଜ୍ୟ ସରକାର ୨୦୨୧-୨୨ ଆର୍ଥିକ ବର୍ଷ ଲାଗି ୧୯ ହଜାର ୮୩୩ କୋଟି ଟଙ୍କାର ଅତିରିକ୍ତ ବଜେଟ ପ୍ରସ୍ତୁତ କରିଛନ୍ତି। ୨୦୨୧-୨୨ ଆର୍ଥିକ ବର୍ଷର ମୂଳ ବଜେଟ ୧. ୭୦ଲକ୍ଷ କୋଟି ଟଙ୍କା ହୋଇଥିବା ବେଳେ ଅତିରିକ୍ତ ବଜେଟର ଆକାର ମୂଳ ବଜେଟର ୧୧.୬୭% ହୋଇଛି।
ବିଭିନ୍ନ ଦାରିଦ୍ର୍ୟ ଦୂରୀକରଣ ବାବଦରେ ସରକାର ଚଳିତ ଆର୍ଥିକ ବର୍ଷରେ ୫୫,୫୮୧.୯୨ କୋଟି ଟଙ୍କା ଖର୍ଚ୍ଚ କରିବେ। ୨୦୨୦-୨୧ ଆର୍ଥିକ ବର୍ଷରେ ଏହି ଖର୍ଚ୍ଚ ୪୬,୨୦୭ କୋଟି ଟଙ୍କା ଥିଲା। ଅନ୍ୟ ପକ୍ଷରେ କେନ୍ଦ୍ରୀୟ ଟିକସରେ ମଧ୍ୟ ହ୍ରାସ ଘଟିଛି। ୨୦୧୯-୨୦ରେ ରାଜ୍ୟକୁ କେନ୍ଦ୍ରୀୟ ଟିକସ ବାବଦରେ ମୋଟ ୫୪,୬୦୫.୩୮ କୋଟି ଟଙ୍କା ମିଳିଥିବା ବେଳେ ୨୦୨୦-୨୧ରେ ତାହା ୫୦,୬୧୧.୦୧ କୋଟି ଟଙ୍କକୁ ହ୍ରାସ ପାଇଛି। ଖର୍ଚ୍ଚ ତୁଲାଇବା ପାଇଁ ରାଜ୍ୟ ସରକାର ଖୋଲା ବଜାରରୁ ଋଣ କରିବାକୁ ସଙ୍କେତ ଦେଇଛନ୍ତି। କୋଭିଡ୍ ଯୋଗୁ ଟିକସ କମିଥିବା ବେଳେ କେବଳ ଖଣି ରାଜସ୍ବ ଉପରେ ସରକାର ଭରସା କରିଛନ୍ତି। ୨୦୨୦-୨୧ରେ ଖଣି ରାଜସ୍ବ ୧୩,୭୯୧.୭୨ କୋଟି ଟଙ୍କା ଥିବାବେଳେ ୨୦୨୧-୨୨ ଅକ୍ଟୋବର ଶେଷ ଯାଏ ତାହା ୨୨,୦୫୨.୯୪ କୋଟି ଟଙ୍କାରେ ପହଞ୍ଚିଛି। ଏଥିସହିତ କୋଭିଡ୍-୧୯ ସମ୍ବନ୍ଧୀୟ ଖର୍ଚ୍ଚ ଭରଣା ପାଇଁ ରାଜ୍ୟ ସରକାର ଓଡ଼ିଶା ଖଣିଜ ଅଞ୍ଚଳ ଉନ୍ନୟନ ପାଣ୍ଠି(ଓଏମ୍ବିଏଡିସି) ଏବଂ କାମ୍ପା ପାଣ୍ଠିରେ ଥିବା ରାଶିକୁ କମ୍ ସୁଧରେ ଋଣ ଆଣିବା ସହ ଖର୍ଚ୍ଚ ନ ହୋଇ ବ୍ୟାଙ୍କରେ ପଡିରହିଥିବା ଅର୍ଥ, ମକଦ୍ଦମା ଯୋଗୁ ପଡ଼ିରହିଥିବା ବକେୟା ଆଦାୟ କରିବା ପାଇଁ ସରକାର ଯୋଜନା କରିଥିବା ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି।
