ଛେଣ୍ଡିପଦା,୧୬।୫(ସ୍ବ.ପ୍ର.): ପୈତୃକ ଘର କିଶୋରନଗର ବ୍ଲକରେ। ହେଲେ ଦୀର୍ଘ ୪୦ ବର୍ଷ ହେଲା କାର୍ତ୍ତିକା ବେହେରା (୮୬) ଚାଲିଆସିଛନ୍ତି ଛେଣ୍ଡିପଦା ସାପୋଇସାହି ଅଞ୍ଚଳକୁ। ମୂଲ ମଜୁରି ଲାଗି ଯାହା ଆଣୁଥିଲେ ସ୍ତ୍ରୀଙ୍କ ସହ ଦୁଇମୁଠା ଖାଇ ଗଛମୂଳେ ଜରିପାଲ ତଳେ ରହିଯାଉଥିଲେ। ସରକାରଙ୍କ ପକ୍ଷରୁ ରାଶନ ଚାଉଳ ବ୍ୟତୀତ ଆଉ କିଛି ସହାୟତା ମିଳୁ ନ ଥିଲା ତାଙ୍କୁ। ହେଲେ ସ୍ତ୍ରୀଙ୍କ ମୃତ୍ୟୁ ଓ ବାର୍ଦ୍ଧକ୍ୟଜନିତ ରୋଗ ତାଙ୍କୁ ସମ୍ପୂର୍ଣ୍ଣ ଅସହାୟ କରିଦେଇଛି। ଠିକ୍ରେ ଆଉ ଚଲାବୁଲା କରିପାରୁ ନ ଥିବାରୁ ଅନାହାରରେ ରହିବାକୁ ବାଧ୍ୟ ହେଉଛନ୍ତି କାର୍ତ୍ତିକା। ତେବେ ଏ ସମ୍ପର୍କରେ ଜାଣିବା ପରେ ବସ୍ ଚାଳକ ସୀତାରାମ ସାହୁ ରବିବାର ତାଙ୍କ ନିକଟରେ ପହଞ୍ଚି ଦୁଃଖ ବୁଝିବା ସହ କିଛି ଖାଇବାକୁ ଦେଇଥିଲେ। ପରେ ଏ ସମ୍ପର୍କରେ ସ୍ଥାନୀୟ ଲୋକଙ୍କୁ କହିବା ସହ ପ୍ରଶାସନକୁ ଖବର ଦେଇଥିଲେ। କାର୍ତ୍ତିକାଙ୍କ ଆଶୁଚିକିତ୍ସା ନିମନ୍ତେ ଛେଣ୍ଡିପଦା ଗୋଷ୍ଠୀ ଉନ୍ନୟନ ଅଧିକାରୀ ଓ ଅନୁଗୋଳ ଉପ ଜିଲାପାଳ ବଇତୁରା ଦୀପଙ୍କୁ ଯୋଗାଯୋଗ କରିଥିଲେ। ଉପଜିଲାପାଳ ବଇତୁରା ଦୀପ ତୁରନ୍ତ ଛେଣ୍ଡିପଦା ତହସିଲଦାରଙ୍କ ସହିତ ଆଲୋଚନା କରି ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଖବର ପାଇ ଛେଣ୍ଡିପଦା ସରପଞ୍ଚ ସୁଦୀପ୍ତ କୁମାର ପ୍ରଧାନଙ୍କ ପରାମର୍ଶ କ୍ରମେ ସ୍ଥାନୀୟ ଲୋକମାନେ କାର୍ତ୍ତିକାଙ୍କୁ ଉଦ୍ଧାର କରି ଛେଣ୍ଡିପଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିବା ସହିତ ଚିକିତ୍ସା କରିଛନ୍ତି।
