ବାରିପଦା ଅଫିସ/ ସାରସକଣା,୧୨ା୨: ମୟୂରଭଞ୍ଜ ଜିଲା ସାରସକଣା ବ୍ଲକ ୫୬ନଂ. ଜୋନ ଜିଲାପରିଷଦ ଉପନିର୍ବାଚନରେ ବିଜେଡି ପ୍ରାର୍ଥୀ ତୁଷାରେନ୍ଦୁ ମହାନ୍ତ ବାଜିମାତ କରିଛନ୍ତି। ସେ ତାଙ୍କ ନିକଟତମ ପ୍ରତିଦ୍ୱନ୍ଦୀ ଭାଜପାର ବଂଶୀଧର ବେରାଙ୍କଠାରୁ ୧୦ହଜାର ୪୨୮ଖଣ୍ଡ ଭୋଟ ଅଧିକ ପାଇ ବିଜୟୀ ହୋଇଛନ୍ତି। ତୁଷାରେନ୍ଦୁ ମୋଟ ୧୫୩୫୧ ଭୋଟ ପାଇଥିତ୍ବା ବେଳେ ବଂଶୀଧରଙ୍କୁ ୪୯୨୩ ଖଣ୍ଡ ଭୋଟ ମିଳିଛି। ସେହିପରି ସ୍ବାଧୀନ ପ୍ରାର୍ଥୀ ବିଶ୍ୱନାଥ ମହାନ୍ତ ୨୪୩୦, ଜେଏମ୍ଏମ୍ର ପ୍ରଦୀପ୍ତ କୁମାର ମହାନ୍ତ ୧୧୬୩, କଂଗ୍ରେସର ଚିତ୍ତ ବିକାଶ ମହାପାତ୍ର ୬୧୮ ଭୋଟ ପାଇଥିବା ବେଳେ ୯୨୯ ଭୋଟ ନାକଚ ହୋଇଥିବା ବ୍ଲକ ପ୍ରଶାସନ ସୂଚନା ଦେଇଛି। ପୂର୍ବାହ୍ନରେ ଭୋଟ ବାକ୍ସଗୁଡ଼ିକ ଷ୍ଟ୍ରଙ୍ଗ ରୁମରୁ ଅଣାଯାଇ କୋଭିଡ୍ ନିୟମ ଅନୁଯାୟୀ ଗଣତି କାର୍ଯ୍ୟ ଆରମ୍ଭ କରାଯାଇଥିଲା। ଇଭିଏମ୍ ପରିବର୍ତ୍ତେ ବାଲଟ ପେପରରେ ଭୋଟ ଗ୍ରହଣ ହୋଇଥିବାରୁ ଗଣତି ବିଳମ୍ବ ହୋଇଥିଲା। ଗଣତି ଶେଷ ପରେ ବିଜୟୀ ପ୍ରାର୍ଥୀଙ୍କ ସମର୍ଥକମାନେ ଉତ୍ସବ ମନାଇଥିବା ଦେଖିବାକୁ ମିଳିଥିଲା। ଉଲ୍ଲେଖଯୋଗ୍ୟ, ଏହି ଜୋନର ଜିଲା ପରିଷଦ ସଦସ୍ୟ ଭୁବନେଶ୍ୱର ମହାନ୍ତଙ୍କ ମୃତ୍ୟୁ ପରେ ଗତ ୧୧ ତାରିଖରେ ଉପ ନିର୍ବାଚନ ଅନୁଷ୍ଠିତ ହୋଇଥିଲା। ବିଜେଡି ପକ୍ଷରୁ ସ୍ବର୍ଗତ ମହାନ୍ତଙ୍କ ପୁତ୍ର ତୁଷାରେନ୍ଦୁଙ୍କୁ ପ୍ରାର୍ଥୀ କରାଯାଇଥିଲା।
