କେନ୍ଦୁଝର, ୫ା୧୧(ସ୍ବ.ପ୍ର.)-କେନ୍ଦୁଝର ଜିଲାର ଗ୍ରାମାଞ୍ଚଳରେ ପାନୀୟ ଜଳ ସମସ୍ୟା ଯୋଗୁ ଲୋକ ମାନେ ବହୁ ଅସୁବିଧା ଭୋଗୁଛନ୍ତି। ଏଭଳି ଜିଲା ମୁଖ୍ୟାଳୟ ତଥା ଆଖପାଖ ଗ୍ରାମରେ ସମସ୍ୟା ଦେଖାଦେଉଥିଲେ ହେଁ ସମାଧାନ ହୋଇ ପାରୁ ନ ଥିବାରୁ ଅସନ୍ତୋଷ ପ୍ରକାଶ ପାଉଛି।
କେନ୍ଦୁଝର ସହରକୁ ଲାଗି ଥିବା ମଣ୍ଡୁଆ ପଞ୍ଚାୟତର ଗୋବିନ୍ଦପୁର ଗ୍ରାମରେ ପାନୀୟ ଜଳ ସମସ୍ୟା ଦୂର କରିବା ପାଇଁ ସୋଲାର ଜଳଯୋଗାଣ ପ୍ରକଳ୍ପ ବସା ଯାଇଛି। ନଳକୂପରୁ ପମ୍ପ ଦ୍ୱାରା ଭୂତ୍ତଳ ଜଳ ଉଠାଯାଇ ଓଭରହେଡ ଟାଙ୍କିକୁ ବୁହାଯାଏ। ସେଠାରୁ ଷ୍ଟାଣ୍ଡ ପଏଣ୍ଟକୁ ପାଣି ଛଡାଯାଇଥାଏ। ବିଦ୍ୟୁତ୍ ସମସ୍ୟାକୁ ମୁକାବିଲା କରିବା ପାଇଁ ସୋଲାର ସିଷ୍ଟମରେ ପାଣି ଉଠାଯାଇଥାଏ। କିନ୍ତୁ ସୋଲାର ପ୍ଲେଟ ଠିକ ଭାବରେ ସୂର୍ଯ୍ୟାଲୋକ ଗ୍ରହଣ କରି ବିଦ୍ୟୁତ ସୃଷ୍ଟି କରିପାରୁ ନ ଥିବାରୁ ଜଳଯୋଗାଣ ବ୍ୟାହତ ହେଉଛି। ଉକ୍ତ ପ୍ରକଳ୍ପ ଉପରେ ଶତାଧିକ ପରିବାର ନିର୍ଭରଶୀଳ। ଦିନ ୧୦/୧୧ ଟାରେ ସୋଲାର ପ୍ୟାନେଲ ଗରମ ହେଲେ ସିଷ୍ଟମ କାର୍ଯ୍ୟ କରିଥାଏ ଓ ପାଣି ବାହାରିଥାଏ। ସୋଲାର ପ୍ୟାନେଲ ବଦଳା ଯାଉନାହିଁ କିମ୍ବା ସଜଡା ଯାଉନାହିଁ। ଏଣୁ ଲୋକ ମାନଙ୍କୁ ଘଣ୍ଟା ଘଣ୍ଟା ଧରି ଷ୍ଟାଣ୍ଡ ପଏଣ୍ଟ ପାଖରେ ପାଣି ପାଇଁ ଅପେକ୍ଷା କରିବାକୁ ପଡୁଛି। ନଚେତ ହ୍ୟାଣ୍ଡପମ୍ପରୁ ପାଣି ବାହାର କରିବାକୁ ପଡୁଛି। ଅନେକ ସମୟରେ ପାଣି ବାହାରିଲେ ଭିଡ ଜମିଥାଏ ଏବଂ ପାଣିପାଇଁ ଝଗଡ଼ା ହୋଇଥାଏ ବୋଲି ସ୍ଥାନୀୟ ଓ୍ବାର୍ଡ ମେମ୍ବର କୌଶଲ୍ୟା ଦେହୁରୀ କହିଛନ୍ତି। ମେଘୁଆ ପାଗ ହେଲେ ବା ବର୍ଷା ଦିନରେ ପାଣି ସମସ୍ୟା ନ କହିବା ଭଲ ବୋଲି ଗ୍ରାମବାସୀ କହିଛନ୍ତି। ପାଇପ ଦ୍ୱାରା ଜଳ ଯୋଗାଣ ବ୍ୟବସ୍ଥା ନାହିଁ। ସେହିପରି କେତେବେଳେ ତାର ଚୋରି ତ କେତେବେଳେ ଟ୍ୟାପ ଚୋରି ଯୋଗୁ ଜଳ ଯୋଗାଣରେ ସମସ୍ୟା ଦେଖାଦେଇଥାଏ। ଅଭିଯୋଗ କଲେ ପଞ୍ଚାୟତରୁ ଆସି ସଜାଡ଼ୁଛନ୍ତି କିନ୍ତୁ ସମସ୍ୟାର ସ୍ଥାୟୀ ସମାଧାନ ହେଉନାହିଁ। ୪ଟି ଟ୍ୟାପ୍ରୁ ଗୋଟିଏ କାମ କରୁଛି ବୋଲି କହିଛନ୍ତି। ଅନେକ ସ୍ଥାନରେ ସୋଲାର ପ୍ୟାନେଲ, ପାଇପ୍ ଆଦି ଖରାପ ହୋଇଯାଉଥିବା ବେଳେ ପମ୍ପ ଖରାପ ହୋଉଥିବାରୁ ଜଳ ଯୋଗାଣ ବ୍ୟାହତ ହେଉଛି। ତେବେ ଦିନ ଦିନ ଧରି ସଜଡା ଯାଉନଥିବାରୁ ଲୋକ ମାନେ ବହୁ ଅସୁବିଧା ଭୋଗୁଛନ୍ତି। ଏଣୁ ଏ ଦିଗରେ ଜଳ ଯୋଗାଣ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି।
