ପୁରୀ,୨୭।୬(ଅଜିତ୍ ମହାନ୍ତି)ମହାପ୍ରଭୁଙ୍କ ବିଶ୍ୱ ପ୍ରସିଦ୍ଧ ରଥଯାତ୍ରାକୁ ଆଉ ମାତ୍ର ୧୦ ଦିନ ରହିଛି। ସେଥିପାଇଁ ରଥ ନିର୍ମାଣ କାର୍ଯ୍ୟ ଜୋରସୋର୍ରେ ଚାଲିଛି। ହେଲେ ରକ୍ଷଣାବେକ୍ଷଣ ଅଭାବରୁ ରଥ ଉପରେ ସ୍ଥାନ ପାଉଥିବା ସାରଥି ଓ ରଥ ୪ ପଟେ ଲାଗୁଥିବା ପାର୍ଶ୍ୱ ଦେବଦେବୀ, ସଖୀଙ୍କ ମୂର୍ତ୍ତି ଉଇ ଖାଇଗଲାଣି। ପୂର୍ବରୁ ସାରଥିମାନଙ୍କୁ ଦୋଳବେଦି ପରିସରରେ ସୁରକ୍ଷିତ ଭାବେ ରଖାଯାଉଥିବାବେଳେ ପରିକ୍ରମା ପ୍ରକଳ୍ପ ନିର୍ମାଣ ପରେ ବେଘର ହୋଇଛନ୍ତି ସାରଥି ଓ ପାଶର୍ବଦେବଦେବୀ। ବ୍ରହ୍ମଦାରୁଙ୍କ ସାରଥି ଏବେ ବାଗେଡ଼ିଆ ଧର୍ମଶାଳା ସନ୍ନିକଟ ପାର୍କିଂସ୍ଥଳର ଏକ ସ୍ଥାନରେ ଧୂଳିଧୂସରିତ ଅବସ୍ଥାରେ ରହିଛନ୍ତି। ଅବ୍ୟବସ୍ଥା ଭିତରେ ଅପରିଷ୍କାର ହୋଇ ଏହି ସାରଥି ରହିଥିବା ବେଳେ ନିକଟରେ ଅଳିଆ ପଡ଼ିରହିଛି, ଯାହାକୁ ନେଇ ଭକ୍ତଙ୍କଠାରୁ ଆରମ୍ଭ କରି ରୂପକାର ସେବକମାନେ ଅସନ୍ତୋଷ ବ୍ୟକ୍ତ କରିଛନ୍ତି।
ପ୍ରତ୍ୟେକ ନବକଳେବର ସମୟରେ ରୂପକାର ସେବକମାନେ ରଥରେ ସ୍ଥାନ ପାଉଥିବା ସାରଥୀ, ଅର୍ଶ୍ୱ ଏବଂ ପାର୍ଶ୍ୱ ଦେବଦେବୀ ମୂର୍ତ୍ତିଗୁଡ଼ିକୁ ନିର୍ମାଣ କରିଥାନ୍ତି। ପ୍ରତିବର୍ଷ ରଥ ନିିର୍ମାଣ ସରିବା ପରେ ରଥଯାତ୍ରା ପୂର୍ବଦିନ ଭୋଇ ସେବକମାନେ ସାରଥୀମାନଙ୍କୁ ଆଣି ରଥରେ ରଥାରୂଢ କରିଥାନ୍ତି। ରଥଯାତ୍ରା ସମ୍ପନ୍ନ ହୋଇ ନୀଳାଦ୍ରି ବିଜେରେ ଶ୍ରୀବିଗ୍ରହମାନେ ଶ୍ରୀମନ୍ଦିରକୁ ବାହୁଡ଼ ଯିବାପରେ ଭୋଇ ସେବକମାନେ ରଥରୁ ସାରଥିମାନଙ୍କୁ କାଢି ସୁରକ୍ଷିତ ଭାବେ ରଖିଥାନ୍ତି। ରଥଯାତ୍ରା ପରେ ରଥଗୁଡ଼ିକୁ ଭଙ୍ଗାଯାଇଥାଏ। ମାତ୍ର ରଥରେ ଲାଗିଥିବା ସାରଥି, ଠେକରା ବାଡା, ଓଲଟ ଶୁଆ, ଘୋଡା ଆଦି ଭଙ୍ଗା ନ ଯାଇ ରଖାଯାଇଥାଏ। ପ୍ରତ୍ୟେକ ନବକେଳବର ସମୟରେ ମହାପ୍ରଭୁ ପାତାଳୀ ହେବା ସହ ଘୋଡ଼ା, ସାରଥି ଆଦିକୁ ମଧ୍ୟ ପାତାଳି କରାଯାଇଥାଏ।
ଏନେଇ ବଳଭଦ୍ର ରଥର ରୂପକାର ସେବକ ପଞ୍ଚାନନ ମହାପାତ୍ର ଓ ରୂପକାର ସେବକ ରାଜେନ୍ଦ୍ର ମହାପାତ୍ର କହିଛନ୍ତି, ପୂର୍ବରୁ ସାରଥି, ଘୋଡ଼ା, ପାର୍ଶ୍ୱ ଦେବଦେବୀ, ସଖୀ ଆଦିଙ୍କୁ ପୂଜା କରାଯାଉଥିଲା। ଶ୍ରୀମନ୍ଦିର ଭିତରେ ଏମାନଙ୍କୁ ରଖାଯିବା ସହ ଖଇକୋରା ଭୋଗ ପ୍ରତ୍ୟେକ ଦିନ ଲଗାଯାଉଥିଲା। କାଳକ୍ରମେ ସମସ୍ତଙ୍କୁ ଶ୍ରୀମନ୍ଦିର ବାହାରେ ଆଣି ଦୋଳବେଦୀ ପରିସରରେ ରଖାଗଲା। ପରିକ୍ରମା ପ୍ରକଳ୍ପ ସମୟରେ ସମସ୍ତଙ୍କୁ ପୁଣି ସ୍ଥାନାନ୍ତର କରାଯାଇ ସୁରକ୍ଷିତ ଭାବେ ରଖାଗଲା ନାହିଁ। ଫଳରେ ଅନେକ ସଖୀରେ ଉଇ ଲାଗି ନଷ୍ଟ ହୋଇ ଗଲେଣି। ପ୍ରତ୍ୟେକ ନବକଳେବରରେ ସାରଥି, ପାର୍ଶ୍ୱ ଦେବଦେବୀ, ଘୋଡ଼ା, କଳସ ଆଦି ନୂତନ ଭାବରେ ନିର୍ମାଣ କରାଯାଇଥାଏ। ସେହିପରି ନବକଳେବର ପରବର୍ଷ ସଖୀମାନଙ୍କୁ ନିର୍ମାଣ କରାଯାଇଥାଏ। ତେବେ ବର୍ତ୍ତମାନ ଯେଉଁ ସଖୀଗୁଡ଼ିକ ଅଛି, ସେଗୁଡିକ ୧୯୯୬ ପୂର୍ବରୁ ହୋଇଥିବା ନବଳେବର ସମୟରେ ନିର୍ମାଣ କରାଯାଇଥିଲା। ଇତିମଧ୍ୟରେ ୧୯୯୬ ଓ ୨୦୧୫ରେ ଦୁଇଟି ନବଳେବର ଯାଇଥିଲେ ମଧ୍ୟ ନୂତନ ଭାବରେ ସଖୀ ନିର୍ମାଣ ହୋଇନାହିଁ। ୨୦୧୬ରେ ସଖୀ ନିର୍ମାଣ ନେଇ ରୂପକାର ସେବକମାନେ ଶ୍ରୀମନ୍ଦିର ପ୍ରଶାସନ ସହ ଆଲୋଚନା କରାଯାଇଥିଲା। ପ୍ରଶାସନ ମଧ୍ୟ କରିବା ପାଇ ଅନୁମତି ଦେଇଥିଲେ। ମାତ୍ର ମୁଖ୍ୟ ପ୍ରଶାସକ ପରିବର୍ତ୍ତନ ହେବା ପରେ ଏନେଇ ଆଉ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଇ ନ ଥିଲା। ତେବେ ନିଯୋଗ ପକ୍ଷରୁ ସମସ୍ତ ସାରଥି, ପାର୍ଶ୍ୱଦେବଦେବୀ, ସଖୀ, ଘୋଡ଼ାଙ୍କୁ ସୁରକ୍ଷିତ ସ୍ଥାନରେ ରଖିବା ନିମନ୍ତେ ପ୍ରଶାସନକୁ ଦାବିପତ୍ର ଦିଆଯାଇ ଆସିଥିଲା। ମାତ୍ର ପ୍ରଶାସନ ଏଥିପ୍ରତି ଦୃଷ୍ଟି ଦେଉ ନ ଥିଲେ। ବର୍ତ୍ତମାନ ସଖୀଗୁଡିକରେ ଉଇ ଲାଗି ଗଲାଣି। ପ୍ରତ୍ୟେକ ରଥରେ ୧୦ ଗୋଟି ସଖୀ ଲଗାଯାଏ। ହେଲେ ଏବେ ପ୍ରତ୍ୟେକ ରଥର ୩ରୁ ୪ ଗୋଟି ସଖୀ ନଷ୍ଟ ହୋଇ ଯାଇଛନ୍ତି। ନଷ୍ଟ ସଖୀଗୁଡ଼ିକ ରଥରେ ଲାଗିବ ନାହି। ତେଣୁ ପ୍ରଶାସନ ଶ୍ରୀମନ୍ଦିର ପରିସରରେ ସାରଥି, ସଖୀ, ପାର୍ଶ୍ୱଦେବଦେବୀ, ଘୋଡ଼ାଙ୍କ ରଖିବା ନିମନ୍ତେ ବ୍ୟବସ୍ଥା କରନ୍ତୁ ବୋଲି ରୂପକାର ସେବକମାନେ କହିଛନ୍ତି।
