ଭୁବନେଶ୍ୱର,୧୭।୨(ବ୍ୟୁରୋ): ଖୁବ୍ଶୀଘ୍ର ଦେଶରେ ଜି-୨୦ ସମ୍ମିଳନୀ ଆୟୋଜନ ହେବ। ଏହି ପରିପ୍ରେକ୍ଷୀରେ ଆସନ୍ତା ଏପ୍ରିଲ ୨୪ରୁ ୨୬ ଏବଂ ମେ’ ୧୫ରୁ ୧୭ ତାରିଖ ମଧ୍ୟରେ ବିଦେଶୀ ପ୍ରତିନିଧି ଦଳ ଓଡ଼ିିଶା ଆସିବେ। ସେମାନେ ଭୁବନେଶ୍ୱର, ବ୍ରହ୍ମପୁର, ଖଣ୍ଡିଗିରି ଅଞ୍ଚଳ ପରିଦର୍ଶନ କରିବେ। ଏଥିପାଇଁ ବିଡିଏ ପକ୍ଷରୁ ଏବେଠାରୁ ପ୍ରସ୍ତୁତି ଆରମ୍ଭ ହୋଇଛି। ଏହି କ୍ରମରେ ବିଡିଏ, ବିଏମ୍ସି, ସ୍ମାର୍ଟସିଟି, ଏନ୍ଏଚ୍ଆଇର ମିଳିତ ଟିମ୍ ରସୁଲଗଡ଼ରୁ ଖଣ୍ଡଗିରି ପର୍ଯ୍ୟନ୍ତ ଉଭୟ ପାର୍ଶ୍ୱ ରାସ୍ତାର ଉନ୍ନତୀକରଣ ପାଇଁ ଗତ ୧୧ ତାରିଖରେ ପରିଦର୍ଶନ କରିଥିଲେ। ସମ୍ପୃକ୍ତ ଅଞ୍ଚଳରେ ଅଧିକାଂଶ ସ୍ଥାନ ଜବରଦଖଲରେ ଥିବାରୁ ଉଦ୍ବେଗ ପ୍ରକାଶ କରିବା ସହ ଏହାକୁ ଉଚ୍ଛେଦ କରିବା ପାଇଁ ଗୁରୁବାର ଆୟୋଜିତ ବୈଠକରେ ଏସ୍ଓପି ଜାରି କରାଯାଇଛି। ଏଥିସହ ସମ୍ପୃକ୍ତ ଅଞ୍ଚଳର କିପରି ବିକାଶ କରାଯିବ ସେ ନେଇ ମଧ୍ୟ ନକ୍ସା ପ୍ରସ୍ତୁତ ହୋଇଛି। ଖୁବ୍ଶୀଘ୍ର କାଳୀ ମନ୍ଦିରଠାରୁ ଖଣ୍ଡଗିରି ଛକ ପର୍ଯ୍ୟନ୍ତ ବାମପାର୍ଶ୍ୱ ରାସ୍ତା ୫୦ମିଟର ଯାଏ ଅଞ୍ଚଳକୁ ନିଜ ଅକ୍ତିଆରକୁ ଆଣିବା ସହ ସେହି ଜାଗାରେ ସୌନ୍ଦର୍ଯ୍ୟକରଣ କରାଯିବ। ଏହି ରାସ୍ତା ପାର୍ଶ୍ୱରେ ଅଧିକାଂଶ ବସ ପାର୍କିଂ ହେଉଥିବାବେଳେ କେତେକ ନର୍ସରି ମଧ୍ୟ ଗଢ଼ିଉଠିଛି। ସେଗୁଡିକୁ ସେଠାରୁ ହଟାଇବା ସହ ସର୍ଭିସ ରୋଡ ନିର୍ମାଣ କରାଯିବ। ସେହିପରି ଜୟଦେବ ବିହାର ଛକରୁ ଫାୟାର ଷ୍ଟେଶନ ଛକ ପର୍ଯ୍ୟନ୍ତ ଦୁଇପାର୍ଶ୍ୱ ରାସ୍ତା ମଧ୍ୟ ସୌନ୍ଦର୍ଯ୍ୟକରଣ କରାଯିବ। ସିଆର୍ପି ଛକରେ ଥିବା ଜନଜାତି ମ୍ୟୁଜିୟମ ଠାରୁ ଫାୟାରଷ୍ଟେଶନ ପର୍ଯ୍ୟନ୍ତ ବାମପାର୍ଶ୍ୱରେ ହେଉଥିବା କାର ପାର୍କିଂକୁ ହଟାଯାଇ ସୌନ୍ଦର୍ଯ୍ୟକରଣ କରାଯିବ। ଏହାସହ ବଳକା ଜାଗାକୁ ଭବିଷ୍ୟତ ପାଇଁ ବିଡିଏ ନିଜ ଅକ୍ତିଆରରେ ରଖିବ। ସେହିପରି ସତ୍ସଙ୍ଗ ବିହାରସ୍ଥିତ ଶ୍ୟାମାପ୍ରସାଦ ମୁଖାର୍ଜୀ ପାର୍କ ସମ୍ମୁଖ ରାସ୍ତାକୁ ଜବରଦଖଲ ହଟାଯାଇ ସେହି ଜାଗାରେ ବିଡିଏ ପକ୍ଷରୁ ସୌନ୍ଦର୍ଯ୍ୟକରଣ କରାଯିବ। କେବଳ ରାସ୍ତାପାର୍ଶ୍ୱ ସୌନ୍ଦର୍ଯ୍ୟକରଣ ନୁହେଁ ବରଂ ଓଭରବ୍ରିଜ ତଳେ ଖାଲି ସ୍ଥାନକୁ ମଧ୍ୟ ସୌନ୍ଦର୍ଯ୍ୟକରଣ କରାଯିବ। ଏଥିସହ ଲଳିତକଳା ଏକାଡେମୀ ପକ୍ଷରୁ ସ୍ଥାପତ୍ୟ ଚିତ୍ରକଳା ଅଙ୍କାଯିବ। ସେହିଭଳି ଫୁଟପାଥ ରାସ୍ତା ସମେତ ଫ୍ଲାଏ-ଓଭର କାନ୍ଥକୁ ଚିକ୍କଣ କରାଯିବ। ଏବଂ ଜାତୀୟ ରାଜପଥ କଡରେ ଲାଗିଥିବା ହାଇମାଷ୍ଟ ଲାଇଟଗୁଡିକୁ ମରାମତି କରିବାକୁ ନିର୍ଦ୍ଦେଶ ଦିଆଯାଇଛି। ଏହି ବୈଠକରେ ବିଡିଏ ଉପାଧ୍ୟକ୍ଷ ବଲୱନ୍ତ ସିଂ, ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେ, ବିଡିଏ ଅତିରିକ୍ତ କମିଶନର ହରିଶ ଚନ୍ଦ୍ର ନାୟକ, ଏନ୍ଏଚ୍ଏଆଇ ଭୁବନେଶ୍ୱର ପ୍ରକଳ୍ପ ନିର୍ଦ୍ଦେଶକ ପି.କେ.ସିଂ, ଢେଙ୍କାନାଳ ପ୍ରକଳ୍ପ ଅଧିକାରୀ ସଞ୍ଜୟ ଜେନା, ଓଏମ୍ସି ଇଡି ସୁଧାଂଶୁ ଖୋରା, ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ର ଜେନେରାଲ ମ୍ୟାନେଜର ମନୋରଞ୍ଜନ ସାହୁଙ୍କ ସମେତ ଅନ୍ୟ ବିଭାଗର ଅଧିକାରୀ ଉପସ୍ଥିତ ଥିଲେ।
