ଭୁବନେଶ୍ୱର, ୭।୨(ବ୍ୟୁରୋ): ରାଜ୍ୟରେ ଦ୍ୱିତୀୟ ପର୍ଯ୍ୟାୟ ଟିକାକରଣ ଶନିବାରଠାରୁ ଆରମ୍ଭ ହୋଇଛି। ଏହି ପର୍ଯ୍ୟାୟରେ ସମ୍ମୁଖ ଯୋଦ୍ଧାଙ୍କୁ ଟିକା ଦିଆଯାଉଛି। ପ୍ରଥମ ଦିନରେ ଟିକାକରଣରେ ରାଜ୍ୟର ବରିଷ୍ଠ ପ୍ରଶାସନିକ ଅଧିକାରୀ ସାମିଲ ହୋଇଛନ୍ତି। କେତେକ ଜିଲାପାଳ, ଏଡିଏମ୍, ଏସ୍ପି ଓ ଅନ୍ୟ ଜିଲାସ୍ତରୀୟ ଅଧିକାରୀ ଟିକା ନେବା ସହ ଅନ୍ୟ କୋଭିଡ୍ ଯୋଦ୍ଧାଙ୍କୁ ପ୍ରୋତ୍ସାହିତ କରିଛନ୍ତି। ଆଉ କେତେକ ସ୍ଥାନରେ ଜନପ୍ରତିନିଧିମାନେ ଟିକା ନେଇଥିବା ସୂଚନା ମିଳିଛି।
ଶନିବାର ୪୮,୪୪୬ ଜଣଙ୍କୁ ଟିକା ପ୍ରଦାନ ପାଇଁ ଲକ୍ଷ୍ୟ ରଖାଯାଇଥିବାବେଳେ ୮୧.୩% ଅର୍ଥାତ୍ ୩୯,୩୭୫ଜଣ ଟିକା ନେଇଛନ୍ତି। ୪୩୦ଟି ସେସନରେ ଏହି ଟିକାକରଣ ହୋଇଥିଲା। ଭୁବନେଶ୍ୱରରେ ୧୦୯.୬% ଟିକାକରଣ ହୋଇଛି। ଏଠାରେ ୧୦ଟି ସେସନରେ ୧,୧୬୦ଜଣଙ୍କୁ ଟିକା ଦେବାର ଲକ୍ଷ୍ୟ ରଖାଯାଇଥିଲେ ମଧ୍ୟ ୧,୨୭୧ଜଣ ଟିକା ନେଇଥିବା ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ସୂଚନା ଦିଆଯାଇଛି। ସେହିପରି ରାଜ୍ୟର ୧୦ ଜିଲାରେ ଧାର୍ଯ୍ୟ ଲକ୍ଷ୍ୟଠାରୁ ଅଧିକ ଟିକାକରଣ ହୋଇଛି। ରାୟଗଡ଼ାରେ ସର୍ବାଧିକ ୧୭୩.୭% ଟିକାକରଣ ହୋଇଥିବାବେଳେ କୋରାପୁଟରେ ୧୪୦.୫%, ଭଦ୍ରକ ୧୩୬.୩%, ଦେବଗଡ଼ ୧୨୪.୯%, ଯାଜପୁର ୧୧୯.୨%, ନୂଆପଡ଼ା ୧୧୬.୭%, କଟକ ୧୧୬%, ବରଗଡ଼ ୧୦୬%, ପୁରୀ ୧୦୪.୬%, ନବରଙ୍ଗପୁର ୧୦୧.୯% ଟିକାକରଣ ହୋଇଛି। ଗଜପତି ଜିଲାରେ ସର୍ବନିମ୍ନ ୩୩.୧% ଟିକାକରଣ ହୋଇଛି। ଏହି ଜିଲାରେ ୧,୦୨୧ଜଣଙ୍କୁ ଟିକା ଦିଆଯିବାର କାର୍ଯ୍ୟକ୍ରମ ରହିଥିବାବେଳେ ମାତ୍ର ୩୩୮ଜଣ ଟିକା ନେଇଛନ୍ତି। ୧୬,୩୮୯ଜଣ ହେଲ୍ଥ କେୟାର ଓ୍ବାର୍କର ଓ ୨୨,୯୮୬ଜଣ ଫ୍ରଣ୍ଟ ଲାଇନ ଓ୍ବାର୍କର ଟିକା ନେଇଛନ୍ତି। ତେବେ ରାଜ୍ୟରେ ଏ ପର୍ଯ୍ୟନ୍ତ ୨,୫୨,୦୬୯ଜଣ ହେଲ୍ଥ କେୟାର ଓ୍ବାର୍କର ଓ ୨୨,୯୮୬ଜଣ ଫ୍ରଣ୍ଟ ଲାଇନ ଓ୍ବାର୍କର ଟିକା ନେଇଥିବା ବିଭାଗୀୟ ତଥ୍ୟରୁ ଜଣାପଡିଛି।
