ବିଦ୍ୟାଳୟ ମିଶ୍ରଣ ସମସ୍ୟା ଏବେ ବି ତୁଟିନି
11:45 amOctober 11, 2023October 11, 2023 / 09

କେନ୍ଦ୍ରାପଡ଼ା, ୧୧।୧୦(ଜଗନ୍ନାଥ ଧଳ): ପୂର୍ବରୁ ବିଦ୍ୟାଳୟ ମିଶ୍ରଣ ପ୍ରସଙ୍ଗ ପୁଣି ଥରେ ଆଗକୁ ଆସିଛି। ଶିକ୍ଷା ବିଭାଗର ଏହି ନିଷ୍ପତ୍ତି ଅଭିଭାବକଙ୍କ ଅସନ୍ତୋଷର କାରଣ ହୋଇଥିବା ବେଳେ ସମାଧାନ ପ୍ରତିଶ୍ରୁତି ସ୍ଥାନୀୟ ଲୋକ ପ୍ରତିନିଧି ଦେଇପାରୁନାହାନ୍ତି। ଜିଲାର ୨୧୭ଟି ସ୍କୁଲରେ କମ ଶିକ୍ଷାର୍ଥୀ ଥିବା ଦର୍ଶାଇ ୨୦୨୦ରେ ନିକଟସ୍ଥ ଅନ୍ୟ ସ୍କୁଲରେ ମିଶ୍ରଣ କରାଯାଇଛି। ତତ୍କାଳୀନ ସମୟରେ ଏହି ମିଶ୍ରଣକୁ ବିରୋଧ କରି ଜିଲାର ଅଭିଭାବକମାନେ ବହୁବାର ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଛନ୍ତି। ମିଶ୍ରଣ ପ୍ରକ୍ରିୟାକୁ ରୋକିବା ପାଇଁ ସ୍ଥାନୀୟ ସରପଞ୍ଚ ଓ ବିଧାୟକଙ୍କ ଉପରେ ଚାପ ପ୍ରୟୋଗ ହୋଇଥିଲା। ଏହାସତ୍ତ୍ୱେ ଶିକ୍ଷା ବିଭାଗର ନିଷ୍ପତ୍ତିକୁ ବଦଳାଇବା ଲୋକ ପ୍ରତିନିଧିଙ୍କ ପାଇଁ ସମ୍ଭବ ହୋଇ ପାରିନାହିଁ। କୋମଳମତି ପିଲାଙ୍କୁ ଘରଠାରୁ ଦୂର ସ୍କୁଲକୁ ଛାଡ଼ିବାକୁ ଏଯାଏ ଅଭିଭାବକମାନେ ରାଜି ହୋଇନାହାନ୍ତି।
କଂସାର ଗ୍ରାମର ନିରଞ୍ଜନ ପରିଡା କହିଛନ୍ତି, ପ୍ରଥମରୁ ହାଇସ୍କୁଲ ଯାଏ ପିଲାମାନଙ୍କର ବାହାର ଦୁନିଆ ସହିତ ସମ୍ପର୍କ ସାଧାରଣରେ ନ ଥାଏ। ଗ୍ରାମ ନିକଟ ସ୍କୁଲରେ ପାଠ ପଢ଼ିଥାନ୍ତି। ତେବେ କମ ପିଲା ଦର୍ଶାଇ କେନ୍ଦ୍ରାପଡ଼ା ଜିଲାର ୨୧୭ଟି ବିଦ୍ୟାଳୟକୁ ୨ରୁ ୫ କିଲୋମିଟର ପର୍ଯ୍ୟନ୍ତ ଦୂରରେ ଥିବା ସ୍କୁଲରେ ମିଶାଇ ଦିଆଯାଇଛି। ଏଥିରେ ସର୍ବାଧିକ କୋମଳମତି ପିଲାମାନେ ଶିକାର ହୋଇଛନ୍ତି। ଜିଲାର ୩ଟି ହାଇସ୍କୁଲ, ୪ଟି ଉଚ୍ଚ ପ୍ରାଥମିକ ସ୍କୁଲ ଏହି ମିଶ୍ରଣରେ ଥିବା ବେଳେ ୨୧୦ଟି ପ୍ରାଥମିକ ବିଦ୍ୟାଳୟ ଅଛି। ୧୦ ବର୍ଷୀୟ ଶିକ୍ଷାର୍ଥୀମାନେ ସାଧାରଣରେ ଚପଳତାର ଶିକାର ହୋଇଥାନ୍ତି। ରାସ୍ତାରେ ଗାଡ଼ି ମୋଟର ଯାତାୟାତ ସହିତ ବୁଲା ପ୍ରାଣୀ, ପକ୍ଷୀଙ୍କ ଶିକାର ହେବା କୌଣସି ଅପ୍ରାଷଙ୍ଗିକ ନୁହେଁ। ସେହିପରି ଏହି ଜିଲା ନଦୀ ନାଳଭରା ହୋଇଥିବା ବେଳେ ଗମନାଗମନ ପଥ ସୁବିଧା ନାହିଁ। କେଉଁ ଅଭିଭାବକ ନିଜର ପିଲାଙ୍କ ଶିକ୍ଷା ପାଇଁ ଦୁର୍ଘଟଣାରେ ଜୀବନ ନଷ୍ଟ କରିବାକୁ ଦେବ। ମାର୍ଶାଘାଇର ଆଲୋକ କୁମାର ଦାସ କହିଛନ୍ତି, ସ୍କୁଲ ମିଶ୍ରଣର ପ୍ରଭାବ ମାର୍ଶାଘାଇ ସରକାରୀ ବାଳିକା ବିଦ୍ୟାଳୟରେ ଦେଖିବାକୁ ମିଳିଛି। ପୂର୍ବରୁ ଏଠାରେ କେବଳ ବାଳିକାମାନେ ପାଠ ପଢ଼ୁଥିଲେ। ଏବେ ଏହି ସ୍କୁଲରେ ବାଳକମାନେ ପାଠ ପଢ଼ୁଛନ୍ତି। ଏଥିପାଇଁ ବାଳିକା ହାଇସ୍କୁଲକୁ ନୋଡାଲ ହାଇସ୍କୁଲ ଭାବେ ପରିଣତ କରାଯାଇଛି। ଜିଲାର ମିଶ୍ରଣ ହୋଇଥିବା ସ୍କୁଲର ଭିତ୍ତିଭୂମି ରକ୍ଷଣାବେକ୍ଷଣ ଅଭାବରୁ ଶ୍ରୀହୀନ ହେଉଛି। ଏହି ସ୍କୁଲ ଅନ୍ୟ କୌଣସି ଅନୁଷ୍ଠାନରେ ପରିଣତ ହେଲେ ସ୍ଥାନୀୟ ଅଞ୍ଚଳବାସୀଙ୍କ କାର୍ଯ୍ୟରେ ଆସିପାରନ୍ତା। ଏହା ନ ହେଲେ ଏହି ସରକାରୀ ସ୍କୁଲରେ ବିନିଯୋଗ ହୋଇଥିବା ଅର୍ଥ ନଷ୍ଟ ହୋଇଯିବ। ଦେପୁର ଗ୍ରାମର ଜଗଦୀଶ ପତି କହିଛନ୍ତି, ଶିକ୍ଷା ବିଭାଗ ବିଦ୍ୟାଳୟ ମିଶ୍ରଣ ନେଇ ବିଜ୍ଞପ୍ତିରେ ସିଡ୍ୟୁଲ ଏରିଆର ୨୫ଜଣ ଓ ଅଣସିଡ୍ୟୁଲ ଏରିଆର ୨୦ଜଣ ଶିକ୍ଷାର୍ଥୀ କମ୍‌ ଥିଲେ ନିକଟସ୍ଥ ସ୍କୁଲରେ ମିଶ୍ରଣ କରିଛନ୍ତି। ଏହାକୁ ନେଇ ତତ୍କାଳୀନ ସମୟରେ ବହୁ ରାସ୍ତାରୋକୋ ହୋଇଛି। ସରପଞ୍ଚ, ବିଧାୟକଙ୍କ ଦୃଷ୍ଟି ଆକର୍ଷଣ କରାଯିବା ସହିତ ବ୍ଲକ ଓ ଜିଲା ପ୍ରଶାସନ ନିକଟରେ ଅଭିଭାବକ ଦ୍ୱାରସ୍ଥ ହୋଇଛନ୍ତି। ଏଥିରୁ ସୁଫଳ ନ ମିଳିବାରୁ ଆଇନଗତ କାର୍ଯ୍ୟାନୁଷ୍ଠାନ ପାଇଁ କୋର୍ଟକୁ ଯାଇଛନ୍ତି। ତେବେ ଶିକ୍ଷା ବିଭାଗ ସ୍କୁଲ ମିଶ୍ରଣକୁ କୋର୍ଟ ସମର୍ଥନ ଦେବାରୁ ଅଭିଭାବକମାନେ ନିଜର ଅସନ୍ତୋଷ ପ୍ରକାଶ କରିଛନ୍ତି।