ଭୁବନେଶ୍ୱର, ୧୮।୨(ବ୍ୟୁରୋ): ଲିଫ୍ଟ ଦେବା ଆଳରେ ନିଶା ଦେଇ ଲୁଟୁଥିଲେ। ରାଜଧାନୀ ଭୁବନେଶ୍ୱର ସମେତ ବିଭିନ୍ନ ଜିଲାରେ ସକ୍ରିୟ ଥିବା ଏହି ଲୁଟେରା ଗ୍ୟାଙ୍ଗ୍କୁ କମିଶନରେଟ ପୋଲିସ ଧରିଛି। ଗ୍ୟାଙ୍ଗ ୨ଜଣ ସଦସ୍ୟଙ୍କୁ ଶହୀଦନଗର ଥାନା ପୋଲିସ ଓ ସ୍ପେଶାଲ ସ୍କ୍ବାଡ୍ ଗିରଫ କରିବା ସହ ର଼୍ୟାକେଟର ପର୍ଦ୍ଦାଫାଶ କରିଛି। ଗିରଫ ଅଭିଯୁକ୍ତଦ୍ୱୟ ହେଲେ କଟକ ସଦର ଥାନା ଅନ୍ତର୍ଗତ ତେଲେଙ୍ଗାପେଣ୍ଠରେ ରହୁଥିବା କଟକ ଯାଜପୁର ଜିଲା ଟାଉନ ଥାନା ତଳିଆ ଗ୍ରାମର ଦେବେନ୍ଦ୍ର କୁମାର ପରିଡ଼ା ଓ ଭଦ୍ରକ ଜିଲା ଚାନ୍ଦବାଲି ଥାନାଞ୍ଚଳର ବୁଧିରାମ ସ୍ବାଇଁ। ସେମାନଙ୍କଠାରୁ ଗୋଟିଏ କାର, ୪ ମୋବାଇଲ ଫୋନ, ୪୦ ଗ୍ରାମ ସୁନା ଅଳଙ୍କାର, ୫ ହଜାର ଟଙ୍କା ଓ ନିଶା ଟାବ୍ଲେଟ୍ ଜବତ କରାଯାଇଛି। ଉଭୟଙ୍କୁ ଶୁକ୍ରବାର କୋର୍ଟ ଚାଲାଣ କରାଯିବ। ଏହି ଗ୍ୟାଙ୍ଗରେ ଥିବା ଅନ୍ୟ ସଦସ୍ୟଙ୍କୁ ଧରିବାକୁ ଉଦ୍ୟମ କରାଯାଉଥିବା ଡିସିପି ଉମାଶଙ୍କର ଦାଶ ସୂଚନା ଦେଇଛନ୍ତି।
ତାଙ୍କ ସୂଚନାନୁସାରେ, ଏହି ର଼୍ୟାକେଟ କଟକ, ଯାଜପୁର, ବାଲେଶ୍ୱର, ଭୁବନେଶ୍ୱର ଅଞ୍ଚଳରେ ସକ୍ରିୟ ଥିଲେ। ଏମାନେ ପ୍ରାୟତଃ ବସ୍ ଷ୍ଟାଣ୍ଡ୍ରେ ଓହ୍ଲାଇ ଦୁର୍ଗମ ତଥା ଗାଁ ଅଞ୍ଚଳକୁ ଯିବାକୁ ଅପେକ୍ଷା କରିଥିବା ସାଧାରଣ ଲୋକଙ୍କୁ ଟାର୍ଗେଟ କରନ୍ତି। ସେମାନଙ୍କ ସହ ପ୍ରଥମେ ବନ୍ଧୁତା ସ୍ଥାପନ କରି ବିଶ୍ୱାସଭାଜନ ହୁଅନ୍ତି। ପରେ ସେମାନଙ୍କୁ କାରରେ ବସାଇ ଗନ୍ତବ୍ୟ ସ୍ଥଳରେ ଛାଡ଼ିବାକୁ ପ୍ରବର୍ତ୍ତାଇଥାନ୍ତି। ଯାତ୍ରୀଙ୍କୁ ସେମାନେ ଚା, ମୃଦୁ ପାନୀୟ କିମ୍ବା ସ୍ନାକ୍ସରେ ନିଶା ଔଷଧ ମିଶାଇ ଖାଇବାକୁ ଦେଇଥାନ୍ତି। ସେମାନେ ଅଚେତ ହୋଇଯିବା ପରେ ଅଭିଯୁକ୍ତମାନେ ସେମାନଙ୍କଠାରୁ ଲୁଟ୍ କରି ଏକ ଶୂନ୍ଶାନ୍ ସ୍ଥାନରେ ଫିଙ୍ଗି ଦେଇଥାନ୍ତି।
୨୦ ମାମଲାରେ ସମ୍ପୃକ୍ତ
ଅଭିଯୁକ୍ତଦ୍ୱୟ ଭୁବନେଶ୍ୱର ସହରାଞ୍ଚଳ ଜିଲା, କଟକ, ପୁରୀ, ଯାଜପୁର, ଆର୍ପିଏଫ୍ ଓ ଜିଆର୍ପି ଥାନାରେ ଥିବା ସମାନ ପ୍ରକାରର ୨୦ଟି ଲୁଟ୍ ମାମଲାରେ ସମ୍ପୃକ୍ତ ଅଛନ୍ତି। ଗତ ବର୍ଷ ନଭେମ୍ବର ୨୬ରେ କଟକର ଜଣେ ବ୍ୟକ୍ତିଙ୍କୁ ଲିଫ୍ଟ ଦେଇ ନିଶା ଦେଇ ଝିଅ ବିବାହ ପାଇଁ ରଖିଥିବା ମୂଲ୍ୟବାନ ସାମଗ୍ରୀ, ୨ ଲକ୍ଷ ଟଙ୍କା ଓ ସୁନା ଅଳଙ୍କାର ନେଇଯାଇଥିବା ପୋଲିସ ତଦନ୍ତରୁ ଜାଣିବାକୁ ପାଇଛି।
ନିଶା ଔଷଧ ବିକ୍ରି ନ
କରିବାକୁ ନିବେଦନ
ଭୁବନେଶ୍ୱର ସହରାଞ୍ଚଳରେ ଥିବା ସମସ୍ତ ଔଷଧ ଦୋକାନୀଙ୍କୁ କୌଣସି ନିଶା ଔଷଧ ବିକ୍ରି ନ କରିବାରୁ ପୋଲିସ ନିବେଦନ କରିଛି। ତେବେ କୌଣସି ସନ୍ଦେହଜନକ ବ୍ୟକ୍ତି ବିନା କୌଣସି ପ୍ରେସକ୍ରିପସନରେ କିଛି ନିଶା ଔଷଧ ନେବା ପାଇଁ ଚେଷ୍ଠା କଲେ ତୁରନ୍ତ ସ୍ଥାନୀୟ ଥାନା କିମ୍ବା କଣ୍ଟ୍ରୋଲ ରୁମକୁ ଯୋଗଯୋଗ କରିବାକୁ କୁହାଯାଇଛି। ଯଦି କୌଣସି ବ୍ୟକ୍ତି ଏହାକୁ ଅବମାନନା କରନ୍ତି, ତାଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରେସ ବିଜ୍ଞପ୍ତିରେ ସୂଚନା ଦିଆଯାଇଛି।
ଅନ୍ୟପକ୍ଷରେ ରାଜଧାନୀରେ ଏପରି ଅପରାଧର ଶିକାର ନ ହେବା ପାଇଁ ଯାତ୍ରୀମାନଙ୍କୁ ସଚେତନ କରିବା ଉଦ୍ଦେଶ୍ୟରେ ପୋଲିସ ଅଟୋ, ବସ୍ ଓ ଟ୍ୟାକ୍ସିଆସୋସିଏଶନ୍କୁ ଅଭିଯୁକ୍ତଙ୍କ ଫଟୋ ପ୍ରଦାନ କରିବ। ଏଥିସହ ଜନସାଧାରଣଙ୍କୁ ମଧ୍ୟ ସଚେତନ କରାଯିବ ବୋଲି ପୋଲିସ ସୂଚନା ଦେଇଛି।
