ଟୋକିଓ, ୩।୮: ଅଲିମ୍ପିକ୍ସରେ ଜିମ୍ନାଷ୍ଟିକ୍ସ ଏକ ଲୋକପ୍ରିୟ କ୍ରୀଡ଼ା ଭାବେ ଉଭୟ ଆଥଲେଟ ଓ ପ୍ରଶଂସକଙ୍କ ମଧ୍ୟରେ ଆଦୃତ ହୋଇଛି। ଆଧୁନିକ ଜିମ୍ନାଷ୍ଟିକ୍ସ ହେଉଛି ପୁରାତନ ଗ୍ରୀକ୍ ସଭ୍ୟତାର ଅବଦାନ। ଗ୍ରୀକ୍ ଶବ୍ଦ ‘ଜିମ୍ନାଜେନ’ରୁ ଜିମ୍ନାଷ୍ଟିକ୍ସର ନାମକରଣ ହୋଇଛି। ଏହାର ଅର୍ଥ ହେଉଛି ନଗ୍ନ ବ୍ୟାୟାମ। ଅର୍ଥାତ୍ ବ୍ୟାୟାମରୁ ଏହି ଉଚ୍ଚକୋଟୀର କ୍ରୀଡ଼ାର ସୃଷ୍ଟି।
ପୂରା ମାନବ ଇତିହାସରେ ମଣିଷ ଶରୀରର ଦକ୍ଷତା ଓ ସୀମା ବିଷୟରେ ଜାଣିବା ପାଇଁ ପ୍ରୟାସ କରାଯାଇ ଆସୁଛି। ଏଥିପାଇଁ ମଣିଷ ଉଠିବା, ବସିବା, ମୋଡିହେବା, ଲେଉଟିବା ଭଳି ଆଚରଣ କରି ବିଭିନ୍ନ ବ୍ୟାୟାମର ଆରମ୍ଭ କରିଛି। ତେଣୁ ମୌଳିକ ଭାବେ ବ୍ୟାୟାମରୁ ଯେ ଜିମ୍ନାଷ୍ଟିକ୍ସ ସୃଷ୍ଟି ହୋଇଛି, ଏକଥା କହିଲେ ଭୁଲ୍ ହେବ ନାହିଁ। ଜିମ୍ନାଷ୍ଟିକ୍ସର ବିଭିନ୍ନ ଇଭେଣ୍ଟ ମଧ୍ୟ ପରସ୍ପରଠାରୁ ଅଲଗା।
ପୁରୁଷ ଜିମ୍ନାଷ୍ଟମାନେ ୬ଟି ବର୍ଗରେ ପ୍ରତିଯୋଗିତାରେ ଅବତୀର୍ଣ୍ଣ ହେଉଛନ୍ତି। ସେଗୁଡିକ ହେଲ ଫ୍ଲୋର, ଭଲ୍ଟ, ପୋମେଲ ହର୍ସ, ଷ୍ଟିଲ ରିଙ୍ଗ୍ସ, ପାରାଲାଲ ବାର୍ସ ଓ ହରାଇଜଣ୍ଟାଲ ବାର୍ସ। ତେବେ ମହିଳା ଜିମ୍ନାଷ୍ଟମାନେ ୪ଟି ଇଭେଣ୍ଟରେ ଅଂଶଗ୍ରହଣ କରୁଛନ୍ତି। ଫ୍ଲୋର ଓ ଭଲ୍ଟ ସହ ମହିଳାମାନେ ବାଲାନ୍ସ ବିମ୍ ଓ ଅନଇଭିନ ବାର୍ସ ଇଭେଣ୍ଟରେ ଭାଗ ନେଉଛନ୍ତି। ପୁରାତନ ଜିମ୍ନାଷ୍ଟିକ୍ସରେ ରୋପ୍ କ୍ଲାଇମ୍ବିଂ ଭଳି ଇଭେଣ୍ଟ ସାମିଲ ରହିଥିଲା। ସମୟ କ୍ରମେ ଜିମ୍ନାଷ୍ଟିକ୍ସ ଏକ ମର୍ଯ୍ୟାଦାସମ୍ପନ୍ନ କ୍ୱାଲିଟି କ୍ରୀଡ଼ା ଭାବେ ଉଭା ହୋଇଛି। ଅନ୍ୟ କ୍ରୀଡ଼ାଗୁଡ଼ିକଠାରୁ ଏହା ସମ୍ପୂର୍ଣ୍ଣ ଭାବେ ଭିନ୍ନ। ଆଥଲେଟମାନେ ଉଭୟ ଶାରୀରିକ ଓ ମାନସିକ ଭାବେ ସୁସ୍ଥ ରହିବା ସହ କଠିନ ପରିଶ୍ରମ ଓ ଅଭ୍ୟାସ ବଳରେ ଜିମ୍ନାଷ୍ଟିକ୍ସରେ ସଫଳତା ହାସଲ କରିଥାନ୍ତି।
