ନୂଆଦିଲ୍ଳୀ,୨୮।୬(ପି.ଟି.): ଆସନ୍ତାମାସରେ ଆରମ୍ଭ ହେବାକୁ ଯାଉଥିବା ଟୋକିଓ ଅଲିମ୍ପିକ୍ସରେ ଅଂଶଗ୍ରହଣ କରିବା ପାଇଁ ଜାପାନ ଯିବାକୁ ଥିବା ଭାରତୀୟ ଆଥ୍ଲେଟଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମର୍ଥନ ଜଣାଇଛନ୍ତି। ଏହି ଆଥ୍ଲେଟମାନେ ଦୀର୍ଘବର୍ଷ ଧରି ବହୁତ ସଂଘର୍ଷ କରିଛନ୍ତି ଓ ଏହା ପ୍ରଶଂସନୀୟ ବୋଲି ସେ କହିଛନ୍ତି। ଏଥିସହ ଆଥ୍ଲେଟମାନଙ୍କ ଉପରେ ଚାପ ପ୍ରୟୋଗ ନ କରି ସେମାନଙ୍କୁ ସମର୍ଥନ ଦେବାକୁ ‘ମନ୍ କି ବାତ୍’ କାର୍ଯ୍ୟକ୍ରମ ମାଧ୍ୟମରେ ସେ ରବିବାର ସମସ୍ତଙ୍କୁ ନିବେଦନ କରିଛନ୍ତି।
ଜୁଲାଇ ୨୩ରେ ଆରମ୍ଭ ହେବାକୁ ଯାଉଥିବା ଟୋକିଓ ଅଲିମ୍ପିକ୍ସ ପାଇଁ ଏପର୍ଯ୍ୟନ୍ତ ୧୦୦ ଆଥ୍ଲେଟ ଯୋଗ୍ୟତା ହାସଲ କରିସାରିଛନ୍ତି। ୨୦୨୦ରେ ଆୟୋଜିତ ହେବାକୁ ଥିବା ଏହି ମେଗା ଇଭେଣ୍ଟ କୋଭିଡ୍-୧୯ କାରଣରୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଥିଲା। ଏହା ଅଗଷ୍ଟ ୮ ତାରିଖରେ ଶେଷ ହେବ। ୨୦୧୨ ଲଣ୍ଡନ ଅଲିମ୍ପିକ୍ସରେ ଭାରତ ୬ଟି ପଦକ ହାସଲ କରି ଶ୍ରେଷ୍ଠ ପ୍ରଦର୍ଶନ କରିଥିଲା। ଏଥିରେ ଦୁଇଟି ରୌପ୍ୟ ପଦକ ସାମିଲ ରହିଥିଲା। ତେବେ ୨୦୧୬ ରିଓ ଅଲିମ୍ପିକ୍ସରେ ମାତ୍ର ୨ଟି ପଦକ ହାସଲ କରି ଖରାପ ପ୍ରଦର୍ଶନ କରିଥିଲା।
କୋଭିଡ୍-୧୯ରେ ମିଲ୍ଖା ସିଂଙ୍କ ଦେହାନ୍ତ ନେଇ ପ୍ରଧାନମନ୍ତ୍ରୀ ମୋଦି ଦୁଃଖ ପ୍ରକାଶ କରିଥିଲେ। ଭାରତୀୟ ଆଥ୍ଲେଟିକ୍ସ ପ୍ରତି ମିଲ୍ଖାଙ୍କ ଅବଦାନ ଅତୁଳନୀୟ ବୋଲି କହିଛନ୍ତି। ଗାଁ ଓ ଛୋଟ ସହରରୁ ଆସି ଖେଳାଳିମାନେ ବିଶ୍ୱସ୍ତରରେ ସଫଳତା ହାସଲ କରିଛନ୍ତି। ଟୋକିଓ ଅଲିମ୍ପିକ୍ସରେ ମଧ୍ୟ ଏମାନେ ସଫଳ ହେବେ ବୋଲି ସେ ଆଶା ପ୍ରକାଶ କରିଛନ୍ତି।
