କୁନ୍ଦୁରା,୧୩।୨( ଡି.ଏନ. ଏ.)- କୋରାପୁଟ ଜିଲା କୁନ୍ଦୁରା ବ୍ଲକରେ ଗୋଟିଏ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଏବଂ ୩ଟି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଛି। ବ୍ଲକରେ ନିଯୁକ୍ତ ସମସ୍ତ ଡାକ୍ତର ବର୍ତ୍ତମାନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କାର୍ଯ୍ୟ କରୁଥିବା ବେଳେ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରଗୁଡିକ ଖାଲି ପଡିଛି। ଫଳରେ ବେସରକାରୀ ଭାବେ କ୍ୱାକ୍ ଦ୍ୱାରା ଏଠାରେ ରୋଗୀ ସେବା ଚାଲିଛି। କୁନ୍ଦୁରା ବ୍ଲକ ଅଧୀନରେ ଦିଗାପୁର, ଆସନା ଏବଂ ବାଗଦେରିରେ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଥିବା ବେଳେ କୁନ୍ଦୁରା ବ୍ଲକ ସଦରରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ରହିଛି। ବ୍ଲକ ସଦରରୁ ୨୦ କିମି ଦୂରରେ ଦିଗାପୁର,୧୦ କିମି ଦୂରରେ ବାଗଦେରି ଏବଂ ୧୦ କିମି ଦୂରରେ ଆସନା ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଛି। ଏହିସବୁ ଅଞ୍ଚଳରେ ରହୁଥିବା ଲୋକେ ସଦର ମହକୁମା କୁନ୍ଦୁୁରା ନ ଆସି ନିଜ ଅଞ୍ଚଳରେ ଚିକିତ୍ସା ସୁବିଧା ପାରିବା ଲକ୍ଷ୍ୟରେ ପ୍ରତିଷ୍ଠା ହୋଇଥିବା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରଗୁଡିକ ଏବେ ନିଜ ଲକ୍ଷ୍ୟଠାରୁ ଦୂରେଇ ଯାଇଥିବା ଅଭିଯୋଗ ହେଉଛି। ପ୍ରାଥମିକ ସ୍ବାସ୍ଥ୍ୟକେନ୍ଦ୍ରଗୁଡିକରେ ନିଯୁକ୍ତ ଡାକ୍ତର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ କାର୍ଯ୍ୟ କରୁଥିବା ଦେଖିବାକୁ ମିଳୁଛି। ଫଳରେ ଲୋକେ ବାଧ୍ୟ ହୋଇ କ୍ୱାକଙ୍କ୍ ନିକଟରେ ଚିକିତ୍ସିତ ହେବାକୁ ବାଧ୍ୟ ହେଉଛନ୍ତି। ଜିଲା ମୁଖ୍ୟ ଚିକିତ୍ସାଧିକାରୀ ଏଥିପ୍ରତି ଦୃଷ୍ଟି ନ ଦେବାରୁ ଦୀର୍ଘଦିନ ଧରି ବ୍ଲକରେ ଏପରି ଚାଲିଛି। ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରେ ଡାକ୍ତର ରହୁ ନ ଥିବା ସୁଯୋଗ ନେଇ ଅଞ୍ଚଳରେ କ୍ୱାକ୍ମାନଙ୍କ ପାଦୁର୍ଭାବ ବଢିବାରେ ଲାଗିଛି। ଏଠାରେ ଥିବା ଭେଷଜ ନିରୀକ୍ଷକ ଜୟପୁର ଉପଖଣ୍ଡ ଲାଗି କାର୍ଯ୍ୟ କରୁଥିବା ବେଳେ କୁନ୍ଦୁରା ବ୍ଲକ ପ୍ରତି ତାଙ୍କର ନଜର ନାହିଁ। ତାଙ୍କ ସହ ଯୋଗାଯୋଗ କରିବାକୁ ଉଦ୍ୟମ କରାଯାଇଥିଲେ ମଧ୍ୟ ତାହା ସମ୍ଭବ ହୋଇପାରୁନାହିଁ।
