ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟାକୁ ଇତି ମଧ୍ୟରେ ଏକ ମାସ ବିତିଲାଣି। ହେଲେ ପ୍ରଶଂସକମାନେ ତାଙ୍କ ମୃତ୍ୟୁକୁ ଗ୍ରହଣ କରିବାକୁ ନାରାଜ। ଅପରପକ୍ଷେ ପୋଲିସ ଯାଞ୍ଚକୁ ଏକପ୍ରକାର ଶେଷ କରିଛି। ପୋଷ୍ଟମର୍ଟମ ରିପୋର୍ଟ ପୋଲିସର ହସ୍ତଗତ ହୋଇଛି। ଏହାଛଡ଼ା ସୁଶାନ୍ତଙ୍କ କୋଠରୀ, ପଲଙ୍କ, ଫାଶର ଉଚ୍ଚତା ଆଦି ପୋଲିସ ତନ୍ନତନ୍ନ କରି ଯାଞ୍ଚ କରିଛି। ଏବେ କେବଳ ବିର୍ସା ରିପୋର୍ଟକୁ ଅପେକ୍ଷା। ଆସନ୍ତା ଏକରୁ ଦୁଇ ସପ୍ତାହ ମଧ୍ୟରେ ତାହା ଆସିଗଲେ ପୋଲିସ ଶେଷ ରିପୋର୍ଟ ଦେବ।
ଏବେର ରିପୋର୍ଟକୁ ଦେଖିଲେ ଏହା ଆତ୍ମହତ୍ୟା ବୋଲି ପୋଲିସ ସ୍ପଷ୍ଟ କରୁଛି। ଘଟଣାସ୍ଥଳରୁ ମିଳିଥିବା ପ୍ରମାଣ, ପଚରାଉଚରା କରିବା ପରେ ଏଭଳି ନିଷ୍କର୍ସ ବାହାରିଛି। ଏଣୁ ସୁଶାନ୍ତଙ୍କ ମୃତ୍ୟୁ କୌଣସି ଷଡଯନ୍ତ୍ର ନୁହେଁ ବରଂ ଆତ୍ମହତ୍ୟା ବୋଲି ପୋଲିସ ଜାଣିବାକୁ ପାଇଛି।
ପୋଲିସ ପହଞ୍ଚିବା ବେଳକୁ ସୁଶାନ୍ତଙ୍କ ଘରର କବାଟ ବନ୍ଦ ଥିଲା। ପଲଙ୍କ ଏବଂ ପଙ୍ଖା ମଧ୍ୟରେ ଏକ ଇଞ୍ଚର ତଫାତ ରହିଥିଲା। ଶରୀରର କୌଣସି ଦାଗ ନ ଥିଲା। ସୁଶାନ୍ତ ପିନ୍ଧିଥିବା କପଡ଼ା ଠିକ୍ ଥିଲା। ଘରେ ଥିବା ସମସ୍ତଙ୍କ ବୟାନ ଏକା ଥିଲା। ଏଭଳି ଅନେକ କିଛି ଦିଗକୁ ନେଇ ପୋଲିସ ତର୍ଜମା କରିଥିଲା। ଶେଷରେ ଏହା ଆତ୍ମହତ୍ୟା ବୋଲି ସ୍ପଷ୍ଟ ହେଉଥିବା ପୋଲିସ କହିଛି। ଏହା ହାଇପ୍ରୋଫାଇଲ୍ କେସ୍ ହୋଇଥିବାରୁ ପୋଲିସ ଅଧିକ ଯତ୍ନ ନେଇଥିବା କୁହାଯାଉଛି।
