ଭୁବନେଶ୍ୱର,୭।୩(ବ୍ୟୁରୋ):ନକଲି ମାଲିକ ଓ ଜାଲ ଦସ୍ତାବିଜ୍ରେ ଜମି ବିକ୍ରି କରି ଲକ୍ଷ ଲକ୍ଷ ଟଙ୍କା ଠକେଇ କରିଥିବା ର଼୍ୟାକେଟ୍ ଖୋଳତାଡ଼ କରୁଛି କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ)। ମାଷ୍ଟରମାଇଣ୍ଡ ଆଦିତ୍ୟ ସାହୁ ଓ ତାଙ୍କ ସହଯୋଗୀ ସବିତା ଦାସ ଗିରଫ ହୋଇ ରବିବାରଠାରୁ ଜେଲରେ ଥିବାବେଳେ ଧୀରେ ଧୀରେ ର଼୍ୟାକେଟ୍ର ଗୁମର ଖୋଲିବାରେ ଲାଗିଛି। ଏପରିକି କମିଶନରେଟ ପୋଲିସ ସ୍ପେଶାଲ ସିକ୍ୟୁରିଟି ବାଟାଲିଅନ୍ରେ କାର୍ଯ୍ୟରତ ହାବିଲଦାର ହରପ୍ରସାଦ ଶ୍ରୀଚନ୍ଦନ ମଧ୍ୟ ର଼୍ୟାକେଟ୍ ଜାଲରେ ଫସି ୨ ଲକ୍ଷ ଟଙ୍କା ହରାଇଛନ୍ତି। ଏନେଇ ଇଓଡବ୍ଲ୍ୟୁ ପକ୍ଷରୁ ସୋମବାର ସୂଚନା ଦିଆଯିବା ପରେ ଅଧିକ ଚର୍ଚ୍ଚା ସୃଷ୍ଟି ହୋଇଛି। ଇଓଡବ୍ଲ୍ୟୁର ସୂଚନା ଅନୁଯାୟୀ, ପ୍ରକୃତ ଜମି ମାଲିକ ରଙ୍ଗଲତା ସ୍ବାଇଁଙ୍କ ଜମି କିଣିବାକୁ ହରପ୍ରସାଦଙ୍କୁ ଅଭିଯୁକ୍ତ ଆଦିତ୍ୟ ଟାର୍ଗେଟ କରିଥିଲେ। ଜମି କିଣିବିକା ନେଇ ୨୦୨୨ରେ ହରପ୍ରସାଦଙ୍କ ସ୍ତ୍ରୀ ଈପ୍ସିତା ଓ ଆଦିତ୍ୟଙ୍କ ମଧ୍ୟରେ କୋର୍ଟରେ ଏଗ୍ରିମେଣ୍ଟ ହୋଇଥିଲା। ଜମି କିଣିବାକୁ ଆଦିତ୍ୟଙ୍କୁ ହାବିଲଦାର ହରପ୍ରସାଦ ଅଗ୍ରିମ ନଗଦ ଆକାରରେ ୨ ଲକ୍ଷ ଟଙ୍କା ଦେଇଥିଲେ। ଏହାପରେ ଆଦିତ୍ୟ ସେମାନଙ୍କ ସହ ସମ୍ପର୍କ କାଟିଦେବା ସହ ଆଉ ଧରାଛୁଆଁ ଦେଇ ନ ଥିଲେ।
ରଙ୍ଗଲତାଙ୍କ ଉକ୍ତ ଜମିକୁ ବିକ୍ରି କରିବା ଆଳରେ ଦିଲ୍ଲୀ ଏନ୍ସିଆର୍ରେ ରହୁଥିବା ହରିଶ କୁମାରଙ୍କୁ ମଧ୍ୟ ଆଦିତ୍ୟ ଫସାଇଥିବା ଇଓଡବ୍ଲ୍ୟୁ ପକ୍ଷରୁ କୁହାଯାଇଛି। ଆଦିତ୍ୟ ଅଗ୍ରିମ ବାବଦକୁ ତାଙ୍କଠାରୁ ୫୦ ହଜାର ଟଙ୍କା ଆଣି
ଠକିଛନ୍ତି। ତେବେ ଏଭଳି ବହୁ ଲୋକଙ୍କୁ ଅଭିଯୁକ୍ତମାନେ ଠକିଥିବା ଇଓଡବ୍ଲ୍ୟୁ ଜାଣିବାକୁ ପାଇଛି। ତେଣୁ ଜମିର ନକଲି ମାଲିକାଣୀ ସାଜିଥିବା ଅଭିଯୁକ୍ତା ସବିତା ଓ ମାଷ୍ଟରମାଇଣ୍ଡ ଆଦିତ୍ୟଙ୍କୁ ଇଓଡବ୍ଲ୍ୟୁ ରିମାଣ୍ଡରେ ଆଣି ଅଧିକ ତଥ୍ୟ ହାସଲ କରିବା ସହ ର଼୍ୟାକେଟ୍ର ଅନ୍ୟସଦସ୍ୟଙ୍କୁ ଧରିବାକୁ ଇଓଡବ୍ଲ୍ୟୁ ଆଶା ରଖିଛି।
ସୂଚନାଯୋଗ୍ୟ, ବାରଙ୍ଗସ୍ଥିତ ବାଛପୁର ଅଞ୍ଚଳର ୭୫ ବର୍ଷୀୟା ବୃଦ୍ଧା ରଙ୍ଗଲତା ସ୍ବାଇଁଙ୍କର ସ୍ଥାନୀୟ ଅଞ୍ଚଳରେ ସାଢ଼େ ୪ ଏକର ଜମି ରହିଛି। ଅଭିଯୁକ୍ତମାନେ ସବିତାଙ୍କୁ ରଙ୍ଗଲତା ବୋଲି ଦର୍ଶାଇ ଠକେଇ ଯୋଜନା କରିଥିଲେ। ରଙ୍ଗଲତାଙ୍କ ପାନ୍ କାର୍ଡ, ଆଧାର କାର୍ଡ ଓ ଜମି ପଟା ଆଦିକୁ ନକଲ କରିଥିଲେ। ସେମାନେ ଶୈଳେଶ୍ରୀ ବିହାରର ସ୍ବସ୍ତିରଞ୍ଜନ ପାଣିଗ୍ରାହୀଙ୍କୁ ଜମି ବିକ୍ରି କରିବାକୁ ଅଗ୍ରିମ ୨୫ଲକ୍ଷ ଟଙ୍କା ଆଣି ଠକିଥିଲେ। ତାଙ୍କ ଅଭିଯୋଗକ୍ରମେ ଇଓଡବ୍ଲ୍ୟୁ ଶୁକ୍ରବାର ଏକ ମାମଲା (ନଂ.୮/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା।
