କାରଚୀ,୨୪।୬(ପି.ଟି.): ଇଂଲଣ୍ଡ ଗସ୍ତରେ ଯିବାକୁ ଥିବା ପାକିସ୍ତାନ ଦଳର ପୂର୍ବତନ ଅଧିନାୟକ ମହମ୍ମଦ ହାଫିଜ୍ କୋଭିଡ୍-୧୯ ଟେଷ୍ଟରେ ନେଗେଟିଭ୍ ବୋଲି ଜଣାପଡିଛନ୍ତି। ତେବେ ଗୋଟିଏ ଦିନ ପୂର୍ବରୁ ପାକିସ୍ତାନ କ୍ରିକେଟ ବୋର୍ଡ (ପିସିବି) ତାଙ୍କୁ ପଜିଟିଭ୍ ବୋଲି ଘୋଷଣା କରିଥିଲା। ମଙ୍ଗଳବାର ହାଫିଜ ଓ ଦ୍ରୁତ ବୋଲର ଓ୍ବାହାବ ରିୟାଜଙ୍କ ସମେତ ୧୦ଜଣ ପାକିସ୍ତାନ ଖେଳାଳି ଟେଷ୍ଟରେ ପଜିଟିଭ୍ ବୋଲି ଜଣାପଡିଥିଲା। ପାକିସ୍ତାନ ଦଳ ରବିବାର ଇଂଲଣ୍ଡ ଗସ୍ତରେ ଯିବ ଓ ସେଠାରେ ଗୋଟିଏ ଟେଷ୍ଟ ଓ ଟି୨୦ ସିରିଜ ଖେଳିବାର କାର୍ଯ୍ୟକ୍ରମ ରହିଛି।
ସେ ଓ ତାଙ୍କ ପରିବାର ସଦସ୍ୟ ନେଗେଟିଭ୍ ବୋଲି ବୁଧବାର ଟୁଇଟ୍ କରି ହାଫିଜ୍ ସମସ୍ତଙ୍କୁ ଅବଗତ କରାଇଛନ୍ତି। ଏହିକ୍ରମରେ ସେ ଏକ ମେଡିକାଲ ରିପୋର୍ଟ ମଧ୍ୟ ପୋଷ୍ଟ କରିଛନ୍ତି। ପୂର୍ବରୁ ଫକାରା ଜମାନ, ଇମ୍ରାନ ଖାନ, କାସିଫ ଭଟ୍ଟି, ମହମ୍ମଦ ହାସନୈନ, ମହମ୍ମଦ ରିଜଓ୍ବାନ, ଶଦାବ ଖାନ୍, ହାଇଦର ଅଲି ଓ ହାରିସ ରୌଫ୍ ଟେଷ୍ଟରେ ପଜିଟିଭ୍ ବୋଲି ପିସିବି ମୁଖ୍ୟ କାର୍ଯ୍ୟନିର୍ବାହୀ ଓ୍ବାସିମ ଖାନ୍ ଘୋଷଣା କରିଥିଲେ। ଇଂଲଣ୍ଡରେ ପହଞ୍ଚିବା ପରେ ଖେଳାଳି ଓ ଅଫିସିଆଲଙ୍କୁ ବିଶ୍ରାମ ନେବାକୁ କୁହାଯିବ ବୋଲି ଓ୍ବାସିମ କହିଛନ୍ତି। ପ୍ରଥମ ଟେଷ୍ଟ ଖେଳିବା ପୂର୍ବରୁ ପାକିସ୍ତାନ ଦଳ ଅତିକମ୍ରେ ୫ଟି ପରୀକ୍ଷାର ସମ୍ମୁଖୀନ ହେବ ବୋଲି କୁହାଯାଇଛି।
