ଭୁବନେଶ୍ୱର, ୧୬।୧୧(ବ୍ୟୁରୋ): ଭୁବନେଶ୍ୱର ମହାନଗର ନିଗମାଞ୍ଚଳରେ ଏବେ ମଶାଙ୍କ ପ୍ରାର୍ଦୁଭାବ ବଢ଼ିଚାଲିଛି। କେବଳ ରାତିରେ ନୁହେଁ, ଦିନରେ ବି ମଶାଙ୍କ ଦୌରାତ୍ମ୍ୟ ଶୁଆଇ ବସାଇ ଦେଉନାହିଁ। ଅପରାହ୍ନ ୪ଟା ବାଜୁ ବାଜୁ ଘରର ଝରକା, କବାଟ ବନ୍ଦ କରି ରହିବାକୁ ପଡୁଛି। ନଚେତ୍ ଘର ଭିତରେ ମଶା ରଖେଇ ଦେଉନାହାନ୍ତି। ରାଜଧାନୀରେ ମଶାଙ୍କ ପ୍ରାର୍ଦୁଭାବ ପାଇଁ ଲୋକେ କଲବଲ ହେଉଛନ୍ତି। ଏହାସତ୍ତ୍ୱେ ବିଏମ୍ସି କର୍ତ୍ତୃପକ୍ଷ ଚୁପ୍ ବସିଛନ୍ତି। ସହରରେ ଅଧିକାଂଶ ନାଳ ନର୍ଦ୍ଦମା ଖୋଲା ପଡିଥିବାବେଳେ ସେଗୁଡ଼ିକୁ ନିୟମିତ ସଫା କରାଯାଉନାହିଁ। ଫଳରେ ନର୍ଦ୍ଦମା ପାଣିରେ ମଶାବଂଶ ବୃଦ୍ଧି ପାଇଚାଲିଛି। ଏପରିକି ବିଏମ୍ସି ପକ୍ଷରୁ ନାଳଗୁଡ଼ିକରେ ମଶାତେଲ ସିଞ୍ଚନ କରାଯାଉନାହିଁ କିମ୍ବା ଟିଫା ମେଶିନ୍ ବୁଲୁନାହିଁ। ସହରକୁ ସ୍ବଚ୍ଛ ଓ ସୁନ୍ଦର କରିବା ପାଇଁ ବିଏମ୍ସି ଗୁରୁତ୍ୱ ଦେଉଥିବା କହୁଥିବାବେଳେ ଏଥିପ୍ରତି ଦୃଷ୍ଟି ଦିଆଯାଉନାହିଁ। ଗତ ବର୍ଷ ଏବଂ ଚଳିତ ବର୍ଷ ଲଗାତାର ଭାବେ ଭୁବନେଶ୍ୱରରେ ଡେଙ୍ଗୁରୋଗୀଙ୍କ ସଂଖ୍ୟା ବୃଦ୍ଧି ପାଇଥିଲା। ଅନ୍ୟ ସହର ଅପେକ୍ଷା ଏଠାରୁ ଅଧିକ ସଂଖ୍ୟକ ରୋଗୀ ଚିହ୍ନଟ ହୋଇଥିଲେ। ଘରେ ଘରେ ଜ୍ୱର ବ୍ୟାପିଥିଲା। ଏହାକୁ ଦୃଷ୍ଟିରେ ରଖି ବିଏମ୍ସି ପକ୍ଷରୁ ପ୍ରତି ରବିବାର ଏବଂ ଗୁରୁବାର ସପ୍ତାହରେ ଦୁଇଦିନ ‘ଡ୍ରାଏ ଡେ’ ପାଳନ କରାଯିବା ସହ ଏହାକୁ ସୋସିଆଲ ମିଡିଆରେ ଜୋର୍ଦାର୍ ପ୍ରଚାର କରାଯାଉଥିଲା। ମାତ୍ର କିଛିଦିନର ବ୍ୟବଧାନ ପରେ ଏବେ ଆଉ ତାହା କରାଯାଉ ନାହିଁ। ସେହିପରି ଲୋକଙ୍କ ଅଭିଯୋଗ ଏବଂ ଦାବିକୁ ଦେଖି ବିଏମ୍ସି କିଛିଦିନ ବିଭିନ୍ନ ଓ୍ବାର୍ଡରେ ମଶାଧୂଆଁ ଛାଡ଼ିବା ସହ ଡ୍ରେନ୍ଗୁଡ଼ିକରେ ମଶା ତେଲ ସିଞ୍ଚନ କରିଥିଲା। ମାତ୍ର ଧିରେ ଧିରେ ଏ ସବୁ ବନ୍ଦ ହୋଇଗଲାଣି। ବିଏମ୍ସି ଏବେ କେବଳ ସହରର ସଫେଇ ଉପରେ ଗୁରୁତ୍ୱ ଦେଉଛି। ତେବେ ସହରରେ ମଶାଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ଏଥିପ୍ରତି କର୍ତ୍ତୃପକ୍ଷ ଦୃଷ୍ଟି ନ ଦେବା ସାଧାରଣରେ ଅସନ୍ତୋଷ ସୃଷ୍ଟି କରୁଛି। ବିଶେଷକରି ମୁକୁଳା ଡ୍ରେନ୍ ଓ ନାଳନର୍ଦ୍ଦମା ଅପରିଷ୍କାର ହୋଇ ପଡ଼ିରହିଛି। ଅପରପକ୍ଷେ ସହରର ବିଭିନ୍ନ ସ୍ଥାନରେ ଅଳିଆ ଆବର୍ଜନା ପଡ଼ିରହି ପଚିଶଢ଼ି ପୂତିଗନ୍ଧମୟ ପରିବେଶ ସୃଷ୍ଟି କରୁଛି। ଏଥିସହ ମଶାବଂଶ ବୃଦ୍ଧି ପାଉଛି। ଡେଙ୍ଗୁର ହଟ୍ସ୍ପଟ୍ ପାଲଟିଥିବା ଭୁବନେଶ୍ୱରବାସୀଙ୍କୁ ଏବେ ମ୍ୟାଲେରିଆ ଭୟ ଘାରିଲାଣି।
