ମହାକାଳପଡ଼ା,୧୫ା୮(ଡି.ଏନ୍.ଏ.): ଭାରତ ସ୍ବାଧୀନତା ଲାଭର ୭୫ ବର୍ଷ ପରେ ବି ଗ୍ରାମାଞ୍ଚଳର ଲୋକଙ୍କୁ ମୌଳିକ ସୁବିଧା ମିଳିନି। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ପେଟଚ୍ଛେଲା ପଞ୍ଚାୟତ ଶବରପଲ୍ଲୀ ଗାଁ ଜଙ୍ଗଲଘେରିକୁ ଭଲ ରାସ୍ତାଟିଏ ନାହିଁ। ଫଳରେ ଆମ୍ବୁଲାନ୍ସଟିଏ ଗାଁକୁ ଆସିପାରୁ ନ ଥିବାରୁ ବାଧ୍ୟରେ ଲୋକମାନେ ବାଉଁଶ ଓ ଲୁଗାରେ ଭାର କରି ଜଣେ ମହିଳା ରୋଗୀଙ୍କୁ ୨ କିମି ଦୂର ନେବାକୁ ପଡ଼ିଛି। ସେଠାରୁ ଅନ୍ୟ ଗାଡ଼ିରେ ସ୍ବାସ୍ଥ୍ୟକେନ୍ଦ୍ରକୁ ନେଇଛନ୍ତି।
ବ୍ଲକର ଶବରପଲ୍ଲୀ ଗାଁର ଜଙ୍ଗଲଘେରିରେ ଶବର ସମ୍ପ୍ରଦାୟର ୪୦ ପରିବାରରେ ୧୫୦ ଲୋକ ବସବାସ କରୁଛନ୍ତି। ରବିବାର ଅପରାହ୍ନରେ ଗାଁର ଜଣେ ମହିଳା ଦ୍ରୌପଦୀ ଭକ୍ତା(୭୦) ଗୁରୁତର ହୋଇପଡିଥିଲେ। ତାଙ୍କୁ ଗାଁ ଲୋକେ ଭାରରେ ଦୁଇ କିମି ଦୂର ରାମଚଣ୍ଡୀ ମୁଖ୍ୟରାସ୍ତାକୁ ଆଣିଥିଲେ। ସେଠାରୁ ମହିଳାଙ୍କୁ ପ୍ରଥମେ ଅଟୋରିକ୍ସା ଯୋଗେ ରାମନଗର ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓ ପରେ ଅବସ୍ଥା ଗୁରୁତର ହେବାରୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଏହି ଗାଁର ଲୋକେ ବହୁବାର ପ୍ରଶାସନ ନିକଟରେ ଦାବି କରିଥିଲେ ମଧ୍ୟ ବ୍ଲକ ପ୍ରଶାସନ ଅଧାପନ୍ତରିଆ ରାସ୍ତା କାମ ସାରି ଚୁପ୍ ହୋଇ ବସି ରହିଛି। ଗାଁର ଏହି ରାସ୍ତା ଦୁଃଖ କେବେ ଦୂର ହେବ ଓ ଆମ୍ବୁଲାନ୍ସଟିଏ ଗାଁକୁ ଆସିବ ତାହାକୁ ନେଇ ସମସ୍ତେ ସନ୍ଦୀହାନରେ ରହିଛନ୍ତି। ଗାଁର ସୁଦନ ଭକ୍ତା, ପଇଡ ଭକ୍ତା, ସୁଦର୍ଶନ ଭକ୍ତା, ସହଚର ଆହାଡ଼ି ପ୍ରମୁଖ ରାସ୍ତା ନିର୍ମାଣ ପାଇଁ ଦାବି କରିଛନ୍ତି।
