ଇସଲାମାବାଦ,୧।୧୧:ଟି -୨୦ ବିଶ୍ୱକପରେ ଭାରତକୁ କ୍ରମାଗତ ଦ୍ୱିତୀୟ ପରାଜୟର ସମ୍ମୁଖୀନ ହେବାକୁ ପଡିଛି। ରବିବାର ନ୍ୟୁଜିଲାଣ୍ଡ ଭାରତକୁ ୮ ଉଇକେଟରେ ପରାସ୍ତ କରିଛି। ଏହାପୂର୍ବରୁ ପାକିସ୍ତାନ ଓପନିଂ ମ୍ୟାଚ୍ରେ ଭାରତକୁ ୧୦ ଉଇକେଟ୍ରେ ପରାସ୍ତ କରିଥିଲା। ନ୍ୟୁଜିଲାଣ୍ଡ ବିପକ୍ଷରେ ଭାରତୀୟ ବ୍ୟାଟିଂ ଅତି ସାଧାରଣ ମନେ ହେଉଥିଲା। ୨୦ ଓଭରରେ ମାତ୍ର ୧୧୦ ରନ୍ କରିବାରେ ସକ୍ଷମ ହୋଇଥିଲା। ଏହାର ଜବାବରେ କିୱି ଦଳ ମାତ୍ର ୨ ଉଇକେଟ ହରାଇ ଜିତିଛି। ଏହି ପରାଜୟ ପରେ ଟିମ ଇଣ୍ଡିଆର ପ୍ରଶଂସକମାନେ ନିରାଶ ହୋଇଥିଲେ। କିନ୍ତୁ ଟିମ ଇଣ୍ଡିଆର ପରାଜୟ ପାକିସ୍ତାନରେ ଖୁସିର ଉତ୍ସବ ଭାବରେ ପାଳନ କରାଯାଇଥିଲା।
ଏହାର ଏକ ଭିଡିଓ ଭାଇରାଲ ହେଉଛି। ଏଥିରେ ପାକିସ୍ତାନର ପୂର୍ବତନ ଅଧିନାୟକ ୱାସିମ ଆକ୍ରାମ, ୱାକର ୟୁନିସ ଭାରତର ପରାଜୟରେ ଖୁସି ହୋଇଥିଲେ। ଲାଇଭ ଶୋ ସମୟରେ ଷ୍ଟୁଡିଓରେ ଉଭୟଙ୍କୁ ନାଚୁଥିବାର ଦେଖାଯାଇଥିଲା। ୱାହାବ ରିଆଜ ଏବଂ ପାକିସ୍ତାନ ଦଳର ପୂର୍ବତନ ପ୍ରଶିକ୍ଷକ ମିସବା-ଉଲ-ହକ ମଧ୍ୟ ଉପସ୍ଥିତ ଥିଲେ। ଏକ ଗୀତ ବାଜିବା କ୍ଷଣି ସମସ୍ତେ ନିଜ ନିଜ ସ୍ଥାନରେ ବସି ଭାରତ ପରାଜୟର ମଜା ଉଠାଇଥିଲେ। ଖେଳାଳିଙ୍କ ଉତ୍ସବ ପାଳନ କରୁଥିବା ଏହି ଭିଡିଓ ପାକିସ୍ତାନର ଏକ ସ୍ପୋର୍ଟସ ଚ୍ୟାନେଲରୁ ଆସିଛି।
ଟିମ ଇଣ୍ଡିଆର ପରାଜୟ ପରେ ଶାହିଦ ଆଫ୍ରିଦି ମଧ୍ୟ ଉପଭୋଗ କରିଥିଲେ। ସେ ଟୁଇଟ କରିଛନ୍ତି- ଭାରତୀୟ ଦଳକୁ ସେମିଫାଇନାଲରେ ପ୍ରବେଶ କରିବାର ସୁଯୋଗ ରହିଛି। କିନ୍ତୁ ଏହି ଟୁର୍ନାମେଣ୍ଟରେ ଟିମ ଇଣ୍ଡିଆ ଦୁଇଟି ବଡ଼ ମ୍ୟାଚ ଖେଳିଛି। ଏହା ପରେ ଯଦି ସେ ସେମିଫାଇନାଲରେ ଯୋଗ୍ୟତା ଅର୍ଜନ କରିବ, ତେବେ ଏହା ଚମତ୍କାରଠାରୁ କମ ହେବ ନାହିଁ।
