ଭୁବନେଶ୍ୱର,୧୩।୪(ବ୍ୟୁରୋ): କେନ୍ଦ୍ର ସରକାରଙ୍କ ସମସ୍ତ ଜନକଲ୍ୟାଣ କାର୍ଯ୍ୟର ହିସାବ ସାଧାରଣ ଜନତାଙ୍କ ନିକଟରେ ଉପସ୍ଥାପିତ କରାଯିବ। ସମସ୍ତ ଯୋଜନା ଓ କାର୍ଯ୍ୟକ୍ରମ ପ୍ରସଙ୍ଗରେ ସଚେତନତା ସୃଷ୍ଟି କରିବାର ପ୍ରୟାସ କେନ୍ଦ୍ର ସରକାର ଜାରି ରଖିଛନ୍ତି। ଗତ ୭ ତାରିଖରୁ ଆସନ୍ତା ୨୦ ତାରିଖ ପର୍ଯ୍ୟନ୍ତ ଭାଜପା କାର୍ଯ୍ୟକର୍ତ୍ତାମାନେ ଦେଶବ୍ୟାପୀ ‘ସାମାଜିକ ନ୍ୟାୟିକ ପକ୍ଷ’ ପାଳନ ଅବସରରେ ମୋଦି ସରକାରଙ୍କ ବିଭିନ୍ନ ଜନକଲ୍ୟାଣ ଯୋଜନାକୁ ସାଧାରଣ ଜନତାଙ୍କୁ ଅବଗତ କରାଇବା ସହ ସଚେତନ ସୃଷ୍ଟି କରୁଛନ୍ତି। ଏହି ଅବସରରେ ଅନୁନ୍ନତ ଜିଲା ଭାବେ ଚିହ୍ନଟ ହୋଇଥିବା ଦେଶର ଆକାଂକ୍ଷୀ ଜିଲାଗୁଡ଼ିକରେ କେନ୍ଦ୍ରମନ୍ତ୍ରୀମାନେ ଗସ୍ତ କରି କେନ୍ଦ୍ର ସରକାରଙ୍କ ବିଭିନ୍ନ ଜନକଲ୍ୟାଣ ଯୋଜନା ଏବଂ କାର୍ଯ୍ୟକ୍ରମର ବାସ୍ତବ ସ୍ଥିତି ଅନୁଧ୍ୟାନ କରୁଛନ୍ତି। ୧୦ ଆକାଂକ୍ଷୀ ଜିଲାକୁ ୧୦ କେନ୍ଦ୍ରମନ୍ତ୍ରୀ ଗସ୍ତ କରିବାର କାର୍ଯ୍ୟକ୍ରମ ରହିଛି। କେନ୍ଦ୍ରମନ୍ତ୍ରୀ ସଞ୍ଜୀବ କୁମାର ବାଲ୍ୟାନ ମଙ୍ଗଳବାର କୋରାପୁଟ ଜିଲା ଗସ୍ତ କରିଛନ୍ତି। ହେଲେ ବାଲ୍ୟାନ କୋରାପୁଟ ଜିଲା ଗସ୍ତରେ ଖୁସି ନ ଥିବା ବ୍ୟକ୍ତ କରିଛନ୍ତି। ସେ କହିଛନ୍ତି, ଏଠାରେ କେନ୍ଦ୍ର ସରକାରଙ୍କ ବିଭିନ୍ନ ଯୋଜନାର ସମୀକ୍ଷା ଲାଗି ଆସିଥିଲୁ। ହେଲେ ଜିଲା ପ୍ରଶାସନ କି ଲୋକ ପ୍ରତିନିଧି କେହି ଆସିଲେନି। ଏହା ଜିଲା ପ୍ରଶାସନର ଅସହଯୋଗ। ଫଳରେ ଯେତିକି ଜାଣିବାକଥା ଜାଣିପାରିଲୁନି। ସମୀକ୍ଷା ଠିକ୍ରେ ହୋଇପାରିଲାନି। ଆଗକୁ ଏଭଳି ନ କରିବା ଲାଗି ସେ ଅନୁରୋଧ କରିଛନ୍ତି।
କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ମାଲକାନଗିରି, ଅର୍ଜୁନ ମୁଣ୍ଡା କଳାହାଣ୍ଡି, ପ୍ରହ୍ଲାଦ ସିଂ ପଟେଲ ଗଜପତି, ସାଧ୍ୱୀ ନିରଞ୍ଜନା ଜ୍ୟୋତି ବଲାଙ୍ଗୀର, ପ୍ରଫେସର ଏସ.ବାଘେଲ ନୂଆପଡ଼ା, ସୁଶ୍ରୀ ଶୋଭା କରନ୍ଦଲାଜେ ନବରଙ୍ଗପୁର, ସୋମ ପ୍ରକାଶ ରାୟଗଡ଼ା ଏବଂ ଡ.ଶୁଭ ସରକାର କନ୍ଧମାଳ ଜିଲା ଗସ୍ତ କରିବେ ବୋଲି ରାଜ୍ୟ ସାଧାରଣ ସମ୍ପାଦକ ଗୋଲକ ମହାପାତ୍ର ସୂଚନା ଦେଇଛନ୍ତି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆସନ୍ତା ୧୩ରୁ ୪ଦିନିଆ ଢେଙ୍କାନାଳ ଗସ୍ତରେ ଯାଇ ଆକାଂକ୍ଷୀ ଯୋଜନା ସମୀକ୍ଷା କରିବେ। ଗସ୍ତ ଅବସରରେ କେନ୍ଦ୍ରମନ୍ତ୍ରୀମାନେ କେନ୍ଦ୍ରୀୟ ଜନକଲ୍ୟାଣ କାର୍ଯ୍ୟକ୍ରମର କାଯର୍ୟାନ୍ବୟନ, ବାସ୍ତବ ସ୍ଥିତି ନିରୀକ୍ଷଣ, ବିଭାଗୀୟ ଅଧିକାରୀଙ୍କ ସହ ଆଲୋଚନା କରିବା ସହିତ ହିତାଧିକାରୀ, ସ୍ଥାନୀୟ ଏମ୍ପି, ବିଧାୟକ, ଚେୟାରମ୍ୟାନ, ସରପଞ୍ଚ ଓ ଅନ୍ୟ ଜନପ୍ରତିନିଧି ଏବଂ ଦଳୀୟ କାର୍ଯ୍ୟକର୍ତ୍ତାଙ୍କ ସହ ବିସ୍ତୃତ ଆଲୋଚନା କରିବେ। ଏହାପରେ ସମସ୍ତ କେନ୍ଦ୍ରମନ୍ତ୍ରୀ ନିଜ ରିପୋର୍ଟ ପ୍ରଧାନମନ୍ତ୍ରୀଙ୍କୁ ପ୍ରଦାନ କରିବେ ବୋଲି ଜଣାପଡ଼ିଛି। ଗସ୍ତ ଅବସରରେ କେନ୍ଦ୍ରମନ୍ତ୍ରୀମାନେ ଖବରଦାତା ଜରିଆରେ ଗସ୍ତ ସମ୍ପର୍କରେ ଅବଗତ କରାଇବେ ବୋଲି ଗୋଲକ ସୂଚନା ଦେଇଛନ୍ତି।
