ପଟ୍ଟାଙ୍ଗି,୮ା୧୧(ଡି.ଏନ.ଏ.):ଜାତୀୟ ରାଜପଥ ବିଭାଗର ଖାମଖିଆଲ ଯୋଗୁ ବିଭାଗର ରାଜପଥଗୁଡ଼ିକ ମରଣଯନ୍ତାରେ ପରିଣତ ହୋଇଛି। କୋରାପୁଟ ଜିଲା ଅନ୍ତର୍ଗତ ରାଲେଗଡା ପଞ୍ଚାୟତ ସଦର ମହକୁମାଠାରୁ ଆରମ୍ଭ କରି ସୁଙ୍କି ପର୍ଯ୍ୟନ୍ତ ଥିବା ରାସ୍ତା ଅବସ୍ଥା ଶୋଚନୀୟ ହୋଇପଡିଛି। ପଟ୍ଟାଙ୍ଗି ବ୍ଲକ ସଦର ମହକୁମା ଦେଇ ପଡୋଶୀ ଆନ୍ଧ୍ରକୁ ସଂଯୋଗ କରୁଥିବା ୨୬ନଂ ଜାତୀୟ ରାଜପଥର ଏପରି ଅବସ୍ଥା ହୋଇଛି। ଏହି ରାସ୍ତାରେ ଛୋଟ ଗାଡ଼ିଠାରୁ ଆରମ୍ଭ କରି ଭାରିଯାନଗୁଡ଼ିକ ବିପଦପୂର୍ଣ୍ଣ ଅବସ୍ଥାରେ ଯାତାୟାତ କରୁଛି। ବିଭାଗୀୟ ଅଧିକାରୀ କୌଣସି ପଦକ୍ଷେପ ଗ୍ରହଣ କରୁ ନ ଥିବାରୁ ବିଭିନ୍ନ ସମୟରେ ଦୁର୍ଘଟଣାମାନ ଘଟି ଧନଜୀବନ ହାନି ହେଉଛି। ସ୍ଥାନୀୟ ଜନସାଧାରଣ ଜାତୀୟ ରାଜପଥ ଉପରେ ହୋଇଥିବା ଖାଲ ସ୍ଥାନଗୁଡିରେ ଲାଲ ରଙ୍ଗର ପତାକା ଉଡାଇ ସଙ୍କେତ ଦେଉଛନ୍ତି। ରାଲେଗଡା ପଞ୍ଚାୟତର ରାଜୁଗୁଡା ଗ୍ରାମ ଛକ ଉପରେ ଏପରି ଦେଖିବାକୁ ମିଳିଛି। ଉକ୍ତ ଛକରେ୨ଟି ସ୍ଥାନରେ ରାସ୍ତା ଉପରେ ବଡବଡ ଖାଲ ହୋଇଥିବାରୁ ଏହି ରାସ୍ତା ଦେଇ ଯାତାୟାତ କରୁଥିବା ଗାଡ଼ି ମୋଟର ଯେପରି ଦୁର୍ଘଟଣାଗସ୍ତ ନ ହୁଏ ସେଥିପ୍ରତି ସତର୍କ ରହିବା ଲାଗି ଗ୍ରାମବାସୀ ଏହିପରି ପଦକ୍ଷେପ ନେଇଛନ୍ତି । ଏହା ସତ୍ୱେ ବିଭାଗୀୟ କର୍ତ୍ତୃପକ୍ଷ ଚେତୁନାହାନ୍ତି। ରାସ୍ତା ମରାମତି କରିବା ଦିଗରେ କୌଣସି ପଦକ୍ଷେପ ନେଉନାହାନ୍ତି। ଏ ଦିଗରେ ତୁରନ୍ତ ପଦକ୍ଷେପ ନେଇ ରାସ୍ତା ଦୂରବସ୍ଥା ସୁଧାରିବା ପାଇଁ ସ୍ଥାନୀୟ ରାଜ୍ୟ ମୋଟର ଚାଳକ ସଂଘ ପଟ୍ଟାଙ୍ଗି ଶାଖାର ସମସ୍ତ ଗାଡିଚାଳକମାନେ ଦାବି କରିଛନ୍ତି। ଏନେଇ ବିଭାଗୀୟ ଯନ୍ତ୍ରୀଙ୍କୁ ଯୋଗାଯୋଗ କରିବାରୁ ବର୍ଷା ପାଇଁ ରାସ୍ତାର ମରାମତି ବନ୍ଦ ରହିଥିଲା। ବର୍ତ୍ତମାନ ରାସ୍ତା ମରାମତି କାର୍ଯ୍ୟ ଆରମ୍ଭ ହୋଇଛି। ଉପରୋକ୍ତ ସ୍ଥାନମାନଙ୍କରେ ମଧ୍ୟ କାମ ଅଳ୍ପ ଦିନ ମଧ୍ୟରେ କାମ ହେବ ବୋଲି ସେ କହିିଥିଲେ ।
