ଭୁବନେଶ୍ୱର,୧୮।୪ (ବ୍ୟୁରୋ): ଓଡ଼ିଶା ପ୍ରଦେଶ କଂଗ୍ରେସ କମିଟି (ଓପିସିସି) ସଭାପତି ପରିବର୍ତ୍ତନ ନେଇ ଅଖିଳ ଭାରତ କଂଗ୍ରେସ କମିଟି (ଏଆଇସିସି) ଅନୁମତି ଦେବାପରେ ରାଜ୍ୟ ପ୍ରଭାରୀ ଡ. ଏ. ଚେଲ୍ଲାକୁମାରଙ୍କୁ ଦାୟିତ୍ୱ ପ୍ରଦାନ କରାଯାଇଛି। ଏଥିପାଇଁ ସେ ଆସନ୍ତା ୨୨ ତାରିଖରେ ଓଡ଼ିଶା ଆସିପାରନ୍ତି ବୋଲି ସୂଚନା ମିଳିଛି। ଏଆଇସିସି ନେତା ରାହୁଲ ଗାନ୍ଧୀ ଚଳିତ ମାସ ଚତୁର୍ଥ ସପ୍ତାହରେ ବିଦେଶ ଗସ୍ତ କରିବାର କାର୍ଯ୍ୟକ୍ରମ ରହିଥିବାରୁ ଏହା ପୂର୍ବରୁ ପିସିସି ସଭାପତି ଚୟନ ପ୍ରକ୍ରିୟା ସାରିବାକୁ ଆଦେଶ ରହିଛି। ଏଣୁ ଅତିଶୀଘ୍ର ନୂତନ ପିସିସି ସଭାପତିଙ୍କ ନାମ ଘୋଷଣା କରାଯିବା ନେଇ ଚିତ୍ର ସ୍ପଷ୍ଟ ହୋଇଛି।
ପିସିସି ସଭାପତି ପରିବର୍ତ୍ତନ ନେଇ ସମସ୍ତ ପ୍ରକ୍ରିୟା ଆରମ୍ଭ ହୋଇସାରିଥିବାବେଳେ ପ୍ରଭାରୀ ଚେଲ୍ଲାକୁମାର ରାଜ୍ୟର ପ୍ରାୟ ସମସ୍ତ ବରିଷ୍ଠ ନେତାଙ୍କ ସହିତ ଏହି ବିଷୟରେ ପ୍ରାରମ୍ଭିକ ଆଲୋଚନା କରିସାରିଛନ୍ତି। ତେବେ ଆଗାମୀ ଗସ୍ତ ସମୟରେ ସେ ବିଧାୟକ ଓ ବରିଷ୍ଠ ନେତାଙ୍କ ସହ ମୁହାମୁହିଁ ଆଲୋଚନା କରିବେ। ତେବେ ସମସ୍ତଙ୍କ ସହମତିରେ ଯିଏ ଉଭୟ ରାଜ୍ୟବାସୀ ଓ କର୍ମୀଙ୍କ ଗ୍ରହଣୀୟ ହେବ ତାଙ୍କୁ ହିଁ ସଭାପତି ପଦ ପାଇଁ ଚୂଡ଼ାନ୍ତ କରାଯିବ ବୋଲି ଶୁକ୍ରବାର ପ୍ରଭାରୀ ଚେଲ୍ଲାକୁମାର ସୂଚନା ଦେଇଥିଲେ। ଅପରପକ୍ଷରେ ପିସିସି ସଭାପତି ପଦ ପାଇଁ କଂଗ୍ରେସର ୯ ବିଧାୟକଙ୍କ ମଧ୍ୟରୁ ଜଣଙ୍କୁ କରାଯିବାକୁ ନେଇ ବିଧାୟକମାନେ ଦାବି କରି ଆସୁଛନ୍ତି। ନିର୍ବାଚିତ ନେତୃବୃନ୍ଦଙ୍କ ମଧ୍ୟରୁ ଜଣଙ୍କୁ ଦାୟିତ୍ୱ ପ୍ରଦାନ କଲେ ଦଳରେ ନେତୃତ୍ୱ ଓ ଜନସାଧାରଣଙ୍କ ମଧ୍ୟରେ ଗ୍ରହଣୀୟତା ବୃଦ୍ଧି ପାଇବ ବୋଲି ଯୁକ୍ତି ରଖିଛନ୍ତି। ପୂର୍ବତନ ପିସିସି ସଭାପତି ଜୟଦେବ ଜେନା ଓ ଶରତ ପଟ୍ଟନାୟକ ଏହି ପଦବୀ ଦୌଡ଼ରୁ ନିଜକୁ ଦୂରରେ ରଖିଥିବାବେଳେ ବରିଷ୍ଠ କଂଗ୍ରେସ ନେତା ଭକ୍ତରଣ ଦାସ କିମ୍ବା ବିଧାୟକଙ୍କ ମଧ୍ୟରୁ ହିଁ ପିସିସି ସଭାପତି ହେବେ ବୋଲି ଦଳୀୟ ମହଲରୁ ଶୁଣିବାକୁ ମିଳିୁଛି।
