କେନ୍ଦୁଝର,୧୪ା୧୦(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ପାଟଣା ବ୍ଲକ ଯମୁନାପଶି ପଞ୍ଚାୟତକୁ ମଦମୁକ୍ତ କରିବା ପାଇଁ ଶତାଧିକ ମହିଳା ଏକାଠି ହୋଇ ପ୍ରତିବାଦ କରିଛନ୍ତି। ସରକାରୀ ଲାଇସେନ୍ସପ୍ରାପ୍ତ ଓ ଚୋରାମଦ ବିକ୍ରିକୁ ବିରୋଧ କରିଛନ୍ତି। ମଦ ଯୋଗୁ ଗ୍ରାମରେ ତଥା ପରିବାରରେ ଅଶାନ୍ତି ବଢୁଛି ା ଘରେ ସ୍ବାମୀ ଓ ସ୍ତ୍ରୀ ପାଇଁ କଳିଗୋଳ ଓ ମାରପିଟ୍ ହେଉଛି। ଝିଅବୋହୂ ପଦାକୁ ବାହାରିପାରୁ ନ ଥିବା ବେଳେ ଅପରାଧ ବଢୁଛି ବୋଲି କହିଛନ୍ତି। ଏଣୁ ଏହାର ପ୍ରତିବାଦରେ ଆଜି ମହିଳାମାନେ ବରୁଡିପଶି ଗ୍ରାମରୁ ପ୍ଲାକାର୍ଡ ଧରି ଏବଂ ମଦ ବିରୋଧରେ ସ୍ଲୋଗାନ ଦେଇ ଏକ ଶୋଭାଯାତ୍ରାରେ ବାହାରି ପଦ୍ମକେଶରପୁର, ପଦ୍ମପୁର, କୋଡଖମଣ, ଯମୁନାପଶି, ଗୋଡ଼ିପୋଖରୀ ଗ୍ରାମ ଆଦି ପରିକ୍ରମା କରି ଲୋକଙ୍କୁ ସଚେତନ କରିଥିଲେ। ପଞ୍ଚାୟତରେ ମଦ ବିକ୍ରି ବନ୍ଦ ପାଇଁ ସ୍ଥାନୀୟ ସରପଞ୍ଚ ଶଶିଭୂଷଣ ନାଏକଙ୍କୁ ଦାବିପତ୍ର ପ୍ରଦାନ କରିଥିଲେ। ଏହି ଅବସରରେ ଯମୁନାପଶି ହାଟପଡ଼ିଆରେ ଏକ ମଦ ବିରୋଧରେ ସଭା ଆୟୋଜନ ହୋଇଥିଲା। ସଭାରେ ଅଲ୍ ଇଣ୍ଡିଆ ମହିଳା ସାଂସ୍କୃତିକ ସଂଗଠନର ଦ୍ରୌପଦୀ ମହାନ୍ତ ଓ ଅଲ୍ ଇଣ୍ଡିଆ କିଷାନ କ୍ଷେତ ମଜଦୂର ସଂଗଠନର ପ୍ରକାଶ ମଲ୍ଲିକ ଉଦ୍ବୋଧନ ଦେଇ ମଦ ଦ୍ୱାରା ସମାଜରେ କୁସଂସ୍କାର ଓ ଅସାମାଜିକ କାମ ବଢୁଥିବାରୁ ସମ୍ପୂର୍ଣ୍ଣ ନିଷେଧ କରିବାକୁ ଦାବି କରିବା ସହ ଏହି ଆନ୍ଦୋଳନରେ ସାମିଲ ହେବାକୁ ଆହ୍ବାନ କରିଥିଲେ। ଓ୍ବାର୍ଡମେମ୍ବର ତେଜସ୍ବିନୀ ନାଏକ, ଆରତି ନାଏକ, ସବିତା ମହାକୁଡ, ଲକ୍ଷ୍ମୀପ୍ରିୟା ନାଏକ, ହୀରାମଣି ନାଏକ, ମଞ୍ଜୁଲତା ମହାନ୍ତଙ୍କ ନେତୃତ୍ୱରେ ଶୋଭାଯାତ୍ରା ଅନୁଷ୍ଠିତ ହୋଇଥିବା ବେଳେ ମଦ ବନ୍ଦ ନ ହେଲେ ଆଗାମୀ ଦିନରେ ଆନ୍ଦୋଳନକୁ ଜୋରଦାର କରାଯିବ ବୋଲି ଚେତାବନୀ ଦେଇଛନ୍ତି।
