ମହାକାଳପଡ଼ା,୧୭।୭(ଡି.ଏନ୍.ଏ.) : କେନ୍ଦ୍ରାପଡ଼ା ଜଲା ମହାକାଳପଡ଼ା ବ୍ଲକ ଅଞ୍ଚଳରେ ଦିନକୁ ଦିନ ନାବାଳିକା ବିବାହ ବୃଦ୍ଧି ପାଇବାରେ ଲାଗିଛି। କମ୍ ବୟସରେ ନାବାଳିକା ବିବାହ କରିବା ପରେ ସେମାନେ ମାତୃତ୍ୱ ଲାଭ କରୁଛନ୍ତି। ମା’ ହେବା ଦ୍ୱାରା ସେମାନଙ୍କ ଜୀବନ ପ୍ରତି ବିପଦ ଦେଖା ଦେଇଛି। ଏଠାରେ ନାବାଳିକାଙ୍କ ଜନ୍ମ ତାରିଖକୁ ଆଧାର କେନ୍ଦ୍ରରେ ଏଡିଟିଂ ବା ଟ୍ୟାମ୍ପରିଂ (ଜାଲିଆତି) କରାଯିବା, ସ୍ଥାନୀୟ ଲୋକଙ୍କ ସମ୍ପୃକ୍ତି ସହ ମା’ବାପାଙ୍କ ସ୍ବୀକୃତି ଏବଂ ପ୍ରଶାସନିକ ଅଧିକାରୀଙ୍କ ସଚେତନତା ଅଭାବ ଯୋଗୁ ଏହି ସମସ୍ୟା ଦେଖିବାକୁ ମିଳିଛି। ବ୍ଲକର ବତୀଘର, ଜମ୍ବୁ, ସୁନୀତି, କେବି ଦାଣ୍ଡୁଆ, ବଉଳକଣି, ପେଟଛେଲା, ରାମନଗର ଓ ଖରିନାସୀ ଆଦି ପଞ୍ଚାୟତରେ ବହୁଳ ଭାବେ ନାବାଳିକା ବିବାହ ହେଉଛି। ଅପରପକ୍ଷେ ଏହି ବିବାହ ପାରମ୍ପରିକ ବଙ୍ଗ ଭାଷାଭାଷୀ ସମାଜରେ ବହୁଳ ଭାବେ ଦେଖିବାକୁ ମିଳେ। ଏହି ସମାଜରେ ୧୨ରୁ ୧୬ ବର୍ଷ ବୟସର ନାବାଳିକାଙ୍କୁ ଗୁପ୍ତରେ ବିବାହ କରାଯାଏ। ତେବେ ଏପରି ବିବାହକୁ ଲୁଚିଛପି ମଠ, ମନ୍ଦିର ଓ ଧର୍ମାନୁଷ୍ଠାନରେ ପରିବାର ପରିଜନ ଓ ଦଲାଲମାନେ ମୋଟାଅଙ୍କର ଅର୍ଥ ନେଇ ସହାୟତା କରିଥାନ୍ତି। ଆଇନ ଅନୁସାରେ ଏହି ବିବାହକୁ ବାରଣ କରାଯାଇଛି। ଏହି ବିବାହ ଏକ ସାମାଜିକ ବ୍ୟାଧି। ଏଥିରେ ସମ୍ପୃକ୍ତ ଥିବା ପରିବାର ଓ ଦଲାଲମାନେ ଆଇନ ଜାଲରେ ଛନ୍ଦିହେବାର ବ୍ୟବସ୍ଥା ରହିଛି।
ସେହିପରି ନିଜ ନାମ ଗୋପନ ରଖିବା ସର୍ତ୍ତରେ କେତେଜଣ ଅଙ୍ଗନଓ୍ବାଡି କର୍ମୀ କହିବା କଥା, ୧୭ ବର୍ଷର ଅନେକ ନାବାଳିକା ବିବାହ କରୁଥିବାରୁ ସେମାନେ ମମତା ଯୋଜନାରେ ସାମିଲ ହୋଇପାରୁନାହାନ୍ତି। ମମତା ଯୋଜନାରେ ସାମିଲ ହେବାକୁ ହେଲେ ଜଣେ ମା’ଙ୍କୁ ଅତି କମ୍ରେ ୧୯ ବର୍ଷ ହୋଇଥିବା ଦରକାର। ଅଳ୍ପ ବୟସରେ ବିବାହ କରିବା ଦ୍ୱାରା ସେମାନେ ଶାରୀରିକ, ମାନସିକ ଭାବେ ପ୍ରଭାବିତ ହୋଇଥାନ୍ତି। କମ୍ ବୟସରେ ମାତୃତ୍ୱ ଲାଭ କରିଥାନ୍ତି। ଫଳରେ ପିଲା ଜନ୍ମ ସମୟରେ ଅତ୍ୟଧିକ ରକ୍ତସ୍ରାବ ଯୋଗୁ ମା’ଙ୍କ ମୃତ୍ୟୁ ହେବା ସହ ଶିଶୁଟି ଅପରିପକ୍ୱ ଭାବେ ଜନମ ନେଉଥିବାରୁ ବିକଳାଙ୍ଗ ହେବାର ସମ୍ଭାବନା ଅଧିକ ରହୁଛି। ବର୍ଷକୁ ହାରାହାରି ଏହି ଅଞ୍ଚଳରେ ୧୦୦ରୁ ଅଧିକ ନାବାଳିକା ବିବାହ କରାଯାଉଛି ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି। ଅପରପକ୍ଷରେ ଏକ ସୂତ୍ରରୁ ମିଳିଥିବା ସୂଚନା ଅନୁସାରେ, ୨ ଶହରୁ ଅଧିକ ନାବାଳିକା ମା’ ମମତା ଯୋଜନାରୁ ବାଦ୍ ପଡ଼ିଛନ୍ତି। ଅନେକ କ୍ଷେତ୍ରରେ ନାବାଳିକାଙ୍କ ମା’ ବାପା ପଇସା ଲୋଭରେ ସୁଦୂର ଉତ୍ତରପ୍ରଦେଶର ଝାନ୍ସୀ, ମଥୁରା ଆଦି ସ୍ଥାନରେ ବୟସ୍କ ବ୍ୟକ୍ତିଙ୍କୁ ବିବାହ ଦେଉଥିବା ନଜିର ରହିଛି। ଅନେକ ସମୟରେ ସ୍ଥାନୀୟ ଦଲାଲମାନେ ମୋଟା ଅଙ୍କର ଅର୍ଥ ନେଇ ସୁଦୂର ଉତ୍ତରପ୍ରଦେଶ, କୋଲ୍କାତା ଆଦି ଅଞ୍ଚଳରେ ବୃଦ୍ଧଙ୍କୁ ବିବାହ କରାଉଛନ୍ତି ବୋଲି ଅଭିଯୋଗ ହେଉଛି। ମିଳିଥିବା ସୂଚନା ଅନୁସାରେ, ବ୍ଲକ ଉପକୂଳ ଅଞ୍ଚଳର ଏକ ମନ୍ଦିରରେ ଶୁକ୍ରବାର ବିଳମ୍ବିତ ରାତିରେ ଗୁପ୍ତ ବିବାହ ଚାଲିଥିବା ବେଳେ ସ୍ଥାନୀୟ ଯୁବକମାନେ ଏହାକୁ ବିରୋଧ କରିଥିଲେ। ତରବରିଆ ଭାବେ ବ୍ରାହ୍ମଣ ବିବାହ ସମ୍ପନ୍ନ କରି ଦେଇଥିବା ସ୍ଥାନୀୟ ଲୋକେ କହିଛନ୍ତି।
