ଭୁବନେଶ୍ୱର, ୧୧।୧(ବ୍ୟୁରୋ): କାହାଣୀ ଶୁଣିବାରେ ମଜିବେ ପିଲାମାନେ। ଗପ ଶୁଣିବେ, ଶିକ୍ଷଣୀୟ କଥା ଜାଣିବେ ଏବଂ ଏହା ସାଙ୍ଗକୁ ମନୋରଞ୍ଜନ ବି କରିବେ। ଖାଲି ପିଲା ନୁହେଁ, ବଡ଼ ଲୋକମାନେ ମଧ୍ୟ କାଳ୍ପନିକ କାହାଣୀ ଦୁନିଆରେ ନିଜକୁ ସାମିଲ କରିବେ। କାରଣ ପୁଣିଥରେ ଭୁବନେଶ୍ୱରରେ ଅନୁଷ୍ଠିତ ହେବାକୁ ଯାଉଛି ଅନ୍ତର୍ଜାତୀୟ ଓରାଲ୍ ଷ୍ଟୋରି ଟେଲିଂ ଫେଷ୍ଟିଭାଲ ‘ଭୁଫେଷ୍ଟୋ’। ଆସନ୍ତା ୧୪ରୁ ୧୭ ତାରିଖ ପର୍ଯ୍ୟନ୍ତ ସହରର ବିଭିନ୍ନ ସ୍ଥାନରେ ଏହି ନିଆରା କାର୍ଯ୍ୟକ୍ରମ ଅନୁଷ୍ଠିତ ହେବ। ଇନ୍ଦିରାଗାନ୍ଧୀ ପାର୍କ, ବୁଦ୍ଧ ଜୟନ୍ତୀ ପାର୍କ, ଏପିଜେ ଅବଦୁଲ୍ କଲାମ ପାର୍କ ଏବଂ କଳାଭୂମିଠାରେ ପ୍ରତ୍ୟେକ ଦିନ ଅପରାହ୍ନ ୨ଟା ୩୦ରୁ ସନ୍ଧ୍ୟା ୭ଟା ୩୦ ପର୍ଯ୍ୟନ୍ତ ଲୋକମାନେ କାହାଣୀ ଶୁଣିବେ। ସ୍ଥାନୀୟ ସାହିତ୍ୟ, କବିତା ଓ କାହାଣୀଗୁଡିକର ମହାନତାକୁ ବଞ୍ଚାଇ ରଖିବା ପାଇଁ ଭୁଫେଷ୍ଟୋକୁ ସ୍ବତନ୍ତ୍ର ଭାବେ ପିଲା ଓ ବୟସ୍କ ବ୍ୟକ୍ତିଙ୍କ ପାଇଁ ପ୍ରସ୍ତୁତ କରାଯାଇଛି। ଏହା ଏପରି ଏକ ବହୁମୁଖୀ ପର୍ବ, ଯେଉଁଠାରେ ବିଶ୍ୱର ପ୍ରତିଷ୍ଠିତ ଷ୍ଟୋରି ଟେଲର୍ ବା କଥାକାରମାନେ କାହାଣୀ କହିବେ। ସ୍କୁଲ, କଲେଜ ଓ ବସ୍ତି ସମେତ ବିଭିନ୍ନ ସମୁଦାୟର ଛାତ୍ରୀଛାତ୍ରଙ୍କୁ ଏହି ଇଭେଣ୍ଟରେ ଅଂଶଗ୍ରହଣ କରିବା ପାଇଁ ଏକ ସୁଯୋଗ ଦିଆଯିବ। ବିଶେଷକରି ଦୃଷ୍ଟିହୀନ ଓ ଶ୍ରବଣ ଶକ୍ତି ନ ଥିବା ପିଲାଙ୍କ ସୁବିଧା ପାଇଁ ସାଙ୍କେତିକ ଭାଷାରେ ଏକ ସ୍ବତନ୍ତ୍ର ଭାବେ ଷ୍ଟୋରି ଟେଲିଂ ସେଶନ କରାଯିବ। ବ୍ରାଜିଲ, ସ୍କଟ୍ଲାଣ୍ଡ, ସିଙ୍ଗାପୁର, ଇଣ୍ଡୋନେସିଆ ଓ ଦକ୍ଷିଣ ଆଫ୍ରିକାରୁ ଅନ୍ତର୍ଜାତୀୟ କଥାକାରଙ୍କ ସମେତ ନିଲେଶ ମିଶ୍ରା, ନନ୍ଦିତା ଦାସ, କୁନା ତ୍ରିପାଠୀ, ନୂପୁର ଅଗ୍ରଓ୍ବାଲ, ମୀରା ଦାସ, କପିଲ ପାଣ୍ଡେଙ୍କ ଭଳି ଜାତୀୟ ତଥା ଓଡ଼ିଶାର ଅନେକ ଲୋକପ୍ରିୟ କଥାକାର ଏହି ଇଭେଣ୍ଟରେ ଅଂଶଗ୍ରହଣ କରିବେ।
