ଭୁବନେଶ୍ୱର,୨୭।୧୨(ବ୍ୟୁରୋ):ସେମାନେ ବାସହୀନ ଓ ମାନସିକ ବିକାରଗ୍ରସ୍ତ। କିନ୍ତୁ ଟିକେ ସାହାଯ୍ୟ ସହାନୁଭୂତି ପାଇଲେ ସ୍ବାବଲମ୍ବୀ ହେବାର ଆଶା ସେମାନଙ୍କ ମନରେ ସୃଷ୍ଟି ହୋଇଥାଏ। ଏହାକୁ ଦୃଷ୍ଟିରେ ରଖି ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ ବାସହୀନଙ୍କ ପାଇଁ ଉଦ୍ଦିଷ୍ଟ ଏକାମ୍ର ନୀଳୟରେ ଆରମ୍ଭ ହୋଇଛି ‘ସ୍ବାଭିମାନ କକ୍ଷ’। ବାସହୀନ ତଥା ମାନସିକ ବିକାରଗ୍ରସ୍ତଙ୍କୁ ଭିକ୍ଷାବୃତ୍ତିରୁ ନିବୃତ୍ତ କରିବା ତଥା ସ୍ବାଭିମାନ କରିବା ଉଦ୍ଦେଶ୍ୟରେ ଏହି ଯୋଜନା କରାଯାଇଛି। ରବିବାର ଜନପଥରେ ଆୟୋଜିତ ପଥୋତ୍ସବରେ ‘ସ୍ବାଭିମାନ କକ୍ଷ’ ଷ୍ଟଲ୍ରେ ଲୋକଙ୍କ ଭିଡ଼ ଦେଖିବାକୁ ମିଳିଥିଲା। ଫିନାଇଲ୍, ପାପୋଛ ସହ ଅନ୍ୟାନ୍ୟ ଜିନିଷର ବେଶ୍ ଚାହିଦା ରହିଥିଲା। ମାନସିକ ବିକାରଗ୍ରସ୍ତ ବ୍ୟକ୍ତିଙ୍କୁ ବିଭିନ୍ନ ଘରୋଇ ଉପକରଣ ପ୍ରସ୍ତୁତି ପାଇଁ ପ୍ରାୟ ୧ମାସ ହେଲା ଏକାମ୍ର ନୀଳୟରେ ତାଲିମ ପ୍ରଦାନ ଆରମ୍ଭ ହୋଇଛି। ଓଡ଼ିଶା ପତିତା ଉଦ୍ଧାର ସମିତି ପକ୍ଷରୁ ଏହି ସମସ୍ତ କାର୍ଯ୍ୟ ପରିଚାଳନା କରାଯାଉଛି।
ଏକାମ୍ର ନୀଳୟରେ ୯୬ ଅନ୍ତେବାସୀ ରହିଥିବାବେଳେ ୧୫ ଜଣ ମାନସିକ ବିକାରଗ୍ରସ୍ତଙ୍କୁ ସ୍ବାବଲମ୍ବୀ କରିବା ପାଇଁ ଏହି କାର୍ଯ୍ୟକ୍ରମରେ ସାମିଲ କରାଯାଇଛି। ସେମାନଙ୍କ ମଧ୍ୟରେ ୯ ମହିଳା ଏବଂ ୬ ଜଣ ପୁରୁଷ ଅଛନ୍ତି। ଫିନାଇଲ୍ ବୋତଲ, ଝୋଟ ଓ ନଡ଼ିଆ କତାରୁ ବିଭିନ୍ନ ଘରୋଇ ଉପକରଣ ପ୍ରସ୍ତୁତ କରୁଛନ୍ତି। ବର୍ତ୍ତମାନ ସେମାନଙ୍କୁ ହାତଖର୍ଚ୍ଚ ଦିଆଯାଉଥିବା ଓଡ଼ିଶା ପତିତା ଉଦ୍ଧାର ସମିତିର ସମ୍ପାଦିକା ଆଭାରାଣୀ ଚୌଧୁରୀ କହିଛନ୍ତି। ସେମାନେ ନିଜର ଆଧାର କାର୍ଡ ହଜାଇ ଦେଇଥିବାରୁ ବ୍ୟାଙ୍କରେ ଖାତା ଖୋଲିବା ସମ୍ଭବ ହୋଇ ନ ଥିବା ସେ କହିଛନ୍ତି। ଆଗାମୀ ଦିନରେ କାମ କରୁଥିବା ଲୋକଙ୍କୁ ସେମାନଙ୍କ ପାରିଶ୍ରମିକ ସିଧା ବ୍ୟାଙ୍କଖାତାକୁ ପଠାଯିବ ବୋଲି ସେ ସୂଚନା ଦେଇଛନ୍ତି।
