ଭଦ୍ରକ ଅଫିସ,୧୧।୧୧: ଭଦ୍ରକ ପୌରପାଳିକା ବିବାଦ ତୁଟୁନି। ଗତ ଜୁନ୍ରେ ପୌର ଉପାଧ୍ୟକ୍ଷା ଓ ନିର୍ବାହୀ ଅଧିକାରୀଙ୍କ ମଧ୍ୟରେ ବିବାଦ ଦେଖାଦେଇଥିବା ବେଳେ ଏବେ ପୌରାଧ୍ୟକ୍ଷା ଏବଂ ନିର୍ବାହୀ ଅଧିକାରୀଙ୍କ ମଧ୍ୟରେ ବିବାଦ ସୃଷ୍ଟି ହୋଇଛି। ପୌରାଧ୍ୟକ୍ଷା ଗୁଲମକ୍କୀ ହବିବ ନିର୍ବାହୀ ଅଧିକାରୀ ଦେବୀପ୍ରସାଦ ରାଉତଙ୍କୁ ଏକ ଚିଠି ଲେଖି ଦରମା କାହିଁକି ବନ୍ଦ କରା ନ ଯିବ ଓ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ କାହିଁକି ଗ୍ରହଣ କରା ନ ଯିବ ବୋଲି କୈଫିୟତ ତଲବ କରିଛନ୍ତି। ପୌରାଧ୍ୟକ୍ଷା ଉକ୍ତ ଚିଠିରେ ନିର୍ବାହୀ ଅଧିକାରୀଙ୍କ ଉଦ୍ଦେଶ୍ୟରେ ଲେଖିଛନ୍ତି, ଆପଣ ପୌର ଆଇନକୁ ଠିକ୍ ଭାବେ ବୁଝିନାହାନ୍ତି। ଉନ୍ନୟନ କାର୍ଯ୍ୟକୁ ଠିକ୍ ଭାବେ ପରିଚାଳନା କରୁନାହାନ୍ତି। ଆପଣ କ୍ଷେତ୍ରରେ ଉପସ୍ଥିତ ରହୁ ନ ଥିବାରୁ ଲୋକଙ୍କ ସମସ୍ୟାର ସମାଧାନ ସମ୍ଭବ ହେଉନାହିଁ। ମନଇଚ୍ଛା ଅଫିସ ଚଳାଉଛନ୍ତି। ବିଭିନ୍ନ ୱାର୍ଡରେ ଚାଲିଥିବା ଉନ୍ନୟନ କାର୍ଯ୍ୟ ଓ ସରକାରୀ ଯୋଜନାର କ୍ଷେତ୍ରୀୟ ତଦାରଖ କରୁନାହାନ୍ତି। ଏପରିକି ଏ ସମସ୍ତ ବିଷୟରେ ମୋ ସହ କୌଣସି ଆଲୋଚନା କରୁନାହାନ୍ତି। ଦୈନନ୍ଦିନ କାର୍ଯ୍ୟ ସମ୍ବନ୍ଧରେ ଅବଗତ କରୁନାହାନ୍ତି। ସରକାରଙ୍କ ମୁକ୍ତା ଯୋଜନା, ଖାଦ୍ୟ ନିରାପତ୍ତା ଯୋଜନା, ଭତ୍ତା, ଉଦ୍ୟାନ ନିର୍ମାଣଠାରୁ ଆରମ୍ଭ କରି ଅନେକ ସରକାରୀ ଯୋଜନା ବାବଦରେ ମୋତେ କୌଣସି ସୂଚନା ଦିଆଯାଉ ନାହିଁ। ଏଣୁ ଓସିଏସ୍ ନିୟମାନୁଯାୟୀ କାହିଁକି ଆପଣଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆ ନ ଯିବ ଓ ନଭେମ୍ବର ମାସର ଦରମା କାହିଁକି ବନ୍ଦ କରା ନ ଯିବ, ଏନେଇ ୩ ଦିନ ମଧ୍ୟରେ କୈଫିୟତ ଦିଅନ୍ତୁ ବୋଲି ସେ ଚିଠିରେ ଉଲ୍ଲେଖ କରିଛନ୍ତି। ଏହି ଚିଠିର ନକଲ ସେ ଜିଲାପାଳ, ଟ୍ରେଜେରୀ ଅଫିସର ଓ ନଗର ଉନ୍ନୟନ ବିଭାଗ ଅତିରିକ୍ତ ସଚିବଙ୍କୁ ପ୍ରଦାନ କରିଛନ୍ତି।
ଏନେଇ ପୌରାଧ୍ୟକ୍ଷା କହିଛନ୍ତି, ବିଭିନ୍ନ କାମ ସମ୍ବନ୍ଧରେ ମୋତେ କୌଣସି ସୂଚନା ଦେଉନାହାନ୍ତି, ଯାହାଦ୍ୱାରା ବିଭିନ୍ନ ୱାର୍ଡ ପରିଦର୍ଶନ ସମୟରେ ଲୋକେ ପଚାରୁଥିବା ପ୍ରଶ୍ନର ଉତ୍ତର ମଁୁ ଦେଇପାରୁ ନାହିଁ। ନିର୍ବାହୀ ଅଧିକାରୀ ମୋ ସହ ଯୋଗାଯୋଗରେ ରହୁନାହାନ୍ତି। ଅପରପକ୍ଷେ ନିର୍ବାହୀ ଅଧିକାରୀ ଦେବୀପ୍ରସାଦ ରାଉତ କହିଛନ୍ତି, ଏପରି ଚିଠି ଲେଖିବାର କ୍ଷମତା ପୌରାଧ୍ୟକ୍ଷାଙ୍କର ନାହିଁ। ସେ ନିଜ କ୍ଷମତା ବାହାରକୁ ଯାଇ ଏପରି ଚିଠି ଲେଖିଛନ୍ତି। ସେହିପରି ୪ଦିନ ତଳେ ପୌରାଧ୍ୟକ୍ଷା ଉପାଧ୍ୟକ୍ଷାଙ୍କ କାର୍ଯ୍ୟାଳୟରେ ତାଲା ପକାଇ ଦେଇଛନ୍ତି। ଏନେଇ ପୌରାଧ୍ୟକ୍ଷା କହିଛନ୍ତି, ଉପାଧ୍ୟକ୍ଷାଙ୍କୁ ବସିବା ପାଇଁ ଦିଆଯାଇଥିବା କୋଠରୀରେ ଲକ୍ଷାଧିକ ଟଙ୍କାର କାମ ଚାଲିଛି। ଏହି କାମ ପାଇଁ କେଉଁ ଫଣ୍ଡରୁ ଟଙ୍କା ଆସିଛି ଓ କିଏ ଏହି କାମ କରୁଛନ୍ତି, ସେ ବିଷୟରେ ଜାଣିବା ନିମନ୍ତେ ଗତ ସେପ୍ଟେମ୍ବର ୨୮ରୁ ନିର୍ବାହୀ ଅଧିକାରୀଙ୍କୁ ଲିଖିତ ଭାବେ ଜଣାଇଥିଲେ। ଦେଢ଼ମାସ ବିତିଯାଇଥିଲେ ମଧ୍ୟ ଏ ସମ୍ପର୍କରେ ନିର୍ବାହୀ ଅଧିକାରୀ ଲିଖିତ ଭାବେ କୌଣସି ସୂଚନା ଦେଇ ନ ଥିବାରୁ ଉପାଧ୍ୟକ୍ଷାଙ୍କ ଅଫିସ୍ରେ ତାଲା ପକାଇଛନ୍ତି। ଗୁରୁବାର ଉପାଧ୍ୟକ୍ଷା ଅଞ୍ଜୁବାଳା ଜେନା ପୌର କାର୍ଯ୍ୟାଳୟକୁ ଆସିଥିବା ବେଳେ ତାଙ୍କ କୋଠରୀରେ ତାଲା ପଡ଼ିଥିଲା। ପୌର ନିର୍ବାହୀ ଅଧିକାରୀ ଚାବି ମାଗିବାରୁ ଉକ୍ତ କୋଠରୀରେ କରାଯାଉଥିବା କାର୍ଯ୍ୟ ବାବଦରେ ତଦନ୍ତ ପୂର୍ବକ ସବିଶେଷ ତଥ୍ୟ ଲିଖିତ ଭାବେ ପ୍ରଦାନ କରିବା ପରେ ତାଲା ଖୋଲାଯିବ ବୋଲି ପୌରାଧ୍ୟକ୍ଷା କହିଛନ୍ତି।
