ସମ୍ବଲପୁର,୮ା୪ (ବ୍ୟୁରୋ): ଦେଶର ଅନ୍ୟ ଅଭୟାରଣ୍ୟ ତୁଳନାରେ ସମ୍ବଲପୁରର ଡେବ୍ରିଗଡ ଅଭୟାରଣ୍ୟକୁ ୨୦୨୨-୨୩ ବର୍ଷରେ ସର୍ବାଧିକ ପର୍ଯ୍ୟଟକ ଆସିଛନ୍ତି। ଏହି ବର୍ଷରେ ଏଠାରେ ଥିବା ଇକୋ ଟୁରିଜମରୁ ୨ କୋଟି ୫୦ ଲକ୍ଷ ଟଙ୍କା ରାଜସ୍ବ ଆଦାୟ ହୋଇଥିବା ବେଳେ ପ୍ରାୟ ୨୭,୦୦୦ ପର୍ଯ୍ୟଟକ ପରିଦର୍ଶନ କରିଛନ୍ତି। ଏହା ମଧ୍ୟରେ ଇଉରୋପୀୟ ଦେଶ, ଦକ୍ଷିଣ ଆଫ୍ରିକା, କାଲିଫର୍ଣ୍ଣିଆ, ସିଡ୍ନୀ ପ୍ରଭୃତି ଦେଶର ପର୍ଯ୍ୟଟକ ରହିଛନ୍ତି। ଡେବ୍ରିଗଡର ପ୍ରକୃତି ଶିବିରରେ ୬୦୦୦ରୁ ଅଧିକ ପରିଦର୍ଶକ ରାତ୍ର ରହଣୀ କରିଛନ୍ତି। ସମୁଦାୟ ପର୍ଯ୍ୟଟକଙ୍କ ଭିତରୁ ପ୍ରାୟ ୧୦% ବିଦେଶୀ ରହିଛନ୍ତି। ସଫାରି ପ୍ୟାକେଜ୍, ହୀରାକୁଦ କ୍ରୁଜ୍ ଓ ଦ୍ୱୀପ ଥିବା ଯୋଗୁ ପର୍ଯ୍ୟଟକଙ୍କୁ ଏହା ଆକର୍ଷିତ କରୁଛି ବୋଲି ହୀରାକୁଦ ବନ୍ୟପ୍ରାଣୀ ଡିଏଫ୍ଓ ଅଂଶୁପ୍ରଜ୍ଞା ଦାସ କହିଛନ୍ତି।
ସେ ଆହୁରି କହିଛନ୍ତି, ୧୨,୦୦୦ରୁ ଅଧିକ ପରିଦର୍ଶକ ଅଭୟାରଣ୍ୟର ଜଙ୍ଗଲ ସଫାରିରେ ଭ୍ରମଣ କରିଛନ୍ତି। ଅଭୟାରଣ୍ୟରେ ସମ୍ବର, ହରିଣ, ଭାଲୁ, ୱାଇଲ୍ଡବୋର୍, ମୟୂର ଆଦି ବନ୍ୟପ୍ରାଣୀ ରହିଛନ୍ତି। ହୀରାକୁଦ ହ୍ରଦ କୂଳରେ ଚିତାବାଘ ଦେଖିବା ମଧ୍ୟ ନିଶ୍ଚିତ ହୋଇଛି। ଡିସେମ୍ବର ଓ ଜାନୁୟାରୀ ମାସରେ ପ୍ରଥମଥର ପାଇଁ ବେଙ୍ଗଲ ଟାଇଗର ଦେଖିବାକୁ ମିଳିଥିଲା। ଗତବର୍ଷ ୧୬,୦୦୦ ପର୍ଯ୍ୟଟକ ଆସିଥିବାବେଳେ ୧.୫ କୋଟି ଟଙ୍କା ଆୟ ହୋଇଥିଲା। ୨୫୦୦ରୁ ଅଧିକ ପରିଦର୍ଶକ ହୀରାକୁଦ୍ ଆର୍ଦ୍ରଭୂମିରେ ଡଙ୍ଗା ଚାଳନା କରିଛନ୍ତି। ଦେବ୍ରିଗଡ ଇକୋଟୁରିଜିମରୁ ଅଞ୍ଚଳବାସୀ ଜୀବିକା ନିର୍ବାହ କରୁଛନ୍ତି। ୫ ଗାଁର ୪୫ରୁ ଅଧିକ ପରିବାର ଏହି କାର୍ଯ୍ୟରେ ନିୟୋଜିତ ଅଛନ୍ତି ବୋଲି ଡିଏଫ୍ଓ ଦାସ କହିଛନ୍ତି।
