ଭୁବନେଶ୍ୱର,୧୭।୭ (ବନ୍ଦନା ସେଠୀ): ଆଜିଠାରୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରହିବ ୟୁନିଟ-୨ ସ୍ଥିତ ମାର୍କେଟ ବିଲ୍ଡିଂ। ସ୍ଥାୟୀ ଅସ୍ଥାୟୀ ଦୋକାନୀଙ୍କ ମଧ୍ୟରେ ଥିବା ବିବାଦ ତୁଟୁ ନ ଥିବାବେଳେ ଏନେଇ ବିଏମ୍ସି କୌଣସି ଦୃଢ଼ ପଦକ୍ଷେପ ନେଉନାହିଁ। ଫଳରେ ମାର୍କେଟ ବିଲ୍ଡିଂ ଭିତରେ ଏବେ ଉଠାଦୋକାନୀମାନେ ଏକ ପ୍ରକାର କବ୍ଜା କରିସାରଲେଣି। ଏନେଇ ସେଣ୍ଟ୍ରାଲ ମାର୍କେଟ ଆସୋସିଏଶନ୍ ବାରମ୍ବାର ବିଏମ୍ସିର ଦୃଷ୍ଟି ଆକର୍ଷଣ କରୁଥିଲେ ମଧ୍ୟ କିଛି ସୁଫଳ ମିଳୁନାହିଁ। କେବଳ ନାମକୁ ମାତ୍ର ଲୋକଦେଖାଣିଆ ଭାବେ ଉଠାଦୋକାନୀଙ୍କୁ ଉଠାଇ ପୁଣି ବସିବାର ସୁଯୋଗ ଦିଆଯାଉଛି। ଗୁରୁବାର ଆସୋସିଏଶନ ପକ୍ଷରୁ ଏକ ଖବରଦାତା ସମ୍ମିଳନୀ କରାଯାଇ ଉଠାଦୋକାନୀଙ୍କୁ ଉଠାଇବା ପାଇଁ ବିଏମ୍ସିକୁ ୩ଦିନ ସମୟ ଦିଆଯାଇଥିଲା। ମାତ୍ର ଏହା ମଧ୍ୟରେ ବିଏମ୍ସି ଆସୋସିଏଶନକୁ ଆଲୋଚନା ପାଇଁ ଡାକିବା ତ ଦୂରର କଥା କୌଣସି ଉତ୍ତର ମଧ୍ୟ ରଖିନାହିଁ। ଏଥିରୁ ବିଏମ୍ସି ପରୋକ୍ଷ ଭାବେ ଉଠାଦୋକାନୀଙ୍କୁ ସମର୍ଥନ କରୁଥିବା ଆସୋସିଏଶନ ପକ୍ଷରୁ ଅଭିଯୋଗ କରାଯାଇଛି। ତେଣୁ ସୋମବାରଠାରୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ମାର୍କେଟ ବିଲ୍ଡିଂ ବନ୍ଦ କରିବା ନେଇ ଆସୋସିଏଶନ ନିଷ୍ପତ୍ତି ନେଇଛି। ଏଥିସହ ସେହିଠାରେ ସ୍ଥାୟୀ ଦୋକାନୀମାନେ ଧାରଣା ଦେବେ ବୋଲି ସୂଚନା ଦିଆଯାଇଛି। ଅପରପକ୍ଷେ ଘଟଣା ସମ୍ପର୍କରେ ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେ କହିଛନ୍ତି, ଉଠାଦୋକାନୀଙ୍କ ମଧ୍ୟରୁ ଅନେକ କୋର୍ଟରୁ ଷ୍ଟେ’ ଅର୍ଡର ଆଣିଥିବାରୁ ସେମାନଙ୍କୁ ଉଚ୍ଛେଦ କରିବା ସମ୍ଭବ ହୋଇପାରୁନି। ତେବେ ଏନେଇ ପଦକ୍ଷେପ ନିଆଯାଉଛି। ଆବଶ୍ୟକ ପଡିଲେ ଆସୋସିଏଶନ ସହିତ ଏନେଇ ଆଲୋଚନା କରାଯିବ। ସେହିପରି ବିଏମ୍ସି ଅଧିକାରୀଙ୍କ ବିପକ୍ଷରେ ଆସୋସିଏଶନ ଆଣୁଥିବା ଅଭିଯୋଗ ଭିତ୍ତିହୀନ। କୌଣସି ଅଧିକାରୀ ବଟି ନେଇ ଉଠାଦୋକାନୀଙ୍କୁ ବସିବାକୁ ପ୍ରଶୟ ଦେଉନାହାନ୍ତି। ଯଦି ଆସୋସିଏଶନ ଏଭଳି ଅଭିଯୋଗ ଆଣୁଛି ତେବେ ଏହାର ପ୍ରମାଣ ରଖିବା ପାଇଁ କମିଶନର କହିଛନ୍ତି।
ସୂଚନାଯୋଗ୍ୟ, ପ୍ରାୟ ୨ଶହ ଉଠାଦୋକାନୀଙ୍କ କବଳରେ ଏବେ ମାର୍କେଟ ବିଲ୍ଡିଂ ରହିଛି। ଉଠାଦୋକାନୀଙ୍କ ପାଇଁ ମାର୍କେଟ ବିଲ୍ଡିଂର ସୌନ୍ଦର୍ଯ୍ୟକରଣ ନଷ୍ଟ ହେଉଥିବାବେଳେ ଅନେକ ସମୟରେ ଛିନ୍ତାଇ ଭଳି ଅପରାଧ ଘଟୁଛି। ଏଥିସହ ରାସ୍ତା ଅବରୋଧ ପାଇଁ ଗ୍ରାହକମାନଙ୍କ ଯାତାୟାତରେ ସମସ୍ୟା ଉପୁଜୁଛି। ଏନେଇ ଆସୋସିଏଶନ ବିଏମ୍ସିରେ ବହୁବାର ଅଭିଯୋଗ କରିବା ସହ ମାର୍କେଟ ବିଲ୍ଡିଂକୁ ସମ୍ପୂର୍ଣ୍ଣ ଭାବେ ଉଠାଦୋକାନୀମୁକ୍ତ କରିବାକୁ ଦାବି କରି ଆସୁଛି। ମାତ୍ର ଏହାର ସ୍ଥାୟୀ ସମାଧାନ ବାହାରିପାରୁ ନ ଥିବାରୁ ଆସୋସିଏଶନ୍ ପକ୍ଷରୁ ଅସନ୍ତୋଷ ପ୍ରକାଶ କରାଯାଇଛି। ଏଥିସହ ବିଏମ୍ସିର କିଛି ଅଧିକାରୀ ମାସିକିଆ ବଟି ନେଇ ଉଠାଦୋକାନୀଙ୍କୁ ପ୍ରଶ୍ରୟ ଦେଉଥିବା ଅଭିଯୋଗ କରିଛି।
