ଟ୍ରେନଟନ୍: ନ୍ୟୁଜର୍ସିର ବାସିନ୍ଦା ଡ୍ୟାନ୍ ତାଙ୍କ ପ୍ରେମିକା ଶେରୀ ଫୁନ୍ଶଙ୍କୁ ଏପରି ଏକ ଉପହାର ଦେଇଛନ୍ତି, ସେଥିପାଇଁ ଏବେ ସେ ଚର୍ଚ୍ଚାରେ ଅଛନ୍ତି। ଦୁହେଁ ଡେଟିଂ କରିବାବେଳେ ଶେରୀଙ୍କ ପାଇଁ ଡ୍ୟାନ୍ ଏକ ସୁନାର ମହଲ କରିବେ। ତା’ ପରେ ବିବାହ କରିବେ ବୋଲି କଥା ଦେଇଥିଲେ। ସେ ନିଜ କଥା ରଖି ବିବାହ ପୂର୍ବରୁ ଶେରୀଙ୍କ ପାଇଁ ଏକ ସୁନ୍ଦର ମହଲ ତିଆରି କଲେ। ଏଥିଲାଗି ସେ କୋଟି କୋଟି ଟଙ୍କା ମଧ୍ୟ ଖର୍ଚ୍ଚ କଲେ। ହେଲେ ଏବେ ସେ ସେହି ଘରକୁ ବିକ୍ରି କରିବାକୁ ଚାହୁଁଛନ୍ତି। ରିପୋର୍ଟ ମୁତାବକ, ଶେରୀ ଏବଂ ଡ୍ୟାନ୍ ୨୦୦୫ରେ ପ୍ରଥମ ଦେଖାରେ ଭଲ ପାଇ ବସିଥିଲେ। ସେତେବେଳେ ଡ୍ୟାନ୍ ଏହି ଉପହାର କଥା କହିଥିଲେ। ସେଥିପାଇଁ ସେ ୨୦୦୭ରେ ୨ ମିଲିୟନ ଡଲାର ଅର୍ଥାତ୍ ୧ କୋଟି ୬୬ ଲକ୍ଷରୁ ଊର୍ଦ୍ଧ୍ୱ ମୂଲ୍ୟର ଏକ ଜାଗା କିଣି ସେଠାରେ ଏକ ସୁନ୍ଦର ମହଲ ନିର୍ମାଣ କରିଥିଲେ। ସେତେବେଳେ ଏହି ମହଲ ନିର୍ମାଣରେ ୧୩୩ କୋଟି ଟଙ୍କା ଖର୍ଚ୍ଚ ହୋଇଥିଲା। କିନ୍ତୁ ଏବେ ସେ ମହଲକୁ ୫୦ କୋଟି କମ୍ ମୂଲ୍ୟରେ ବିକ୍ରି କରିବାକୁ ଚାହୁଁଛନ୍ତି। ସେହି ସୁନାର ମହଲ ନିର୍ମାଣରେ ୨୨ କ୍ୟାରେଟ ସୁନା ପରସ୍ତର ୪୭ ହଜାର ଶିଟ୍ ବ୍ୟବହୃତ ହୋଇଥିଲା। ଉକ୍ତ ମହଲରେ ୮ ବେଡ୍ରୁମ୍, ୧୩ ଫାୟାର ପ୍ଲେସ୍, ଗୋଟିଏ ହୋମ୍ ଥିଏଟର, ୨ଟି ବାର୍ ରହିଛି। ମହଲ ଦ୍ୱାର ଖୋଲିବାମାତ୍ରେ ସିଣ୍ଡ୍ରେଲା ଶିଡ଼ି ଦେଖିବାକୁ ମିଳିବ, ଯାହା ଧଳା ମାର୍ବଲରେ ନିର୍ମିତ। ଏହା ଉପରେ ସୁନାର ପରସ୍ତ ମଧ୍ୟ ରହିଛି। ଶେରୀ ଏହି ମହଲକୁ ସ୍ବର୍ଗ ବୋଲି କହିଛନ୍ତି। ହେଲେ ଏହି ମହଲ ବିକ୍ରି ପଛର କାରଣ ଜଣାପଡ଼ିନି।
