ଭୁବନେଶ୍ୱର, ୧୬।୩(ବ୍ୟୁରୋ): କଂଗ୍ରେସ ପରି ଭାଜପାର କେନ୍ଦ୍ରୀୟ ନେତାମାନେ ଏବେ ଓଡ଼ିଶା ଆସିବା ବନ୍ଦ କରିଦେଲେଣି। ଯିଏ ବି ଆସୁଛନ୍ତି କୌଣସି ସରକାରୀ କାର୍ଯ୍ୟକ୍ରମରେ ଯୋଗଦେବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରି ଫେରିଯାଉଛନ୍ତି। ୨୦୧୪ ପରଠାରୁ ଭାଜପାର କେନ୍ଦ୍ରୀୟ ନେତାମାନେ ଯେପରି ଓଡ଼ିଶା ଉପରେ ଆଖି ପକାଇଥିଲେ ଏବଂ ବାରମ୍ବାର ରାଜ୍ୟ ଗସ୍ତରେ ଆସି ବିଜେଡି ବିରୋଧରେ ପ୍ରଚାର ପ୍ରସାର ଚଳାଇଥିଲେ ସେକଥା ଏବେ ଆଉ ଦେଖିବାକୁ ମିଳୁନାହିଁ। ସଦ୍ୟସମାପ୍ତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଭାଜପାର ଲଢ଼େଇ ଦେଖିଲା ପରେ ଏହା ଅନୁଭବ ହେଉଛି। ଆଉ ଏଭଳିସ୍ଥିତିରେ ପୌର ଭୋଟ୍ ପାଇଁ ଦଳ ତରଫରୁ ସେମିତି କିଛି ପ୍ରସ୍ତୁତି କରାଯାଇଥିବା ମନେ ହେଉନାହିଁ। ସାଧାରଣ ଦିନରେ ଘନଘନ ଓଡ଼ିଶା ଗସ୍ତରେ ଆସୁଥିବା କେନ୍ଦ୍ର ନେତାଙ୍କୁ ନିର୍ବାଚନ ସମୟରେ ଦେଖିବାକୁ ମିଳୁନାହିଁ। ଭାଜପା ରାଜ୍ୟ ସଭାପତି ସମିର ମହାନ୍ତିଙ୍କ ଅବସ୍ଥା ସମାନ। ଏପରି କି ସାମାଜିକ ଗଣମାଧ୍ୟମରେ ସବୁବେଳେ ସକ୍ରିୟ ରହି ଆସୁଥିବା ଭାଜପା ନେତାଙ୍କ ତତ୍ପରତା ପୌର ଭୋଟ୍ ବେଳେ ଦେଖିବାକୁ ମିଳୁନାହିଁ। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ୱିନୀ ବୈଷ୍ଣବଙ୍କ ପୌର ଭୋଟ୍ ପ୍ରଚାର ଲାଗି ଆସିବେ ନାହିଁ ବୋଲି ଦଳର ଜଣେ ନେତା କହିବା ସହ କାହିଁକି ଆଉ ସେ ବିଷୟରେ ଆଲୋଚନା କରିବା ବୋଲି କହି କଥା ବୁଲାଇ ଦେଇଛନ୍ତି। ସବୁ କାର୍ଯ୍ୟକର୍ତ୍ତାଙ୍କ ମନରେ ମଧ୍ୟ ଏହି କଥା ଉଙ୍କି ମାରିଲାଣି।
