କଟକ ଅଫିସ,୧୫ା୯: ସିକନ୍ଦରାବାଦରେ ମୃତ ଓଡ଼ିଆ ଦମ୍ପତି କଟକ କାଫଲା ବଜାର ମହାନ୍ତିପଡ଼ା ବାସିନ୍ଦା ଚନ୍ଦନ ଜେଠୀ (୩୦) ଓ ତାଙ୍କ ସ୍ତ୍ରୀ ମିତାଲି ମହାପାତ୍ର ଜେଠୀଙ୍କ ଶେଷକୃତ୍ୟ ପୁରୀ ସ୍ବର୍ଗଦ୍ୱାରଠାରେ ବୁଧବାର ସମ୍ପନ୍ନ ହୋଇଛି। ପରିବାର ଓ ଆତ୍ମୀୟସ୍ବଜନମାନେ ଅତ୍ୟନ୍ତ ଶୋକାକୁଳ ପରିବେଶରେ ଗୋଟିଏ ଜୁଇରେ ଉଭୟଙ୍କୁ ଶେଷଯାତ୍ରାରେ ବିଦାୟ ଦେଇଥିଲେ। ଚନ୍ଦନଙ୍କ ୩ ଭାଇ ଶୋଭନ୍, ସ୍ପନ୍ଦନ, ସପନ ସରିତ ଓ ମିତାଲିଙ୍କ ଭାଇ ସମୀର ମହାପାତ୍ର ଏକତ୍ର ହୋଇ ମୁଖାଗ୍ନି ଦେଇଥିବା ଜଣାଯାଇଛି। ସୋମବାର ବିଳମ୍ବିତ ରାତିରେ ଏହି ଓଡ଼ିଆ ଦମ୍ପତିଙ୍କ ମୃତ୍ୟୁ ଘଟିଥିଲା। ଏ ସମ୍ପର୍କରେ ଜାଣିବା ପରେ ପରିବାର ଲୋକେ ମଙ୍ଗଳବାର ସିକନ୍ଦରାବାଦ ଯାଇଥିଲେ। ସେଠାରୁ ବିମାନ ଯୋଗେ ଉଭୟଙ୍କ ମୃତଦେହ ଆଣି ଭୁବନେଶ୍ୱର ବିମାନବନ୍ଦରରେ ବୁଧବାର ପହଞ୍ଚତ୍ଥିଲେ। ସେଠାରୁ ଆମ୍ବୁଲାନ୍ସ ଯୋଗେ ଲାଲବାଗ ଥାନା ଅନ୍ତର୍ଗତ କାଫଲା ବଜାର ମହାନ୍ତିପଡ଼ା ନେଇଥିଲେ। ସେଠାରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ସ୍ଥାନୀୟ ଲୋକଙ୍କ ସମେତ ଆତ୍ମୀୟସ୍ବଜନ ଶେଷଦର୍ଶନ ନିମନ୍ତେ ସେଠାରେ ଭିଡ଼ ଜମାଇଥିଲେ। ବିଧାୟକ ଇଂ. ମହମ୍ମଦ ମୋକିମ ପହଞ୍ଚତ୍ ଶୋକସନ୍ତପ୍ତ ପରିବାରବର୍ଗକୁ ସମବେଦନା ଜଣାଇଥିଲେ। ସେଠାରୁ ପୁଣି ଆମ୍ବୁଲାନ୍ସ ଯୋଗେ ମୃତଦେହ ପୁରୀ ସ୍ବର୍ଗଦ୍ୱାରରେ ଶେଷକୃତ୍ୟ ନିମନ୍ତେ ନିଆଯାଇଥିଲା। ସୂଚନାଯୋଗ୍ୟ, ଚନ୍ଦନ ପ୍ରାୟ ଦେଢ଼ବର୍ଷ ତଳେ ବାଲେଶ୍ୱର ଜିଲା ସୋରର ମିତାଲି ମହାପାତ୍ରଙ୍କୁ ବିବାହ କରିଥିଲେ। ବାଙ୍ଗାଲୋରରେ ଚନ୍ଦନ ଏକ ସଫ୍ଟୱେର କମ୍ପାନୀରେ ଓ ମିତାଲି ଏକ ବିଉଟି ପ୍ରଡକ୍ଟ କମ୍ପାନୀରେ କାର୍ଯ୍ୟ କରୁଥିଲେ। ସେମାନେ ଏକ ତାଲିମ କାର୍ଯ୍ୟକ୍ରମରେ ଯୋଗଦେବା ନିମନ୍ତେ ସିକନ୍ଦରାବାଦ ଯାଇଥିଲେ। ସେମାନେ ରହିଥିବା ଲଜ୍ କୋଠାର ତଳ ମହଲାରେ ଥିବା ଏକ ଇ-ବାଇକ୍ ଶୋ’ ରୁମରେ ଭୟାବହ ଅଗ୍ନିକାଣ୍ଡ ଘଟିଥିଲା। ଏହି ନିଅଁା ବ୍ୟାପିଯିବାରୁ ସେମାନେ ଶ୍ୱାସରୁଦ୍ଧ ହୋଇ ପଡିଥିଲେ। ଫଳରେ ସେମାନଙ୍କ ମୃତ୍ୟୁ ଘଟିଥିଲା।
