ତେଲକୋଇ, ୧୧।୮(ଡି.ଏନ.ଏ.): ଚାଷୀ ବହୁଳ ତେଲକୋଇ ଅଞ୍ଚଳରେ ବର୍ଷାର ଅଭାବ ଯୋଗୁ ଅଧିକାଂଶ ଜମି ଶୁଖିଲା ପଡିଛି । ଧାନ, ରୁଆ ବିହୁଡା ଅଧାରେ ରହିଛି। ଚାଷୀ ମାନେ ଧାର କରଜ କରି ଧାନ ବିହନ, ସାର, ଔଷଧ ଆଣିଥିବାରୁ ଏବେ ଚିନ୍ତାରେ ପଡିଛନ୍ତି। ମୌସମୀ ବର୍ଷା ଓ ଲଘୁଚାପ ବର୍ଷା ଏହି ଅଞ୍ଚଳରେ ଏଯାଏ ସକ୍ରିୟ ହୋଇପାରିନାହିଁ। କୃଷି ବିଭାଗ ସୂଚନା ଅନୁଯାୟୀ ଏହି ଅଞ୍ଚଳରେ ୧୬ ହଜାର ହେକ୍ଟରରୁ ଅଧିକା ଚାଷ ଜମି ରହିଛି। ସେହିପରି ୧୨ଟି କ୍ଷୁଦ୍ର ଜଳସେଚନ ରହିଛି। ଏହି ଅଞ୍ଚଳର ଚାଷୀମାନେ ପ୍ରାୟତଃ ଚାଷ ଉପରେ ନିର୍ଭର କରିଥାନ୍ତି ।୨୦୧୯-୨୦ ମସିହାରେ ଅଗଷ୍ଟ ମାସ ସୁଦ୍ଧା ୪୪ ମି.ମି. ବର୍ଷା ହୋଇଥିବା ବେଳେ ଚଳିତ ବର୍ଷ ମାତ୍ର ୨୨ ମି.ମି. ବର୍ଷା ହୋଇଥିବା କୃଷି ବିଭାଗ ପକ୍ଷରୁ ସୂଚନା ଦିଆଯାଇଛି। ଜମିରେ ପାଣି ନ ଥିବାରୁ ଚାଷ କାମ କରି ହେଉନାହିଁ ବୋଲି ଚାଷୀ ଭଦ୍ରସେନ ପ୍ରଧାନ କହିଛନ୍ତି। ସେପଟେ ବର୍ଷାର ଅଭାବ ଯୋଗୁ କ୍ଷୁଦ୍ର ଜଳସେଚନ ଭଣ୍ଡାରରେ ପାଣିର ଅଭାବ ପାଇଁ ଚାଷୀ ମାନେ ମଧ୍ୟ ଜଳସେଚନରୁ ବଞ୍ଚିତ ହେଉଛନ୍ତି। ଏ ସମ୍ପର୍କରେ କୃଷି ବିଭାଗ ଅଧିକାରୀ ଭୁବନେଶର ହାଁସଦା କହିଛନ୍ତି ବର୍ଷାର ଅଭାବ ଯୋଗୁ ଚାଷୀ ପ୍ରଭାବିତ ହୋଇଛନ୍ତି। ଆଗାମୀ ସପ୍ତାହରେ ବର୍ଷା ନ ହେଲେ ଚାଷୀଙ୍କ ସମସ୍ୟା ହେବା ଆଶଙ୍କା ଦେଖାଦେଇଛି। ଏ ନେଇ ପ୍ରତି ସପ୍ତାହରେ ଚାଷ ଉପରେ ଆମ ବିଭାଗ ପକ୍ଷରୁ ଜିଲା କୃଷି ବିଭାଗକୁ ଅବଗତ କରାଯାଉଛି ।
