ମହାକାଳପଡ଼ା,୧୦ା୫(ପ୍ରତାପ ଚନ୍ଦ୍ର ସ୍ବାଇଁ): ୧୭୩୭ ମସିହାଠାରୁ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅନ୍ତର୍ଗତ ରାମନଗର ମୌଜାରେ ମା’ ରାମଚଣ୍ଡୀ ମନ୍ଦିର ରହିଛି। ଏହାର ରକ୍ଷଣାବେକ୍ଷଣ ପାଇଁ କୁଜଙ୍ଗ ରାଜା ଦାନ ଦେଇଥିଲେ ୨୨୦ ଏକରରୁ ଅଧିକ ଭୂସମ୍ପତ୍ତି। ହେଲେ ଭୋଗ ଦଖଲ କରୁଛନ୍ତି ବେଆଇନ ଜବରଦଖଲକାରୀ। ଅପରପକ୍ଷରେ ମା’ ରାମଚଣ୍ଡୀଙ୍କ କୃପା ଓ ମନସ୍କାମନା ଲାଭ କରି ଅନେକ ଶ୍ରଦ୍ଧାଳୁ କେତେକ ମୌଜାରେ ଜମି ଦାନ କରିଥିଲେ ବୋଲି ସ୍ଥାନୀୟ ବାସିନ୍ଦା କହିଛନ୍ତି। ହେଲେ ମା’ଙ୍କ ମେଳଣପଡ଼ିଆ ଓ ବିଜେସ୍ଥଳକୁ ମଧ୍ୟ କେତେକ ଲୋକ ଜବରଦଖଲ କରିଛନ୍ତି। ମା’ଙ୍କ ମେଳଣପଡିଆ ଓ ବିଜେସ୍ଥଳ ପାଇଁ ୭୦ ଏକର ଜମି ରହିଛି। ଅପରପକ୍ଷରେ ଏହି ବ୍ଲକର ଭୋପାଳ, ଗୋଜାବନ୍ଧ, ପେଟ୍ଛେଲା ଓ ବାରଡାଙ୍ଗ ମୌଜାରେ ୧୦୦ ଏକରରୁ ଅଧିକ ଭୂ-ସମ୍ପତ୍ତିକୁ କେତେକ ଜବରଦଖଲକାରୀଙ୍କ ବନ୍ଦୋବସ୍ତରେ ନିଜ ନାମରେ ରେକର୍ଡଭୁକ୍ତ କରିଛନ୍ତି। ଏମାନେ ମା’ଙ୍କୁ ବର୍ଷକରେ ଥରେ ଜମିର ପାଉଣା ଦେବାର ନାଁ ଧରୁନାହାନ୍ତି।।
ଯେଉଁମାନେ ମା’ଙ୍କ ଜମି ଜବରଦଖଲ କରି ନେଉଛନ୍ତି, ସେମାନେ ପ୍ରଭାବଶାଳୀ ବୋଲି ସ୍ଥାନୀୟ ବାସିନ୍ଦା କହିଛନ୍ତି। ରାଜ୍ୟ ସରକାରଙ୍କ ଆଇନ ବିଭାଗ ପକ୍ଷରୁ ୧୯୭୨ରେ ପ୍ରଥମ ଥର ଏଣ୍ଡାଓମେଣ୍ଟ ହାତକୁ ନେଇ ପରିଚାଳନା କମିଟି ପକ୍ଷରୁ ମନ୍ଦିର ରକ୍ଷଣାବେକ୍ଷଣ କରିଆସୁଛନ୍ତି। ସରକାରଙ୍କ ଆଇନ ଅନୁସାରେ ମା’ଙ୍କ ଭୂ-ସମ୍ପତ୍ତି ଯେଉଁମାନେ ଭୋଗ ଦଖଲ କରୁଛନ୍ତି, ସେମାନେ ମା’ଙ୍କ ପରିଚାଳନା କମିଟି ସଦସ୍ୟ ହୁଅନ୍ତୁ କିମ୍ବା ଯେ କୌଣସି ସେବାୟତ ସଦସ୍ୟାସଦସ୍ୟ ହୁଅନ୍ତୁ, ସେମାନେ ନିଜ ନାମରେ ପଟ୍ଟା କରିପାରିବେ ନାହିଁ। ବର୍ତ୍ତମାନ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ଧର୍ମାନୁଷ୍ଠାନ ସମ୍ପତ୍ତି ଉଦ୍ଧାର କରିବା ପାଇଁ ସ୍ବତନ୍ତ୍ର ବ୍ୟବସ୍ଥା ଗ୍ରହଣ କରିଛନ୍ତି। ସେହିପରି ବିଭିନ୍ନ ମୌଜାରେ ଥିବା ଦେବଦେବୀଙ୍କ ଭୂ-ସମ୍ପତ୍ତି ଉଦ୍ଧାର ପାଇଁ ଏକ ଉଚ୍ଚସ୍ତରୀୟ କମିଟି ଗଠନ କରିବାର ଆବଶ୍ୟକତା ରହିଛି ବୋଲି ମା’ ରାମଚଣ୍ଡୀ ଆଞ୍ଚଳିକ ସେନା ଆବାହକ ଲକ୍ଷ୍ମୀକାନ୍ତ ସ୍ବାଇଁ ଓ ବିରଞ୍ଚି ନାରାୟଣ ଦାସ କହିଛନ୍ତି।
ଅପରପକ୍ଷରେ ମା’ଙ୍କ ପୀଠରେ ବାର ପୂନେଇଁ ତେର ପର୍ବ ପାଳିତ ହେଉଛି। କିଛି ବର୍ଷ ହେବ ମା’ଙ୍କ ବ୍ୟାଙ୍କ ଜମାଖାତାରେ ୫୦ ଲକ୍ଷ ଟଙ୍କା ରହିଛି। ହେଲେ ସ୍ଥାୟୀ ପରିଚାଳନା କମିଟି ଗଠନ ହୋଇ ନ ଥିବାରୁ ବିଭିନ୍ନ ସମସ୍ୟା ଉପୁଜିଛି ବୋଲି କୁହାଯାଉଛି। ସରକାର ବଦଳିଛି, ହେଲେ ବଦଳିନି ମା’ଙ୍କ ପରିଚାଳନା କମିଟି ଗଠନ। ମହାକାଳପଡ଼ା ତହସିଲଦାର ରବି ନାରାୟଣ ଆଚାର୍ଯ୍ୟଙ୍କୁ ରାଜ୍ୟ ସରକାରଙ୍କ ଆଇନ ବିଭାଗ ପକ୍ଷରୁ ଏଣ୍ଡାଓମେଣ୍ଟ ସୋଲ ଟ୍ରଷ୍ଟ ଭାବରେ ଅବସ୍ଥାପିତ କରାଯାଇ ପରିଚାଳନା ଦାୟିତ୍ୱ ନିର୍ବାହ କରାଯାଇଛି। ଅପରପକ୍ଷରେ ମା’ଙ୍କ ନୂତନ ମନ୍ଦିର ନିର୍ମାଣ ପାଇଁ ୧୦ କୋଟି ଟଙ୍କାର ବ୍ୟୟ ଅଟକଳ ରହିଛି। ରାଜସ୍ଥାନ ଖଣ୍ଡେଲାଇଟ ଲାଲପଥର ଓ ମୟୂରଭଞ୍ଜ ଖିଚିଂ କଳା ମୁଗୁନି ପଥରରେ ନିର୍ମିତ ହେବାର ପ୍ରସ୍ତାବ ରହିଛି।
