ପୁରୀ ଅଫିସ,୨୦ା୩: ପିପିଲି ବ୍ଲକ୍ର କମାକଣ୍ଟିଆ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ନିୟୋଜିତ ଥିବା ଡାକ୍ତର ଠିକ୍ ଭାବେ କାର୍ଯ୍ୟ କରୁ ନ ଥିବା ନେଇ ସାମାଜିକ କର୍ମୀ ଦିଲୀପ ବରାଳ ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଅଭିଯୋଗ କରିଥିଲେ। ଏନେଇ ବାରମ୍ବାର ଅଭିଯୋଗ ପରେ ଜିଲା ମୁଖ୍ୟ ଚିକିତ୍ସାଧିକାରୀ ଗତ ମାସ ୨୦ ତାରିଖରେ ତଦନ୍ତ ପାଇଁ ପିପିଲି ବ୍ଲକ୍ ଜନସ୍ବାସ୍ଥ୍ୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ୨୧ ତାରିଖରେ ବ୍ଲକ୍ ଜନସ୍ବାସ୍ଥ୍ୟ ଅଧିକାରୀ ତଦନ୍ତ କରିବା ପାଇଁ କମାକଣ୍ଟିଆ ସ୍ବାସ୍ଥ୍ୟକେନ୍ଦ୍ରକୁ ଯାଇଥିଲେ। ତଦନ୍ତ ସମୟରେ ସେ ଜାଣିବାକୁ ପାଇଥିଲେ ଯେ, ଡାକ୍ତର ଅପରାହ୍ନରେ ଅନୁପସ୍ଥିତ ଥିଲେ। ସମ୍ପୃକ୍ତ ଡାକ୍ତର କୌଣସି ଦିନ ଅପରାହ୍ନରେ ସ୍ବାସ୍ଥ୍ୟକେନ୍ଦ୍ରକୁ ଆସୁ ନ ଥିବା ବ୍ଲକ୍ ଜନସ୍ବାସ୍ଥ୍ୟ ଅଧିକାରୀ ଜାଣିବାକୁ ପାଇଥିଲେ। ଡାକ୍ତର ପ୍ରତ୍ୟେକ ଦିନ ପୂର୍ବାହ୍ନରେ ଅତି କମ୍ରେ ୩ ଘଣ୍ଟା ଓ ଅପରାହ୍ନରେ ୧ ଘଣ୍ଟା ଡାକ୍ତରଖାନାକୁ ଆସି କାର୍ଯ୍ୟ କରନ୍ତୁ ବୋଲି ଅଞ୍ଚଳବାସୀ ଦାବି କରିଥିଲେ। ଅପରପକ୍ଷରେ ସମ୍ପୃକ୍ତ ଡାକ୍ତର ନିଜ ଅନିୟମିତତାକୁ ଲୁଚାଇବା ପାଇଁ ଓପିଡି ରେଜିଷ୍ଟରରେ ରୋଗୀଙ୍କ ତଥ୍ୟ ଉଲ୍ଲେଖ କରୁନାହାନ୍ତି। ସପ୍ତାହରେ ଚାରିଦିନ ପୂର୍ବାହ୍ନରେ ଆସୁଛନ୍ତି, କିନ୍ତୁ ଅପରାହ୍ନରେ ଆସୁ ନ ଥିବାରୁ ଡାକ୍ତରଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ତଦନ୍ତ ରିପୋର୍ଟରେ ବ୍ଲକ୍ ଜନସ୍ବାସ୍ଥ୍ୟ ଅଧିକାରୀ ଉଲ୍ଲେଖ କରିଛନ୍ତି। ଏଥିସହ ସେହି ସ୍ବାସ୍ଥ୍ୟକେନ୍ଦ୍ରରେ ନିଯୁକ୍ତି ପାଇଥିବା ଆୟୁଷ ଡାକ୍ତର ତିନିରୁ ଚାରିଦିନ କାର୍ଯ୍ୟ କରୁଥିବା ବ୍ଲକ୍ ଜନସ୍ବାସ୍ଥ୍ୟ ଅଧିକାରୀ ତାଙ୍କ ରିପୋର୍ଟରେ ଦର୍ଶାଇଛନ୍ତି ବୋଲି ସାମାଜିକ କର୍ମୀ ବରାଳ ସୂଚନା ଦେଇଛନ୍ତି। ଜନସ୍ବାସ୍ଥ୍ୟ ଅତ୍ଧକାରୀ ତାଙ୍କ ତଦନ୍ତ ରିପୋର୍ଟ ୨୨ ତାରିଖରୁ ପ୍ରଦାନ କରିସାରିଥିଲେ ମଧ୍ୟ ଜିଲା ମୁଖ୍ୟ ଚିକିତ୍ସାଧିକାରୀ କାର୍ଯ୍ୟାନୁଷ୍ଠାନ ଗ୍ରହଣ କରି ନ ଥିବା ବରାଳ ଅଭିଯୋଗ କରିଛନ୍ତି। ଏ ନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତେବେ ସମ୍ପୃକ୍ତ ଡାକ୍ତର ଏବଂ ଜିଲା ଚିକିତ୍ସାଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ।
