ଭୁବନେଶ୍ୱର,୧।୬ବ୍ୟୁରୋ): ରଥଯାତ୍ରା ସମୟରେ ହୋଇଥିବା ଦଳା ଚକଟାରେ ପ୍ରାଣ ହରାଇଥିବା ଜଣେ ମହିଳାଙ୍କ ନିକଟ ସମ୍ପର୍କୀୟଙ୍କୁ ୫ଲକ୍ଷ ଟଙ୍କା କ୍ଷତିପୂରଣ ଦେବାକୁ ଏକ ବୀମା କମ୍ପାନୀକୁ ଓଡ଼ିଶା ରାଜ୍ୟ ମାନବ ଅଧିକାର କମିଶନ(ଓଏଚ୍ଆର୍ସି) ନିର୍ଦ୍ଦେଶ ଦେଇଛନ୍ତି। ମୃତା ସରସ୍ବତୀ ମଲ୍ଲିକଙ୍କ ସ୍ବାମୀ ହଗୁରୀଙ୍କ ଆବେଦନର ଶୁଣାଣି କରି ଓଏଚ୍ଆର୍ସି ଆସନ୍ତା ୩୦ଦିନ ମଧ୍ୟରେ ଏହି ସହାୟତା ରାଶି ପ୍ରଦାନ କରିବାକୁ କହିଛନ୍ତି। ସୂଚନାଯୋଗ୍ୟ ୨୦୧୮ ମସିହାରେ ରଥଯାତ୍ରା ସମୟରେ ସରସ୍ବତୀ ଏବଂ ଅନ୍ୟ କିଛି ଶ୍ରଦ୍ଧାଳୁ ଦଳାଚକଟାର ଶିକାର ହୋଇଥିଲେ। ଏଥିରେ ଗୁରୁତର ହୋଇଥିବା ସରସ୍ବତୀଙ୍କୁ ପ୍ରଥମେ ପୁରୀ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲ। ପରେ ତାଙ୍କୁ କଟକ ଏସ୍ସିସିବି ମେଡିକାଲ୍କୁ ସ୍ଥାନାନ୍ତର କରାଯାଇଥିଲା। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସରସ୍ବତୀଙ୍କ ପରିବାରକୁ କ୍ଷତିପୂରଣ ଦେବାକୁ ଶ୍ରୀମନ୍ଦିର ପ୍ରଶାସନ ବୀମା କମ୍ପାନୀକୁ ସୁପାରିସ କରିଥିଲେ ସୁଦ୍ଧା ବୀମା କମ୍ପାନୀ ମୃତଦେହ ବ୍ୟବଚ୍ଛେଦ ହୋଇ ନ ଥିବା ଆଳ ଦେଖାଇ କିଛି ଶୁଣୁ ନ ଥିଲେ। ଫଳରେ ହଗୁରି କମିଶନଙ୍କ ଦ୍ୱାରସ୍ଥ ହୋଇଥିଲେ।
