ମାଡ୍ରାସ, ୪ା୭(ପି.ଟି.)-ଅଲିମ୍ପିକ୍ସରେ ଭାଗ ନେବା ଲାଗି ଭାରତର ପ୍ରଥମ ବ୍ୟାଚ୍ ଆଥ୍ଲେଟ ଦଳ ଜୁଲାଇ ୧୪ରେ ଏୟାର ଇଣ୍ଡିଆର ଏକ ସ୍ବତନ୍ତ୍ର ବିମାନ ଯୋଗେ ଟୋକିଓ ଗସ୍ତ କରିବ। ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ସାଧାରଣ ସମ୍ପାଦକ ରାଜୀବ ମେହେଟା ଶନିବାର ଏହି ସୂଚନା ଦେଇଛନ୍ତି। ଅବଶିଷ୍ଟ ଭାରତୀୟ ଆଥ୍ଲେଟ ଜୁଲାଇ ୧୬ରୁ ୧୯ ମଧ୍ୟରେ ଗସ୍ତ କରିବେ। ଟୋକିଓରେ ପହଞ୍ଚତ୍ବା ପରେ ସମସ୍ତ ଆଥ୍ଲେଟ ଓ ଅଫିସିଆଲ ୩ ଦିନ କ୍ୱାରାଣ୍ଟାଇନ୍ରେ ରହିବେ। ୧୮ଟି ଖେଳ ପାଇଁ ଭାରତର ୧୧୫ ଆଥ୍ଲେଟ ଯୋଗ୍ୟତା ଅର୍ଜନ କରିଛନ୍ତି। ସ୍ଥାନୀୟ ୟୁ ଥିଙ୍କ୍ ଫାଉଣ୍ଡେଶନ ଆଣ୍ଡ୍ ସନ୍ ସାଇନ୍ ସିନିୟର ସେକେଣ୍ଡାରୀ ସ୍କୁଲରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଯୋଗଦାନ ଅବସରରେ ମେହେଟା ଏହି ସୂଚନା ଦେଇଛନ୍ତି। ଆଇଓଏ ଅଫିସିଆଲ ଏହି ଅବସରରେ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଥିବା କେତେଜଣ ଆଥ୍ଲେଟଙ୍କୁ ସମ୍ବର୍ଦ୍ଧିତ କରିଥିଲେ। ଫେନ୍ସିଂରେ ଭାରତ ପ୍ରଥମ ଥର ଭାଗ ନେବ। ତାମିଲନାଡୁର ସି.ଏ. ଭବାନୀ ଦେବୀ ଭାରତର ପ୍ରଥମ ଫେନ୍ସର ଭାବେ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଛନ୍ତି। ଟେବୁଲ ଟେନିସ ଖେଳାଳି ଜି. ସାଥିୟାଁ ପ୍ରଥମ ଥର ଅଲିମ୍ପିକ୍ସ ଯୋଗ୍ୟତା ହାସଲ କରିଛନ୍ତି। ଏହି ଇଭେଣ୍ଟରେ ବିଶିଷ୍ଟ ଟେବୁଲ ଟେନିସ ଖେଳାଳି ଏ. ଶରଥ କମଲ ଏବଂ ସ୍ପ୍ରିଣ୍ଟର ଦୂତୀ ଚାନ୍ଦ ମଧ୍ୟ ଯୋଗ ଦେଇଥିଲେ।
