କେସିଙ୍ଗା,୫ା୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ସଚେତନ ନାଗରିକ ମଞ୍ଚ ପକ୍ଷରୁ ୧୦ଦଫା ଦାବି ନେଇ ଗତ ମାସ ୧୮ ତାରିଖରୁ ସଭାପତି ଉତ୍ତର କୁମାର ମହଲାଙ୍କ ନେତୃତ୍ୱରେ ଗଣଧାରଣା ଆରମ୍ଭ ହୋଇଥିଲା। ଜିଲାପାଳ ସଚିନ ପାୱାର ଘଟଣାସ୍ଥଳରେ ପହଞ୍ଚି ନାଗରିକ ମଞ୍ଚ ସଭାପତିଙ୍କ ସହ ଆଲୋଚନା ପରେ ଶନିବାରଠାରୁ ଧାରଣା ପ୍ରତ୍ୟାହୃତ ହୋଇଛି। ଆନ୍ଦୋଳନ ଚାଲିଥିବା ସମୟରେ କେସିଙ୍ଗା ବିଡିଓ ଜନ୍ମେଜୟ ସ୍ବାଇଁ, ତହସିଲଦାର ପ୍ରଶାନ୍ତି ପ୍ରଧାନ, ଭବାନୀପାଟଣା ଉପଜିଲାପାଳ ପ୍ରଭାତ ପରିଡ଼ା ଧାରଣାସ୍ଥଳକୁ ଆସି ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ। ହେଲେ ଏହା ବିଫଳ ହୋଇଥିଲା। ଶେଷରେ ଜିଲାପାଳ ସଚିନ ପାୱାର ଧାରଣାସ୍ଥଳକୁ ଯାଇ ଆଲୋଚନାକରି ଜିଲା ପ୍ରଶାସନ ତରଫରୁ ଦାବିଗୁଡ଼ିକ ନେଇ ରାଜ୍ୟ ସରକାରଙ୍କୁ ରିପୋର୍ଟ କରାଯାଇଛି। ଏହାସହ ଗଣଧାରଣା ପ୍ରତ୍ୟାହାର କରିବା ପାଇଁ ଜିଲାପାଳ ଅନୁରୋଧ କରିଥିଲେ। ଜିଲାପାଳଙ୍କ ଅନୁରୋଧ ରକ୍ଷାକରି ଧାରଣାରୁ ଓହରିଯିବା ପାଇଁ ସଚେତନ ନାଗରିକ ମଞ୍ଚ ସଭାପତି ମହଲା ଘୋଷଣା କରିଥିଲେ। ଏହି ଧାରଣାରେ ଏନ୍ଏସି ନିର୍ବାହୀ ଅଧିକାରୀ ଚିନ୍ମୟ ଆଚାର୍ଯ୍ୟ, ସ୍ଥାନୀୟ ଆଦର୍ଶ ଥାନା ଆଇଆଇସି ପ୍ରଦ୍ୟୁମ୍ନ କୁମାର ମହାପାତ୍ର ଓ ଅନ୍ୟ କର୍ମକର୍ତ୍ତା ଉପସ୍ଥିତ ଥିଲେ।
