ଉମରକୋଟ, ୫।୧: ପାରିବାରିକ କଳହକୁ କେନ୍ଦ୍ର କରି ମଙ୍ଗଳବାର ନବରଙ୍ଗପୁର ଜିଲା ଉମରକୋଟ ବ୍ଲକ ୟୁଭି-୫୨ ଗ୍ରାମର ବିପ୍ଳବ ବିଶ୍ବାସ ସ୍ତ୍ରୀ ସିପ୍ରାଙ୍କୁ ପଥରରେ ଛେଚି ହତ୍ୟା କରିଛନ୍ତି। ପରେ ବିପ୍ଳବ ଉମରକୋଟ ଥାନାରେ ଆତ୍ମସମର୍ପଣ କରିଛନ୍ତି।
ପ୍ରକାଶ ଯେ, ବିପ୍ଳବ ଦେଢ଼ବର୍ଷ ତଳେ ମୂର୍ତ୍ତୃମା ଗ୍ରାମର ସିପ୍ରାଙ୍କୁ ବିବାହ କରିଥିଲେ। ତାଙ୍କର ଦେଢ଼ମାସର ଏକ କନ୍ୟା ସନ୍ତାନ ଅଛି। ବିଭିନ୍ନ କାରଣରୁ ସ୍ବାମୀ-ସ୍ତ୍ରୀଙ୍କ ମଧ୍ୟରେ କଳହ ଲାଗି ରହୁଥିଲା। ବିପ୍ଳବ ଅନେକ ସମୟରେ ସିପ୍ରାଙ୍କୁ ମାର୍ପିଟ୍ କରୁଥିଲେ। ଏହା ଜାଣି ବାପଘର ଲୋକେ ଗ୍ରାମରେ ଏକ ବୈଠକ କରାଯାଇଥିଲା। ବୈଠକରେ ନିଷ୍ପତ୍ତି ମୁତାବକ କିଛିଦିନ ସିପ୍ରା ବାପଘରେ ରହିବେ ବୋଲି କୁହାଯାଇଥିଲା। ଏନେଇ ମଙ୍ଗଳବାର ବିପ୍ଳବ ଶିଶୁକନ୍ୟା ଓ ସିପ୍ରାଙ୍କୁ ଶ୍ୱଶୁର ଘରେ ଛାଡିବାକୁ ଯାଉଥିଲେ। ସେତିକିବେଳେ ବିପ୍ଲବ ଚିକଲପଦର-ଅଧିକାରୀଗୁଡା ରାସ୍ତାରେ ଗାଡ଼ି ଅଟକାଇ ସିପ୍ରାଙ୍କ ଶାଢ଼ି ଚିରି ବେକରେ ଗୁଡ଼ାଇ ଶ୍ୱାସରୁଦ୍ଧ କରିବା ପରେ ମୁଣ୍ଡକୁ ପଥରରେ ଛେଚି ହତ୍ୟା କରିଥିଲେ। ପରେ ସେ ଶିଶୁକନ୍ୟାକୁ ଅଧିକାରୀଗୁଡା ଗ୍ରାମର ଜଣଙ୍କ ଘରେ ଛାଡି ଉମରକୋଟ ଥାନାରେ ଆତ୍ମସମର୍ପଣ କରିଥିଲେ। ଏହାଜାଣି ଥାନା ଅଧିକାରୀ ନରେଶ କୁମାର ପ୍ରଧାନ, ଏସ୍ଡିପିଓ ହେମନ୍ତ କୁମାର ପାଢ଼ୀ ପୋଲିସ ଟିମ୍ ସହ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଥିଲେ। ଏନେଇ ପୋଲିସ ଏକ ମାମଲା(ନଂ.୭/୨୧) ରୁଜୁ କରି ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଅଭିଯୁକ୍ତଙ୍କୁ କଠୋର ଦଣ୍ଡ ଦେବାକୁ ସିପ୍ରାଙ୍କ ବାପା ଦାବି କରିଛନ୍ତି।
