ଦୀପକ ମିଶ୍ର
କେନ୍ଦୁଝର, ୨୯।୬ – କେନ୍ଦୁଝର ଜିଲାରେ ଅନେକ ଗୁଡିଏ ପର୍ଯ୍ୟଟନସ୍ଥଳ ରହିଛି। ସେଥିମଧ୍ୟରୁ ଘଟଗାଁ, ଗୋନାସିକା ଓ ସାନଘାଗରାକୁ ନେଇ ସ୍ଵର୍ଣ୍ଣ ତ୍ରିଭୂଜ ଯୋଜନାର ପ୍ରଶାସନ ପରିକଳ୍ପନା କରିଥିଲା। ହେଲେ କେବେ ଏହି ପରିକଳ୍ପନା କାର୍ଯ୍ୟକାରୀ ହେବ ଏବଂ ଜିଲାକୁ ଅଧିକ ପର୍ଯ୍ୟଟକ ଆକୃଷ୍ଟ ହୋଇ ଅସିବେ ସେଥିପାଇଁ ଘଟଗାଁ ମା’ ତାରିଣୀ ମନ୍ଦିର ପାଇଁ ପର୍ଯ୍ୟଟନ ବିଭାଗ ପକ୍ଷରୁ ୨ କୋଟି ୮୦ ଲକ୍ଷ ଟଙ୍କା ଅନୁମୋଦନ ହୋଇ ଉନ୍ନୟନ କାର୍ଯ୍ୟ ଚାଲିଥିବା ବେଳେ କେନ୍ଦୁଝରର ବହୁ ଚର୍ଚ୍ଚିତ ସାନଘାଗରା ଜଳ ପ୍ରପାତ ପାଇଁ ୪ କୋଟି ୨୬ଲକ୍ଷ ଟଙ୍କା ଅନୁମୋଦନ ହୋଇ କାର୍ଯ୍ୟ ଚାଲୁଛି। ତେବେ ଗୋନାସିକା ପାଇଁ ସେଭଳି କିଛି ଆଖଦୃଶିଆ ଅର୍ଥ ବ୍ୟବସ୍ଥା କରାଯାଇ ନ ଥିବାରୁ ଏହି ସ୍ବର୍ଣ୍ଣ ତ୍ରିଭୁଜ ଯୋଜନା ଦିଗହରା ହୋଇଛି।
ଏହି ସ୍ବର୍ଣ୍ଣ ତ୍ରିଭୁଜ ଯୋଜନା ବହୁଦିନ ତଳେ ଜିଲା ପର୍ଯ୍ୟଟନ କାଉନସିଲ ବୈଠକରେ ଅନୁମୋଦନ ହୋଇ ଏହାର ଏକ ଖସଡ଼ା ୨୦୨୧ ମସିହା ମାର୍ଚ୍ଚରୁ ରାଜ୍ୟ ପର୍ଯ୍ୟଟନ ବିଭାଗକୁ ପଠାଯାଇଥିଲେ ସୁଦ୍ଧା ଘଟଗାଁ, ସାନଘାଗରା ପାଇଁ କିଛି ଅର୍ଥ ଅନୁମୋଦନ ହୋଇଥିଲେ ବି ଗୋନାସିକାକୁ ଅଣଦେଖା କରାଯାଇଛି। ଏହି ଯୋଜନାରେ ତିନୋଟି ସ୍ଥଳର ସର୍ବବିଧ ଉନ୍ନୟନ ପାଇଁ ପ୍ରସ୍ତାବ ରହିଛି। ବିଭିନ୍ନ ବିଭାଗର ସହଯୋଗ ଅଭାବରୁ ଜିଲାର ଅନେକ ପର୍ଯ୍ୟଟନକ୍ଷେତ୍ର ଗୁଡିକର ଉନ୍ନୟନ ପାଇଁ ଜମି ମିଳିପାରୁନି। ଏହାବ୍ୟତୀତ ଜିଲାରେ ଥିବା ଅନ୍ୟାନ୍ୟ ପର୍ଯ୍ୟଟନ ସ୍ଥଳୀ ତଥା ଖଣ୍ଡାଧାରର ଉନ୍ନୟନ ପାଇଁ ୨.୭୮ କୋଟି ଟଙ୍କା, ସୀତାବିଞ୍ଜ ପାଇଁ ୩୦ ଲକ୍ଷ, ବଡଘାଗରା ପାଇଁ ୫ କୋଟି ୩୦ ଲକ୍ଷ, ଘଟଗାଁ ବ୍ଲକର କୋଳିମାଟି ସ୍ଥିତ ଦରଗଡଶୀଳା ପର୍ଯ୍ୟଟନକ୍ଷେତ୍ର ପାଇଁ ୩୦ ଲକ୍ଷ, କେଶରୀକୁଣ୍ଡ ପାଇଁ ୨୦ ଲକ୍ଷ ଅନୁମୋଦନ ହୋଇଛି ବୋଲି ଜିଲା ପର୍ଯ୍ୟଟନ ଅଧିକାରୀ ରମେଶ ଚନ୍ଦ୍ର ନାଏକ ପ୍ରକାଶ କରିଛନ୍ତି। ଏହାବ୍ୟତୀତ କେନ୍ଦୁଝରଠାରୁ ୩ କିି.ମି. ଦୂରରେ ଥିବା ଘଟଘଡି ମନ୍ଦିର ସହ ଏହାର ପରିସରକୁ ସୌନ୍ଦର୍ଯ୍ୟକରଣ କରିବା ପାଇଁ ଜିଲା ପ୍ରଶାସନ ପକ୍ଷରୁ ଓମ୍ବାଡସି କିମ୍ବା ଡିଏମ୍ଏଫ୍ରୁ ଖର୍ଚ୍ଚ କରାଯିବାର ଯୋଜନା ରହିଛି ବୋଲି ଜିଲା ପର୍ଯ୍ୟଟନ ଅଧିକାରୀ ନାଏକ ପ୍ରକାଶ କରିଛନ୍ତି।
ଏକ ଗୁରୁତ୍ୱପୂର୍ଣ୍ଣ କଥା ହେଲା ଜିଲା ମୁଖ୍ୟାଳୟରେ ଜିଲା ପର୍ଯ୍ୟଟନ ବିଭାଗର ନିଜସ୍ବ ଘର ନାହିଁ। ଅନେକ ଦିନରୁ ଏଥିପାଇଁ ୧ କୋଟି ଟଙ୍କା ମଞ୍ଜୁର ହୋଇସାରିଛି। କିନ୍ତୁ ବିଭିନ୍ନ ସମସ୍ୟା କାରଣରୁ କାମ ହୋଇପାରୁନି। ଅନ୍ୟପକ୍ଷରେ କରୋନା ମହାମାରୀ କାରଣରୁ ପର୍ଯ୍ୟଟନ କ୍ଷେତ୍ର ଉପରେ ନିର୍ଭରଶୀଳ ଲୋକକଙ୍କୁ ଗତ ଦୁଇବର୍ଷ ହେବ ଅସୁବିଧାରେ ପକାଇଛି। ଏବେ ଧୀରେ ଧୀରେ ଜିଲାକୁ ପର୍ଯ୍ୟଟକଙ୍କ ଆଗମନ ହେଲାଣି। ପର୍ଯ୍ୟଟନ କ୍ଷେତ୍ରରେ ଜିଲାରେ ଅନେକ ନିଯୁକ୍ତି ସମ୍ଭାବନା ରହିଛି। ପର୍ଯ୍ୟଟନ ଭିତ୍ତିଭୂମିର କି ପ୍ରାକୃତିକ ସୌନ୍ଦର୍ଯ୍ୟସ୍ଥଳର ଏଠାରେ ଅଭାବ ନାହିଁ। ଅର୍ଥର ମଧ୍ୟ ଜିଲାରେ ଅଭାବ ନାହିଁ। ତେଣୁ ପ୍ରଶାସନ ଏଥିପ୍ରତି ଦୃଷ୍ଟି ଦେଲେ ଜିଲାର ସମସ୍ତ ପର୍ଯ୍ୟଟନ କ୍ଷେତ୍ର ଗୁଡିକର ବିକାଶ ସହିତ ସ୍ବର୍ଣ୍ଣତ୍ରିଭୁଜ ପରିକଳ୍ପନା ଯୋଜନା ସଫଳ ହୋଇପାରିବ।
