କେନ୍ଦ୍ରାପଡ଼ା ଅଫିସ,୬ା୧୧: କରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ପକ୍ଷରୁ ଆସନ୍ତା ୧୦ରୁ ୩୦ ତାରିଖ ପର୍ଯ୍ୟନ୍ତ ବାଣ ଫୁଟାଇବା ଉପରେ କଟକଣା ଜାରି ହୋଇଛି। ବିକ୍ରି କିମ୍ବା ବାଣ ଫୁଟାଇଲେ ଆଇନ ଜାଲରେ ଛନ୍ଦିବାକୁ ନିର୍ଦ୍ଦେଶ ଦିଆଯାଇଛି। ଏହି ନିର୍ଦ୍ଦେଶନାମା ଯୋଗୁ କେନ୍ଦ୍ରାପଡ଼ା ଜିଲାର ୧୫୦୦ରୁ ଊର୍ଦ୍ଧ୍ୱ ବାଣ ପ୍ରସ୍ତୁତକାରୀ ହତାଶ ହୋଇପଡିଛନ୍ତି। ଫେବୃୟାରୀରୁ ଅଦ୍ୟାବଧି କୋଭିଡ-୧୯ କଟକଣା ଯୋଗୁ ବାଣ ବ୍ୟବସାୟ କରି ପାରିନାହାନ୍ତି। କଟକଣା ତାଙ୍କର ଜୀବିକାକୁ ଛଡାଇ ନେଇଥିବା ବାଣ ପ୍ରସ୍ତୁତକାରୀମାନେ ମତ ଦେଇଛନ୍ତି। ବିଶେଷଜ୍ଞଙ୍କ ମତରେ ବାଣ ଫୁଟାଯିବା ଦ୍ୱାରା ଯେଉଁ ଧୂଆଁ ବାହାରିବ ତାହା ପରିବେଶକୁ ପ୍ରଦୂଷିତ କରିବ। ବାୟୁ ପ୍ରଦୂଷଣର ମାତ୍ରା ବଢିଯିବ। ଲୋକଙ୍କୁ ନିଃଶ୍ୱାସ ନେବାରେ ଅସୁବିଧା ହେବ। ଯାହାକି ଶରୀର ପାଇଁ କ୍ଷତିକାରକ ସାବ୍ୟସ୍ତ ହେବ।
କେନ୍ଦ୍ରାପଡ଼ା ସହର ନିକଟ ଗରାପୁରର ବାଣ ପ୍ରସ୍ତୁତକାରୀ ଭରତ ଦାସଙ୍କୁ ପଚାରିବାରେ, କୋଭିଡ-୧୯ କଟକଣା ଜୀବନକୁ ଦୁର୍ବିଷହ କରିଦେଇଛି। ଦୀର୍ଘ ୮ମାସ ଧରି ବାଣ ବ୍ୟବସାୟ ବନ୍ଦ ରହିଛି। ବିବାହ, ବ୍ରତ, ପୂଜାଉତ୍ସବରେ ଏବେ ବାଣ ବ୍ୟବହାର ହେଉନାହିଁ। ଆସନ୍ତା ୧୪ରେ ଦୀପାବଳି ଅମାବାସ୍ୟାରେ ବାଣ ବ୍ୟବହାରକୁ ବନ୍ଦ ପରେ ପରିବାର ଚଳିବା ନେଇ ଆଶଙ୍କା ପ୍ରକାଶ ପାଇଛି। ଏହି ଗ୍ରାମର ମାଧବ ଚନ୍ଦ୍ର ବେହେରା କୁହନ୍ତି, ଏପ୍ରିଲରେ ଜିଲାରେ ପ୍ରଥମ କରୋନା ସଂକ୍ରମିତଙ୍କ ଚିହ୍ନଟ ହୋଇଥିଲା। ସେପ୍ଟେମ୍ବର ଶେଷ ସୁଦ୍ଧା ଏହା ୩ ଅଙ୍କରେ ପହଞ୍ଚତ୍ ଥିଲା। ଅକ୍ଟୋବର ୨୦ରୁ ସଂକ୍ରମିତଙ୍କ ସଂଖ୍ୟା ୫୦ ମଧ୍ୟରେ ରହୁଛି। କରୋନା ସଂକ୍ରମିତଙ୍କ ସଂଖ୍ୟା କମିବା ଓ ଅନ୍ଲକ ପ୍ରକ୍ରିୟା ମଧ୍ୟରେ ଦୀପାବଳି ଅମାବାସ୍ୟା କଟକଣାମୁକ୍ତ ହେବ ବୋଲି ଆଶା କରାଯାଉଥିଲା। ଏଥିପାଇଁ ଲକ୍ଷାଧିକ ଟଙ୍କାର ସାମଗ୍ରୀ କିଣା ଯାଇ ବାଣ ପ୍ରସ୍ତୁତ କରାଯାଇଛି। କଟକଣା ପରେ ପ୍ରସ୍ତୁତ ହୋଇଥିବା ବାଣ ଓ ନିଜ ପରିବାରର ଭବିଷ୍ୟତ ଏବେ ଅନ୍ଧାରରେ ଥିବା ସେ କହିଛନ୍ତି। କପାଳେଶ୍ୱର ଗ୍ରାମର ଅଭିମନ୍ୟୁ ସାମଲ କୁହନ୍ତି, ଦୀପାବଳିରେ ସର୍ବାଧିକ ବାଣ ବିକ୍ରି ହୋଇଥାଏ। ବ୍ୟବସାୟୀମାନେ ବାଣ ନେଇ ବିକ୍ରି ପାଇଁ ଅଗ୍ରିମ ଦେଇଥିବାରୁ ସେମାନଙ୍କ ଅର୍ଡର ପ୍ରସ୍ତୁତ ହୋଇସାରିଛି। ଏବେ ଅଗ୍ରିମ ବାବଦ ବାଣ ନେବାକୁ ମନା କରି ଦେଇଥିବାରୁ ପରିବାର ସଦସ୍ୟ ହତାଶ ହୋଇପଡିଛୁ। ଦୀର୍ଘଦିନ ଧରି ବାହାଘର ଓ ଅନ୍ୟ ପର୍ବରେ ବାଣ ବିକ୍ରି ହୋଇ ନ ଥିବା ବେଳେ ଋଣ ଜାଲରେ ପଡିଯାଇଛୁ। ଏହି କଟକଣା ନିୟମକୁ ପୁନଃବିଚାର କରିବାକୁ ସେ ଦାବି କରିଛନ୍ତି।
