ଭୁବନେଶ୍ୱର, ୧୫।୨ (ବ୍ୟୁରୋ): ପୌର ନିର୍ବାଚନ ପାଇଁ ଭୁବନେଶ୍ୱର ମହାନଗର ନିଗମ(ବିଏମ୍ସି) ଅନ୍ତର୍ଗତ ୬୭ଟି ଓ୍ବାର୍ଡର ୨୧୯ ସ୍ଥାନରେ ୬୯୯ ବୁଥ୍ ସ୍ଥାପନ ପାଇଁ ଗୁରୁବାର ଚିଠା ତାଲିକା ପ୍ରକାଶ ପାଇଥିଲା। ଆପତ୍ତି ଅଭିଯୋଗ କରିବାକୁ ୪ଦିନ ସମୟ ଦିଆଯାଇଥିଲା। ରବିବାର ଅଭିଯୋଗ ଦାଖଲର ଅବଧି ସରିଥିବାବେଳେ ସୋମବାର ଚୂଡ଼ାନ୍ତ ବୁଥ୍ ତାଲିକା ପ୍ରକାଶ ପାଇବା ପାଇଁ ଧାର୍ଯ୍ୟ କରାଯାଇଥିଲା। ତେବେ ତାଲିକା ଚୂଡ଼ାନ୍ତ ହୋଇ ସାରିଥିଲେ ମଧ୍ୟ ଏହାକୁ ପ୍ରକାଶ କରାଯାଇ ନାହିଁ। ମଙ୍ଗଳବାର ସିଧାସଳଖ ବୁଥ୍ ତାଲିକା ନିର୍ବାଚନ କମିଶନରଙ୍କୁ ପ୍ରଦାନ କରାଯିବ ବୋଲି ଏଡିଏମ୍ ପ୍ରଫୁଲ୍ଲ କୁମାର ସ୍ବାଇଁ ସୂଚନା ଦେଇଛନ୍ତି। ବୁଥ୍ ତାଲିକାକୁ ନେଇ କେତେକ ରାଜନୈତିକ ଦଳ ପକ୍ଷରୁ ଅଭିଯୋଗ କରାଯାଇଥିଲା। କେତେକ ଭୋଟରଙ୍କ ବୁଥ୍ ଅନ୍ୟ ଓ୍ବାର୍ଡକୁ ଚାଲି ଯାଇଥିବା ଅଭିଯୋଗ ରହିଥିବାରୁ ଚୂଡ଼ାନ୍ତ ତାଲିକାରେ ତାହା ସଂଶୋଧନ କରାଯାଇଛି। ସେହିପରି କିଛି ସମ୍ବେଦନଶୀଳ ସ୍ଥାନରେ ୨ଟି ଲେଖାଏ ବୁଥ୍ କରାଯାଇଛି। ଅପରପକ୍ଷେ କେବଳ ବୁଥ୍ ତାଲିକା ନୁହେଁ, ବରଂ ଭୋଟର ତାଲିକାରେ ମଧ୍ୟ ଅନେକ ତ୍ରୁଟି ଥିବା ଅଭିଯୋଗ ହୋଇ ଆସୁଛି।
ସେପଟେ ହଜାର ହଜାର ଭୋଟରଙ୍କ ନାମ ତାଲିକାରୁ ବାଦ୍ ପଡିଥିବା ଜଣାପଡିଛି। ବିଏମ୍ସିର ସୂଚନାନୁସାରେ, ଭୁବନେଶ୍ୱରରେ ସମୁଦାୟ ଭୋଟର ସଂଖ୍ୟା ୭ ଲକ୍ଷ ୨୭ ହଜାର ୪୫୬ ରହିଛି। ଆଉ କିଛିଦିନ ପରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ ପାଇବାକୁ ଥିବାବେଳେ ଏତେ କମ୍ ସମୟ ମଧ୍ୟରେ କିଭଳି ସେମାନେ ତାଲିକାରେ ଯୋଡିହେବେ ସେ ନେଇ ଅଧିକାରୀମାନେ ମାନସ ମନ୍ଥନ ଚଳାଇଛନ୍ତି। ଅଭିଯୋଗ ପାଇଁ ଆଉ ୨ଦିନ ଥିବାରୁ ତାଲିକା ଆହୁରି ଲମ୍ବା ହେବା ନେଇ ଆଶଙ୍କା କରାଯାଉଛି।
ଏ ସମ୍ପର୍କରେ ଏଡିଏମ୍ ସ୍ବାଇଁ କହିଛନ୍ତି, ଭୋଟର ତାଲିକାକୁ ନେଇ ବହୁ ଅସନ୍ତୋଷ ଦେଖା ଦେଉଥିବାରୁ ଏହା ଉପରେ କାର୍ଯ୍ୟ କରାଯାଉଛି। ୧୬ ତାରିଖ ପର୍ଯ୍ୟନ୍ତ ଭୋଟରମାନେ ତାଲିକାକୁ ନେଇ ଆପତ୍ତି ଅଭିଯୋଗ କରିପାରିବେ। ୧୮ ତାରିଖରେ ଅଭିଯୋଗଗୁଡ଼ିକର ଶୁଣାଣି ପରେ ୧୯ରେ ତାଲିକା ପ୍ରକାଶ କରାଯିବ। ଏହାବାଦ୍ ଯେଉଁମାନଙ୍କର କୌଣସି ଅଭିଯୋଗ ଥିବ ସେମାନେ ଜିଲାପାଳଙ୍କ ନିକଟରେ ଅଭିଯୋଗ କରିବେ। ୨୪ରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ ପାଇବ। ୨୦୨୨ ଜାନୁୟାରୀ ୧ ସୁଦ୍ଧା ତାଲିକାରେ ନାମ ଥିବା ଭୋଟରଙ୍କୁ ନେଇ ତାଲିକା ପ୍ରକାଶ କରିବାକୁ ନିର୍ଦ୍ଦେଶ ରହିଛି। ନୂଆ ଭୋଟରଙ୍କୁ ମିଶାଇବାର ବ୍ୟବସ୍ଥା ନାହିଁ। ୬ନମ୍ବର ଓ୍ବାର୍ଡର କିଛି ଭୋଟରଙ୍କ ନାମ ୮ନମ୍ବର ଓ୍ବାର୍ଡ ତାଲିକାରେ ପ୍ରକାଶ ପାଇଥିଲା। ସେହିପରି ୩୩ ନଂ. ଓ୍ବାର୍ଡର କିଛି ଭୋଟର ୩୧ ନଂ ଓ୍ବାର୍ଡକୁ ଯାଇଥିଲେ। କିଛି ଓ୍ବାର୍ଡରେ ଏଭଳି ତ୍ରୁଟି ହୋଇଛି। ମାତ୍ର ଏହାକୁ ସଂଶୋଧନ କରାଯାଉଛି। ଫର୍ମ ନଂ. ୭ରେ ନିଜ ଓ୍ବାର୍ଡକୁ ଫେରିବାକୁ ଆବେଦନ କରିପାରିବେ ବୋଲି ଏଡିଏମ୍ କହିଛନ୍ତି।
