ମହାକାଳପଡ଼ା,୫ା୭(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳର ମହାନଦୀ ତ୍ରିକୋଣଭୂମି ଅବବାହିକା ଶାଖା ନଦୀ, ନାଳ ଘେରାରେ ବଉଳା କୁମ୍ଭୀରଙ୍କ ଅଣ୍ଡାଦାନ ପ୍ରକ୍ରିୟା ଆରମ୍ଭ ହୋଇଛି। ଅଣ୍ଡାଦାନ ପରେ ମା’ କୁମ୍ଭୀର ୫୦ରୁ ୬୦ ଦିନ ପର୍ଯ୍ୟନ୍ତ ସେଠାରେ ଜଗି ରହିଥାଏ। ମା’ କୁମ୍ଭୀର ଅଣ୍ଡାଦାନସ୍ଥଳରେ ଜଗି ରହିଥିବା ବେଳେ ପୁରୁଷ କୁମ୍ଭୀର ଖାଦ୍ୟ ସଂଗ୍ରହ କରି ଆଣି ଦେଇଥାଏ। ଅଣ୍ଡାକୁ କୁଆ, ଚିଲ, ବିଲୁଆ ଆଦି ପ୍ରାଣୀ ଖାଇ ଦେବାର ଭୟ ଥିବାରୁ ମା’ କୁମ୍ଭୀର ଅଧିକ ଯତ୍ନବାନ୍ ହୋଇଥାଏ। ସାଧାରଣତଃ ନଦୀ ନାଳଘେରା ଘଞ୍ଚ ବୁଦା ମୂଳ ଉଚ୍ଚ ସ୍ଥାନକୁ ମା’ ବଉଳା କୁମ୍ଭୀର ସୁରକ୍ଷିତଭାବି ବସା ବାନ୍ଧିଥାଏ। ବିଶେଷ କରି ଗୋବରୀ, ଲୁଣା, ରାମଚଣ୍ଡୀ ଗଳିଆ ନାଳ, ବତିଘର, ଖରିନାଶି ନାଳ, ଜମ୍ବୁ, ସୁନିତି, କଣ୍ଟିଲୋ ସଂରକ୍ଷିତ ଜଙ୍ଗଲ ଧାରରେ ବଉଳା କୁମ୍ଭୀର ଅଣ୍ଡା ଦେଇଥାନ୍ତି। ଦେଢ଼ମାସରୁ ଦୁଇ ମାସ ମଧ୍ୟରେ ଅଣ୍ଡା ଫୁଟିବା ପରେ ଶାବକମାନଙ୍କୁ ନଦୀ ନାଳରେ ଲହଡ଼ା ପାର ଉତ୍ତାର ପାଇଁ ମା’ କୁମ୍ଭୀର ପଛରେ ଯିବା ବେଳେ ପୁରୁଷ କୁମ୍ଭୀର ଆଗରେ ଯାଇଥାନ୍ତି। ଯେଉଁ ଶାବକଗୁଡ଼ିକ ଉଚ୍ଚ ଲହଡ଼ି ପାର ହେବାରେ ବାଧକ ହେଲା ସେମାନଙ୍କ ଜୀବନ ପ୍ରତି ବିପଦ ଥାଏ ବୋଲି ପରିବେଶବିତମାନେ ମତବ୍ୟକ୍ତ କରିଛନ୍ତି। ଏହି ସମୟରେ କୁମ୍ଭୀର ଅଧିକ ହିଂସ୍ର ହୋଇ ଥିବାରୁ ନଦୀ ନାଳରେ ପ୍ରବେଶ ନ କରିବା ପାଇଁ ବାରଣ କରାଯାଇଛି ବୋଲି ବନ ବିଭାଗ ପକ୍ଷରୁ କୁହାଯାଇଛି। ଏ ସଂକ୍ରାନ୍ତରେ ରାଜନଗର ବନ ଖଣ୍ଡ ଅଧିକାରୀ ଭରଦ୍ୱାଜ ଗାଁଓକରଙ୍କୁ ପଚାରିବାରେ ବିଭାଗ ପକ୍ଷରୁ ସ୍ବତନ୍ତ୍ର ଦୃଷ୍ଟି ରହିଛି ବୋଲି କହିଛନ୍ତି।
