ଖଇରା, ୧୬।୭(ଡି.ଏନ.ଏ.)
ବାଲେଶ୍ୱର ଜିଲା ଖଇରା ବ୍ଲକ ଶ୍ୟାମସୁନ୍ଦରପୁର ପଞ୍ଚାୟତ ଅଧୀନ ଶହୀଦ ନଗର ଗ୍ରାମବାସୀଙ୍କୁ ପାଣି ଯୋଗାଇବାକୁ ନିର୍ମାଣାଧୀନ ସୋଲାର ପମ୍ପ୍ ହାଉସ ଏବେ ସମ୍ପୃକ୍ତ ଗ୍ରାମବାସୀଙ୍କୁ ଜଟିଳ ସମସ୍ୟାରେ ପକାଇଛି ା ପାଇପ ବିଛାଯିବା କାର୍ଯ୍ୟ ପାଇଁ ଖୋଳାଯାଇଥିବା ଗାତରେ ପଡି ଦୈନନ୍ଦିନ ଗୃହପାଳିତ ପ୍ରାଣୀ ସମେତ ଅନ୍ୟାନ୍ୟ ଜୀବଜନ୍ତୁ ଆହତ ହେଉଛନ୍ତି ା ଏଭଳିକି ମାଟି କାଦୁଅ ଯୋଗୁ ଗ୍ରାମବାସୀ ଯାତାୟାତ ପାଇଁ ଅକଥନୀୟ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ସ୍ଥାନୀୟ ସରପଞ୍ଚ ବନିତା ପ୍ରଧାନଙ୍କୁ ମଧ୍ୟ ଅଭିଯୋଗ କରିଛନ୍ତି ା ସ୍ଥାନୀୟ ତୁରନ୍ତ ଗାତ ପୋତାଯାଇ ପ୍ରକଳ୍ପକୁ ପୂର୍ଣ୍ଣାଙ୍ଗ କରା ନ ଗଲେ ଗ୍ରାମବାସୀ ଧାରଣାରେ ବସିବାକୁ ଆରତୀ ବେହେରା, ମୁକୁନ୍ଦ ବେହେରା, ଭାଗବତ ବେହେରା, ରମାକାନ୍ତ ବେହେରା, ହଡିବନ୍ଧୁ ମୁର୍ମୁ ଓ ୱାର୍ଡସଭ୍ୟା ଦମୟନ୍ତୀ ବେହେରା ପ୍ରମୁଖ ଚେତାବନୀ ଦେଇଛନ୍ତି।
ସେମାନଙ୍କର ଅଭିଯୋଗ ଅନୁଯାୟୀ ଗ୍ରାମରେ ଗ୍ରାମ୍ୟ ଜଳ ଏବଂ ପରିମଳ ବିଭାଗ ତରଫରୁ ଏକ ସୋଲାର ପମ୍ପ ବସାଇବା ଉଦ୍ଦେଶ୍ୟରେ ପାଇପ ବିଛାଇବାକୁ ଅନ୍ୟୁନ ୧ ମାସ ତଳେ ଗାତ ଖୋଳି ଛାଡି ଦିଆଯାଇଥିଲା ା
ତେବେ ବର୍ଷା ହେବା ପରେ ଏହି ଗାତରେ ପାଣି ଭର୍ତ୍ତି ହେବା ସହ ଗ୍ରାମବାସୀଙ୍କ ପାଇଁ ବିଷମ ପରିସ୍ଥିତି ସୃଷ୍ଟି କରୁଛି। ଯାତାୟାତ ରାସ୍ତାରେ ମାଟି କାଦୁଅ ଜମିବା ଯୋଗୁ ସାଧାରଣ ଲୋକଙ୍କୁ ଘରୁ ବାହାରିବା ମୁସ୍କିଲ ହୋଇପଡୁଛି ା
ଗୋରୁ ଓ ଛେଳି ଏହି ଗାତରେ ପଡି ଖଣ୍ଡିଆଖାବରା ହେଉଛନ୍ତି ା
ଗ୍ରାମବାସୀ ପୂର୍ବର ଯନ୍ତ୍ରୀଙ୍କ ନିକଟରେ ଅଭିଯୋଗ କରିବା ସତ୍ତ୍ୱେ ଠିକାଦାର ସମ୍ୟକ କର୍ଣ୍ଣପାତ କରୁନାହାନ୍ତି ା ଏ ସମ୍ପର୍କରେ ଯନ୍ତ୍ରୀ ବିକ୍ରମାଦିତ୍ୟ ପ୍ରଧାନଙ୍କୁ ପଚାରିବାରେ ସେ ଯଥାଶୀଘ୍ର ପଦକ୍ଷେପ ଗ୍ରହଣ କରିବେ ବୋଲି କହିଛନ୍ତି ା
