ଭୁବନେଶ୍ୱର, ୧୮।୮(ବ୍ୟୁରୋ):ଆଉ ୪ଦିନ ପରେ ରାଖୀ ପୂର୍ଣ୍ଣିମା। ଭାଇ ହାତରେ ଭଉଣୀ ବାନ୍ଧିବ ସ୍ନେହ ସମ୍ପର୍କର ଅତୁଟ ଡୋରି। ତେଣୁ ରାଜଧାନୀର ବିଭିନ୍ନ ସ୍ଥାନରେ ଖୋଲିଲାଣି ରାଖୀ ଦୋକାନ। ଲୋକଙ୍କ ଚାହିଦାକୁ ନଜରରେ ରଖି ଚଳିତ ବର୍ଷ ବିଭିନ୍ନ ରକମର ରାଖୀ ବଜାରକୁ ଆସିଛି। ସୂତା, ରେଶମ, ତୁଳା, ବିଭିନ୍ନ ଧାତୁରେ ତିଆରି ରାଖୀ ବଜାରରେ ମିଳୁଛି। ଠାକୁରଙ୍କ ରାଖୀ ୫ ଟଙ୍କାରେ ମିଳୁଥିବାବେଳେ ସ୍ବତନ୍ତ୍ର ଡିଜାଇନ ରାଖୀର ମୂଲ୍ୟ ୨୦ ଟଙ୍କାରୁ ଆରମ୍ଭ କରି ୧ହଜାର ଟଙ୍କା ପଯର୍ୟନ୍ତ ରହିଛି। ପିଲାଙ୍କ ପାଇଁ ଛୋଟା ଭୀମ୍, ମୋଟୁପତ୍ଲୁ, ଶିବା, ଡୋରେମୋନ, ଟିଟୁ ଆଦି କାର୍ଟୁନ ଚିତ୍ରିତ ଏବଂ ପ୍ଲାଷ୍ଟିକ୍ର ଓ୍ବିଥ୍ କଟର୍ ରାଖୀ ମିଳୁଛି। ସେହିପରି ରଙ୍ଗିନ ପଥର ବସା ରାଖୀକୁ ମଧ୍ୟ ଗ୍ରାହକ ପସନ୍ଦ କରୁଛନ୍ତି। ତେବେ ଏଡିି ଷ୍ଟୋନ୍ ଖଚିତ ରାଖୀର ମୂଲ୍ୟ ସର୍ବାଧିକ ରହିଛି। ସେହିପରି ଶିବ, ଗଣେଶ, ଜଗନ୍ନାଥ, ପର୍ଶୁରାମ, ହନୁମାନ ଆଦି ଦେବାଦେବୀଙ୍କ ରାଖୀ ମଧ୍ୟ ମିଳୁଛି। ରେଶମରେ ପ୍ରସ୍ତୁତ ରାଖୀର ମୂଲ୍ୟ ଅଧିକ ହୋଇଥିଲେ ମଧ୍ୟ ଚାହିଦା ରହିଛି। ରାଜଧାନୀର ବିଭିନ୍ନ ଛକ ସ୍ଥାନ ବ୍ୟତୀତ ଶପିଂ ମଲ୍, ଗ୍ରୋସେରି ଦୋକାନ ଓ ପୂଜା ସାମଗ୍ରୀ ଦୋକାନରେ ମଧ୍ୟ ରାଖୀର ପସରା ଦେଖିବାକୁ ମିଳିଛି।
ଭଉଣୀ-ଭାଇ ଫଟୋ ଥିବା ରାଖୀର ଚାହିଦା
ସମ୍ପ୍ରତି ଅନଲାଇ୍ନରେ ରାଖୀ କିଣାବିକା ଜୋର ଧରିଛି। ତେଣୁ ବିଭିନ୍ନ ଅନଲାଇନ୍ ସାଇଟ୍ରେ ବେପାର ଜମୁଛି। ରାଖୀ ସହ ଉପହାର ଓ ମିଠା ପ୍ୟାକେଟ୍ ସ୍ବତନ୍ତ୍ର ଭାବେ ବରାଦ କରାଯାଉଛି। ୧୯୯ ଟଙ୍କାରୁ ଆରମ୍ଭ କରି ଭିନ୍ନ ଭିନ୍ନ ଦାମ୍ରେ ନାନା ଡିଜାଇନର ରାଖୀ ଉପଲବ୍ଧ ହେଉଛି। ତେବେ ଭଉଣୀ-ଭାଇଙ୍କ ଫଟୋ ଲଗାଯାଇଥିବା ରାଖୀର ଚାହିଦା ଅଧିକ ରହିଛି। ଫଟୋର ଆକାର ଓ ମାନକୁ ନେଇ ରାଖୀର ମୂଲ୍ୟ ନିର୍ଦ୍ଧାରଣ କରାଯାଉଛି। ଏଥିପାଇଁ ଗ୍ରାହକଙ୍କୁ ନିର୍ଦ୍ଧାରିତ ସମୟ ପୂର୍ବରୁ ଫଟୋ ଓ ସେ ସମ୍ବନ୍ଧୀୟ ସମସ୍ତ ବିବରଣୀ ଦେବାକୁ ପଡ଼ୁଛି।
ଟ୍ରେଣ୍ଡ୍ରେ ଲୁମ୍ବା
ଧୀରେ ଧୀରେ ରାଖୀକୁ ନେଇ ଟ୍ରେଣ୍ଡ୍ ବଦଳିବାରେ ଲାଗିଛି। ପୂର୍ବରୁ ଭଉଣୀ କେବଳ ଭାଇ ହାତରେ ରାଖୀ ବାନ୍ଧୁଥିଲା। ତେବେ ସମୟ ସହିତ ଏବେ ତାହା ବଦଳିବାରେ ଲାଗିଛି। ଭାଉଜ ଓ ଭଉଣୀ ଭଉଣୀ ମଧ୍ୟ ପରସ୍ପରକୁ ରାଖୀ ପିନ୍ଧାଇ ଏଖି ପର୍ବକୁ ପାଳନ କରୁଛନ୍ତି। କେବଳ ସେତିକି ନୁହେଁ, ଭଉଣୀଟିଏ ଭାଇକୁ ରାଖୀ ବାନ୍ଧୁଥିବାବେଳେ ଭାଇ ମଧ୍ୟ ଭଉଣୀ ହାତରେ ରାଖୀକୁ ପିନ୍ଧାଇ ତାହାର ଭଲ ପାଇବା ଜାହିର କରୁଛି। ଏଥିପାଇଁ ଏବେ ସ୍ବତନ୍ତ୍ର ଭାବେ ଲେଡିଜ୍ ରାଖୀ ‘ଲୁମ୍ବା’ ବଜାରକୁ ଆସିଛି। ଏହାର ଦାମ୍ ୫୦ ଟଙ୍କାରୁ ୧୫ଶହ ଟଙ୍କା ପର୍ଯ୍ୟନ୍ତ ରହିଛି। ବିଭିନ୍ନ ଡିଜାଇନ୍ ସହିତ ସାନ ବଡ ବିଭିନ୍ନ ଆକାରର ଏହି ରାଖୀ ମିଳୁଛି।
ଓର୍ମାସ ପକ୍ଷରୁ ‘ନିଆରା ରାଖୀର ସମ୍ଭାର’
ରାଜ୍ୟ ସରକାରଙ୍କ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଅଧୀନ ଓର୍ମାସ ତରଫରୁ ଭୁବନେଶ୍ୱରରେ ରାଖୀ ବିକ୍ରି ଆରମ୍ଭ ହୋଇଛି। ୟୁନିଟ-୮ସ୍ଥିତ ଏସ୍ଆଇଆର୍ଡି କ୍ୟାମ୍ପସ ସମ୍ମୁଖରେ ଓର୍ମାସ ରାଖୀ ଷ୍ଟଲ୍ ‘ନିଆରା ରାକ୍ଷୀର ସମ୍ଭାର’ ଖୋଲାଯାଇଛି। ଏଠାରେ ଜୈବ ଅନୁକୂଳ ରାଖୀ ବିକ୍ରି ହେଉଛି। ବିଭିନ୍ନ ସ୍ବୟଂ ସହାୟକ ଗୋଷ୍ଠୀର ମହିଳାମାନେ କାଗଜ, ମାଟି, ଧାନ, ମୁଗ, କୋଳଥ, ସଢ଼େଇ, ସବାଇ ଘାସ ଓ କାଇଁଚ ଘାସରୁ ସୁନ୍ଦର ସୁନ୍ଦର ରାଖୀ ତିଆରି କରି ବିକ୍ରି କରୁଛନ୍ତି। ଏସବୁର ଦାମ୍ ମାତ୍ର ୧୫ ଟଙ୍କାରୁ ଆରମ୍ଭ କରି ୫୦ ଟଙ୍କା ରହିଛି। ସ୍ଥାନୀୟ ଅଞ୍ଚଳରେ ଉପଲବ୍ଧ ହେଉଥିବା କଞ୍ଚାମାଲ ଓ ଆବଶ୍ୟକ ସାମଗ୍ରୀ ସଂଗ୍ରହ କରି ମହିଳାମାନେ ଏହି ରାଖୀ ସବୁ ତିଆରି କରିଛନ୍ତି। କରୋନା କାଳରେ ଜୀବନ ଜୀବିକା ପ୍ରଭାବିତ ହୋଇଥିବାବେଳେ ରାଖୀ ବ୍ୟବସାୟରୁ ବେଶ୍ କିଛି ଲାଭବାନ୍ ହୋଇପାରିବେ ବୋଲି ମହିଳାମାନେ ଆଶା ରଖିଛନ୍ତି। ଓର୍ମାସ ରାଖୀ ଷ୍ଟଲ୍ ଆସନ୍ତା ୨୨ ତାରିଖ ପର୍ଯ୍ୟନ୍ତ ପ୍ରତିଦିନ ସକାଳ ୮ରୁ ଅପରାହ୍ନ ୫ଟା ପର୍ଯ୍ୟନ୍ତ ଖୋଲା ରହିବ ବୋଲି ସୂଚନା ଦିଆଯାଇଛି।
