ମାଲକାନଗିରି,୧୮ା୭ (ଡି.ଏନ୍.ଏ.): ପ୍ରବଳ ବର୍ଷା ଯୋଗୁ ଗତ ୬ଦିନ ଧରି ଓଡ଼ିଶା ସହ ଆନ୍ଧ୍ର ପ୍ରଦେଶ ବନ୍ୟାରେ ପ୍ରଭାବିତ ହୋଇଛି। ଏହି ବନ୍ୟାରେ ଅନେକ ଘରଦ୍ୱାର, ଚାଷଜମି ନଷ୍ଟ ହୋଇଥିବା ବେଳେ ଏଥିରୁ ବାଦ ପଡିନାହାନ୍ତି ବନ୍ୟଜନ୍ତୁ। ଏପରି ଏକ ଦୃଶ୍ୟ ଦେଖିବାକୁ ମିଳିଛି ଓଡ଼ିଶା ସୀମାନ୍ତ ଆନ୍ଧ୍ରର ପୂର୍ବ ଗୋଦାବରୀ ଜିଲାରେ। ଏହି ଜିଲାର କାଡିୟମ ବ୍ଲକ ଅନ୍ତର୍ଗତ ପୁଲସଲଙ୍କା ଗ୍ରାମ ନିକଟ ଧବଳେଶ୍ୱର ବ୍ୟାରେଜ୍ ନିକଟରେ ଥିବା ଗୋଦାବରୀ ନଦୀର ଏକ ଟାପୁରେ ୧୦୦ରୁ ଊର୍ଦ୍ଧ୍ୱ ହରିଣ ଫସି ରହିଛନ୍ତି। ପୂର୍ବ ଗୋଦାବରୀ ନଦୀରେ ବନ୍ୟାଜଳ ବୃଦ୍ଧି ପାଇବାରୁ ଏହି ହରିଣପଲ ଟାପୁରେ ଫସିରହିଥିବା ଜଣାପଡିଛି। ନିକଟସ୍ଥ ଗ୍ରାମବାସୀ ଜଳରେ ପହଁରି ଆସୁଥିବା ୪ଟି ହରିଣଙ୍କୁ ଉଦ୍ଧାର କରିଥିବା ବେଳେ ଗୋଟିଏ ହରିଣକୁ କୁକୁରମାନେ ମାରି ଦେଇଛନ୍ତି। ଏହି ଘଟଣା ଜାଣିବା ପରେ ଆନ୍ଧ୍ର ଗୋଦାବରୀ ଜିଲାର ବନ ବିଭାଗ ଅଧିକାରୀ ଓ କର୍ମଚାରୀମାନେ ଘଟଣା ସ୍ଥଳରେ ପହଞ୍ଚତ୍ କିପରି ହରିଣଗୁଡିକୁ ସୁରକ୍ଷିତ ଭାବେ ଉଦ୍ଧାର କରାଯିବ ସେ ନେଇ ଉଦ୍ୟମ ଜାରି ରଖିଛନ୍ତି।
