ଅହମଦାବାଦ,୨୦।୩(ପି.ଟି.): ଭାରତ ଓ ଭ୍ରମଣକାରୀ ଇଂଲଣ୍ଡ ଟି୨୦ ସିରିଜ ବିଜୟୀ ହେବା ଲକ୍ଷ୍ୟରେ ରହିଛନ୍ତି। ଉଭୟ ଦଳ ୨ଟି ଲେଖାଏ ମ୍ୟାଚ୍ରେ ବିଜୟୀ ହୋଇଥିବାରୁ ସିରିଜ ଏବେ ୨-୨ ବରାବର ସ୍ଥିତିରେ ରହିଛି। ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଶନିବାର ପଞ୍ଚମ ତଥା ଅନ୍ତିମ ଦିନିକିଆରେ ଉଭୟ ଦଳ ପରସ୍ପରକୁ ଭେଟିବେ। ପ୍ରତିକୂଳ ପରସ୍ଥିତିରେ ଦମ୍ଦାର ପ୍ରଦର୍ଶନ କରି ଚତୁର୍ଥ ଟି୨୦ରେ ଇଂଲଣ୍ଡକୁ ପରାସ୍ତ କରି ଭାରତ ତା’ର ଆତ୍ମବିଶ୍ୱାସକୁ ଆହୁରି ଦୃଢ କରିଛି। ସିରିଜରେ ଏପର୍ଯ୍ୟନ୍ତ ଟସ୍ ନିର୍ଣ୍ଣାୟକ ଭୂମିକା ଗ୍ରହଣ କରିଆସିଛି। ଟସ୍ ହାରିଥିଲେ ମଧ୍ୟ ଭାରତ ବିଜୟୀ ହୋଇଛି। ଅନ୍ତିମ ମୁକାବିଲା ଜିତି ଉଭୟ ଦଳ ସିରିଜ ହାତେଇବା ଲକ୍ଷ୍ୟରେ ରହିଛନ୍ତି।
ସିରିଜରେ ଭାରତ ଏପର୍ଯ୍ୟନ୍ତ ନୂତନ ତଥା ନିର୍ଭୀକ ଖେଳ ଉପରେ ଅଧିକ ଧ୍ୟାନ ଦେଇଛି। ଅନ୍ତିମ ମୁକାବିଲାର ଫଳାଫଳ ଯାହା ହେଉନା କାହିଁକି ଭାରତ ଆଗକୁ ଘରୋଇ ପରିବେଶରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍କୁ ଦୃଷ୍ଟିରେ ରଖି ପ୍ରସ୍ତୁତି ଆରମ୍ଭ କରିଛି। ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳ ସବୁ ପ୍ରକାର ସ୍ଥିତିରେ ଆକ୍ରମଣ କରିବାର କ୍ଷମତା ରଖୁ ନ ଥିଲା। ତେବେ ଇଶାନ କିଷନ ଓ ସୂର୍ଯ୍ୟକୁମାର ଯାଦବଙ୍କ ଆବିଷ୍କାର ପରେ ଭାରତୀୟ ଟିମ୍ ମାନେଜମେଣ୍ଟର ଚିନ୍ତା ନିଶ୍ଚିତ ଭାବେ କମ୍ ହୋଇଥିବ। ଏହି ଦୁଇ ଖେଳାଳି ପଦାର୍ପଣରେ ଅର୍ଦ୍ଧଶତକ ହାସଲ କରି ନିଜ ପ୍ରତିଭା ଓ ଦକ୍ଷତାର ପ୍ରମାଣ ଦେଇଛନ୍ତି। ୩ ନମ୍ବରରେ ବ୍ୟାଟିଂ କରି ସୂର୍ଯ୍ୟକୁମାର ୩୧ ବଲରୁ ୬ ଚୌକା ଓ ୩ ଛକା ସହ ୫୭ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ଏହା କୋହଲିଙ୍କୁ ମଧ୍ୟ ପ୍ରଭାବିତ କରିଛି। ଦିନିକିଆ ସିରିଜ ପାଇଁ ଘୋଷିତ ଦଳରେ ମଧ୍ୟ ସୂର୍ଯ୍ୟକୁମାରଙ୍କୁ ସ୍ଥାନ ମିଳିଛି। ସୂର୍ଯ୍ୟକୁମାରଙ୍କ ପ୍ରଶଂସାରେ ଶତମୁଖ ହୋଇଛନ୍ତି କୋହଲି। ଦଳରେ ସ୍ଥାନ ପାଇଥିବା ହରିୟାଣା ଅଲରାଉଣ୍ଡର ରାହୁଲ ଟଓ୍ବୋଟିଆ ଏପର୍ଯ୍ୟନ୍ତ ସୁଯୋଗ ପାଇନାହାନ୍ତି। ଅନ୍ତିମ ମ୍ୟାଚ୍ରେ ତାଙ୍କୁ ପଦାର୍ପଣ କରିବାର ସୁଯୋଗ ଦିଆଯିବ ବୋଲି ଆଶା କରାଯାଉଛି। ପୁଣି ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ବୋଲିଂରେ ପ୍ରଭାବୀ ସାବ୍ୟସ୍ତ ହେବା ମଧ୍ୟ ଭାରତ ପାଇଁ ଏକ ବଡ଼ କଥା। ଗତ ମ୍ୟାଚ୍ରେ ସେ ୪ ଓଭର ବୋଲିଂ କରି ୧୬ ରନ ଦେବା ସହ ୨ଟି ମୂଲ୍ୟବାନ ଉଇକେଟ ଅକ୍ତିଆର କରିଥିଲେ। ରିଷ୍ଟ ସ୍ପିନର ୟୁଜବେନ୍ଦ୍ର ଚହଲଙ୍କ ସ୍ଥାନରେ ସୁଯୋଗ ପାଇଥିବା ରାହୁଲ ଚହର ମଧ୍ୟ ଭଲ ପ୍ରଦର୍ଶନ କରିଥିଲେ। ତେବେ ଓ୍ବାଶିଂଟନ ସୁନ୍ଦର ଆଶାନୁରୂପ ସଫଳତା ହାସଲ କରି ନ ଥିଲେ। କ୍ରମାଗତ ଭାବେ ବିଫଳ ହେଉଥିବା ଲୋକେଶ ରାହୁଲ ଚମକ ଦେଖାଇବେ ବୋଲି ଆଶା କରାଯାଉଛି। କାକର ସମସ୍ୟା ସତ୍ତ୍ୱେ ଭାରତ ପ୍ରଥମେ ବ୍ୟାଟିଂ କରି ବଡ଼ ସ୍କୋର ହାସଲ କରିବା କୋହଲିଙ୍କୁ ସନ୍ତୁଷ୍ଟ କରିଥିବ।
ଅପରକ୍ଷରେ ଇଂଲଣ୍ଡ ଜୋଶ ବଟଲର ଓ ୧ ନମ୍ବର ବ୍ୟାଟ୍ସମ୍ୟାନ ଡାଓ୍ବିଡ ମଲାନ ପୂର୍ବପରି ଧୂଆଁଧାର ବ୍ୟାଟିଂ କରିବେ ବୋଲି ଆଶା କରୁଛି। ଦୁଇ ଦ୍ରୁତ ବୋଲର ଜୋଫ୍ରା ଆର୍ଚର ଓ ମାର୍କ ଉଡ ଏପର୍ଯ୍ୟନ୍ତ ପ୍ରଭାବୀ ସାବ୍ୟସ୍ତ ହୋଇଛନ୍ତି। କ୍ରିସ୍ ଜୋର୍ଡାନ ମଧ୍ୟ ଆବଶ୍ୟକ ସହାୟତା ପ୍ରଦାନ କରୁଛନ୍ତି। ତେବେ ଚତୁର୍ଥ ଟି୨୦ରେ ସେ ବ୍ୟୟ ବହୁଳ ସାବ୍ୟସ୍ତ ହୋଇଥିଲେ। ଟି୨୦ ବିଶ୍ୱକପ୍କୁ ଦୃଷ୍ଟିରେ ରଖି ଆମେ ଖେଳ ଜାରି ରଖିଛୁ ଓ ଅଧିକରୁ ଅଧିକ ଶିକ୍ଷା କରିବାକୁ ପ୍ରୟାସ କରୁଛି। ତେବେ ମ୍ୟାଚ୍ ସହ ସିରିଜ ଜିତିବା ପାଇଁ ଆମେ ଚେଷ୍ଟା କରିବୁ ବୋଲି ଇଂଲଣ୍ଡ ଅଧିନାୟକ ଇଅନ ମୋର୍ଗାନ କହିଛନ୍ତି। କଳା ଓ କଠିନ ଏହି ଉଇକେଟ ସିରିଜର ଶ୍ରେଷ୍ଠ ବ୍ୟାଟିଂ ପିଚ୍ ସାବ୍ୟସ୍ତ ହେବ। ମ୍ୟାଚ୍ର ଶେଷ ଆଡକୁ କାକର ସମସ୍ୟା ଟସ୍ ହାରିବା ଦଳକୁ ଚିନ୍ତାର ନିଶ୍ଚିତ ଭାବେ ପକାଇବ।
ପ୍ରଥମ ଟି୨୦ରେ ଇଂଲଣ୍ଡ ୮ ଉଇକେଟରେ ବିଜୟୀ ହୋଇଥିବା ବେଳେ ଦ୍ୱିତୀୟ ମ୍ୟାଚ୍ରେ ଭାରତ ୭ ଉଇକେଟରେ ବିଜୟ ହାସଲ କରିଥିଲା। ସେହିପରି ତୃତୀୟ ଟି୨୦ରେ ଇଂଲଣ୍ଡ ୮ ଉଇକେଟରେ ବିଜୟୀ ହୋଇଥିଲା। ଚତୁର୍ଥ ଟି୨୦ରେ ଭାରତ ଟସ୍ ହାରିଥିଲେ ମଧ୍ୟ ୮ ରନରେ ବିଜୟୀ ହୋଇ ସିରିଜକୁ ବରାବର ସ୍ଥିତିକୁ ଆଣିଥିଲା।
ଭାରତୀୟ ଦଳ: ବିରାଟ କୋହଲି (ଅଧିନାୟକ), ରୋହିତ ଶର୍ମା (ଉପଅଧିନାୟକ), ଲୋକେଶ ରାହୁଲ, ଶିଖର ଧାଓ୍ବନ, ଶ୍ରେୟାସ ଆୟାର, ସୂର୍ଯ୍ୟକୁମାର ଯାଦବ, ରିଷଭ ପନ୍ତ (ଉଇକେଟକିପର), ହାର୍ଦ୍ଦିକ ପାଣ୍ଡ୍ୟା, ୟୁଜବେନ୍ଦ୍ର ଚହଲ, ଭୁବନେଶ୍ୱର କୁମାର, ଅକ୍ଷର ପଟେଲ, ଓ୍ବାଶିଂଟନ ସୁନ୍ଦର, ଶାର୍ଦ୍ଦୁଳ ଠାକୁର, ନବଦୀପ ସଇନି, ଦୀପକ ଚହର, ରାହୁଲ ଟଓ୍ବୋଟିଆ ଓ ଇଶାନ କିଷନ।
ଇଂଲଣ୍ଡ ଦଳ: ଇଅନ ମୋର୍ଗାନ (ଅଧିନାୟକ), ଜୋଶ ବଟଲର, ଜାସନ ରଏ, ଲିଆମ ଲିଭିଂଷ୍ଟୋନ, ଡାଓ୍ବିଡ ମଲାନ, ବେନ୍ ଷ୍ଟୋକ୍ସ, ମୋଇନ ଅଲି, ଅଦିଲ ରସିଦ, ରିସି ଟୋପ୍ଲେ, କ୍ରିସ ଜୋର୍ଡାନ, ମାର୍କ ଉଡ, ସାମ୍ କୁରାନ, ଟମ୍ କୁରାନ, ସାମ ବିଲିଙ୍ଗ୍ସ, ଜନି ବେୟାରଷ୍ଟୋ ଓ ଜୋଫ୍ରା ଆର୍ଚର।
ମ୍ୟାଚ୍ ଆରମ୍ଭ: ସନ୍ଧ୍ୟା ୭ଟା
ଟସ୍: ସନ୍ଧ୍ୟା ୬.୩୦
ସ୍ଥାନ: ନରେନ୍ଦ୍ର ମୋଦି ଷ୍ଟାଡିୟମ, ଅହମଦାବାଦ
ପ୍ରସାରଣ: ଷ୍ଟାରସ୍ପୋଟର୍ସ ନେଟ୍ଓ୍ବର୍କ
