ବିଶାଖାପାଟନମ୍,୨୦।୯: ଆନ୍ଧ୍ରପ୍ରଦେଶର ଗୋଦାବରୀ ନଦୀରେ ୧୫ ସେପ୍ଟେମ୍ବର ୨୦୧୯ରେ ଏକ ଡଙ୍ଗା ଦୁର୍ଘଟଣା ଘଟିଥିଲା। ଏହି ଦୁର୍ଘଟଣାରେ ୫୦ରୁ ଅଧିକ ଲୋକଙ୍କର ମୃତୃ୍ୟ ହୋଇଛି। ଏଥିରେ ଆନ୍ଧ୍ରପ୍ରଦେଶର ବିଶାଖାପାଟନମ (ଭିଜାଗ) ବାସିନ୍ଦା ଟି ଆପାଲା ରାଜୁ ଏବଂ ଭାଗ୍ୟଲକ୍ଷ୍ମୀ, ନିଜ ଦୁଇ ଝିଅଙ୍କୁ ହରାଇଥିଲେ। ଦୁଇ ଝିଅଙ୍କ ବୟସ ଯଥାକ୍ରମେ ୨ ବର୍ଷ ୧ ବର୍ଷ ଥିଲା। ଏହି ଦୁର୍ଘଟଣାର ଠିକ ଦୁଇ ବର୍ଷ ପରେ, ୧୫ ସେପ୍ଟେମ୍ବର ୨୦୨୧ରେ ଭାଗଲକ୍ଷ୍ମୀ ଯାଆଁଳା ସନ୍ତାନ ଜନ୍ମ ଦେଇଛନ୍ତି।
ନ୍ଦୁଇ ବର୍ଷ ପୂର୍ବେ ଆଜି, ୧୫ ସେପ୍ଟେମ୍ବର ୨୦୧୯ରେ, ଗ୍ଲାସ କାରଖାନାରେ କାମ କରୁଥିବା ଟି ଆପାଲା ରାଜୁଙ୍କ ଘରେ ଦୁଃଖର ପର୍ବତ ଭାଙ୍ଗିପଡିଥିଲା। ଗୋଦାବରୀ ନଦୀରେ ଡଙ୍ଗାବୁଡି ଘଟଣାକୁ ନେଇ ୩୨ ବର୍ଷର ଆପାଲା ରାଜୁ କହିଛନ୍ତି ଯେ, ସେ ସେଦିନ ଟିକିଏ ଅଶାନ୍ତ ଅନୁଭବ କରୁଥିଲେ, ଯେଉଁଥିପାଇଁ ଦମ୍ପତି ଶେଷ ମୁହୂର୍ତ୍ତରେ ଯାତ୍ରା ବାତିଲ କରିଥିଲେ। ତେବେ ସେ ତାଙ୍କର ଦୁଇ ଝିଅ ଗୀତା ବୈଷ୍ଣବୀ (୩) ଏବଂ ଧାତ୍ରୀ ଅନନ୍ୟା (୧) ଙ୍କ ସମ୍ପର୍କୀୟଙ୍କ ସହ ଶ୍ରୀ ରାମ ମନ୍ଦିରକୁ ତୀର୍ଥଯାତ୍ରା ପାଇଁ ପଠାଇଥିଲେ। ଆପାଲା କହିଛନ୍ତି ଯେ, ତାଙ୍କ ପରିବାରର ୧୧ ଜଣ ବ୍ୟକ୍ତି ଏହି ଡଙ୍ଗାରେ ଥିଲେ, ସେଥିମଧ୍ୟରୁ କେବଳ ଜଣେ ସଦସ୍ୟ ଉଦ୍ଧାର ପାଇପାରିଥିଲେ। ଅର୍ଥାତ୍ ଏହି ଦୁର୍ଘଟଣାରେ ଆପାଲାଙ୍କ ପରିବାରର ୧୦ ଜଣଙ୍କ ଜୀବନ ଯାଇଥିଲା। ଏବେ ଆପାଲାଙ୍କ ଘରକୁ ଏକ ଖୁସି ଖବର ଆସିଛି। ଯେଉଁ ଦିନ ସେ ଦୁଇ ଝିଅଙ୍କୁ ହରାଇଥିଲେ ଦୁଇବର୍ଷ ପରେ ସେହି ଦିନ ଭାଗ୍ୟଲକ୍ଷ୍ମୀ ଯମଜ କନ୍ୟା ସନ୍ତାନ ଜନ୍ମ ଦେଇଛନ୍ତି। ଏହା ଭଗବାନଙ୍କ ଉପହାର ବୋଲି ଦମ୍ପତି କହିଛନ୍ତି।
